Jeremiah 20 - Zo Bible

Pashhur in Jeremiah Bawlsie

¹ Tu-in Jeremiah in a gen tami thute, Topa’ biehinn uhpi pa ahi Immer’ tapa, siempu Pashhur in a za hi.

² Tua ciengin Pashhur in kamsang Jeremiah sat gawp a, Topa’ biehinn sunga Benjamin Tunkot tungnung ah kol a bul hi.

³ A zing ciengin Pashhur in Jeremiah a kol a sutpieh ciengin ama kungah Topa in na min pen Pashhur ci-in na phuo loin, “Muncin tengah Zauna” ci-in na phuozaw hi,” a ci hi.

⁴ Azieh pen Topa in tam bangin ci hi: Keima in nang le na guol teng zosie’ zauna ahi dingin nang kang bawl ding hi; tuale nang in na et lai tahin a galte uh’ namsau tawh amate a pua ding uhi. Tuale keima in Babylon kumpipa khut sungah Judah gam zosie ka pie ding hi; ama in sal dingin Babylon ah amate peipi-in namsau tawh a that sieng ding hi.

⁵ Keima in tam khuopi’ hauna zosie, a sui a lam teng zosie, a na manpha zosie le Judah kumpite’ gou teng zosie amate a bulu a galte uh’ khut sungah ka pie ding a, amate in sutin manin Babylon ah a peipi ding uhi.

⁶ Tuale nang, Pashhur le na inn sunga omte zosie Babylon khuo-ah salin na pei ding uhi; khum munah note na si ding vua, zuou kamsanna tawh thu na hil na guol teng zosie tawh khum munah ang kivuiton ding uhi.

Jeremiah in Ama a Bawlsiete Mawsah

⁷ Topa aw, nang in kei nei sol a, tuaci’n solin ka om ta hi; kei sangin nang na hatzaw a, tuaci’n kei nei zo ta hi. Sun tungtawnin nuizat nopna-in ei kinei hi; mi zosie in ei zako uhi.

⁸ Bangzieh ahei cile ka thugen simin kiko-in, “Tatsietna le kisietna!” ci-in ka awng vapuoh ding hi,” a ci hi. Bangzieh ahei cile Topa’ kammal ka gen ziehin sun tungtawnin simmawna le zapina ka thuohlaw hi.

⁹ Keima in, “A min ka gen sih ding a, ama’ min ka lo nawn sih ding hi,” ci nanleng zong, ka lungsim sungah meikuong bangin a om a, ka gu sung ei zen hi; ka ki-ip na lamin ka gim a, lah ka ki-ip zo tuom sih hi.

¹⁰ Bangzieh ahei cile mite’ kidap hona tampi ka za a, “Muncin teng zauhuoi hi! Ama heh un! Ama heh va vui,” a ci uhi. Ka lawm itte zosie in ka pua ding ei buh vua, “Ama kizawl zo kha na va, eite in ama zo na va vui, tuaci’n eite in ama tungah phu la zo na vai,” a kici uhi.

¹¹ Ahi vangin galhang pa bangin kei tawh Topa ang om hi; tua ziehin ei bawlsiete a kipai ding vua, ei zo sih ding uhi. Amate in a muolsuo zawh lo ding ziehun nahpi tahin maizum ding uhi. Kumtawnin a mindaina uh kimangngil ngai lo ding hi.

¹² Vanglien Topa aw, nangma in midihte na sittel a, nangma in mihing’ lungtang le a lungsim na mu hi; nangma in amate tunga na thuhkiana ei musah in, azieh pen nangma tungah ka vaite kang ap zo hi.

¹³ Topa tungah la sa un; Topa phat un! Azieh pen ama in migilote’ khut sung panin mi cimawte’ hinna a hunkhie hi.

¹⁴ Ka suo ni samsietin om taheh! Ka nu in keima ei suosah ni in thupha nga sih taheh!

¹⁵ Ka pa kungah, “Tapa na nei ta hi,” ci-in thu va ko-in, ama a lungdamsah pa khu samsietin om taheh.

¹⁶ Tua mipa pen Topa in a khuotuo vawt lo, a lumlet khuopite bang taheh; ama in zingmawngin kaana awging za hinlen, sunkim ciengin zong patauna awging za taheh.

¹⁷ Bangzieh ahei cile ama in naubu sungah ei na that sih hi; ei na that hi leh ka nu khu ka hankhuh hi pai ngel ding a, a gil in kumtawnin ei paai den mai ding hiven.

¹⁸ Gimna tawlna le dana teng sin ding le zalat muolphona tawh hinkhuo mang ding bep a, bang dinga naubu sung pana na suoh kha khelkhel ka hei?