Isaiah 20 - Zo Bible

Isaiah in Egypt le Ethiopia Zaw nading Vaigel

¹ Ashdod ah Assyria Kumpipa Sargon in a sawl a galkapmang lienpenpa pei a, tua khuo simin a lah kum-

² khum hun laitahin Topa in Amoz’ tapa Isaiah hopi a, “Pei in, na kawnga la-ip puon suodawh inlen na kedap sutdawh in,” a ci a, tua bang ma-in ama gamta-in guohtang le kengguoh tawh lam a pei hi.

³ Tua ciengin Topa in, “Ka nasempa Isaiah in Egypt-te le Ethiopia-te langkhatah lim le hilkholna lim dingin a guohtang le kengguoh tawh kum thum sung lam a pei ma bangin,

⁴ Assyria kumpipa in Egypt-te’ maizum nadingin Egypt a kimante le saltang Ethiopia-te a vuoi a khangin, guohtang le kengguoh tawh tawbo dawhsa-in a puimang ding hi.

⁵ Tuale amate pen a kinepna uh Ethiopia le a kisahtheipi uh Egypt ziehin lungkie le lamet bei-in a om ding uhi.

⁶ Khum ni ciengin tam tuipi gei-a teng mite in, ‘En un, eite’ kinepna, Assyria kumpipa kung pan ei hu ding le ei hunkhie dinga i taina uh mite tungah tam bang thu pieng tamawh ei! Tuale eite bangci suotah ding i hi ta uh ahei?’ ci ding uhi,” a ci hi.