Isaiah 39 - Zo Bible

Babylon Palaite Kimuoh

¹ Khum hun laitahin Baladan’ tapa Babylon kumpipa Merodach-baladan in Hezekiah a cinat le a damkiana thu a zah ziehin ama kungah laihlahte le letsongte tawh palaite a sawl hi.

² Hezekiah in amate na muoh a, a gou kholna inn sunga neisa zosie, ngun, kham, panamtui, sathau manpha, a galvan zah zosie, a vankoina sunga a kimu thei zosie a unpi-in amate a lah hi. A innsung hile, a gam sunga om zosie hile, Hezekiah in amate a lah lo bangma khat beh om lo hi.

³ Tua ciengin Kumpi Hezekiah kungah kamsang Isaiah pei a, “Tam mite in bang ang gen uh ahei? Hei sung pana nang kunga ang pei uh ahei?” a ci leh Hezekiah in, “Amate pen a gamlapi, Babylon gam panin keima kunga ang pei ahi uhi,” a ci hi.

⁴ Ama in, “Na na inn sungah bang teng a mu vuoi?” a ci hi. Hezekiah in, “Amate in ka inn sunga a om na zosie a unpi-in a mu sieng uhi. Ka vankoina innte sunga nate amate ka lah lo khat beh a om sih hi,” ci-in a dawng hi.

⁵ Tua ciengin Isaiah in Hezekiah kungah, “Vanglien Topa’ thu ngai in:

⁶ Na inn sunga om na zosie le na pu na pate in tuni donga a kholsate, Babylon gamah a kipuohmang ding ni ang tung ding hi; bangma kinuasie lo ding hi, Topa in ci hi.

⁷ Nangma sung pana a pieng na tapate kimkhat kilamang ding hi; Babylon kumpi inn sungah amate cilge-in a om ding uhi,” a ci hi.

⁸ Tua ciengin Hezekiah in Isaiah kungah, “Nei gensa Topa’ thu pen a hoi ahi hi,” a ci hi. Azieh pen ama in, “Ka hin sungin kilemna le lungmuonna om ding hi,” ci-in a ngaisun hi.