Isaiah 19 - Zo Bible

Egypt Tawh Kisai Thuphuon

¹ Egypt tawh kisai thuphuon ahi hi. En in, a gang mama meii tungah Topa a tuong a, Egypt gamah a pei hi; ama mai-ah Egypt milimte zau-in citun ding a, a sung vuah Egypt-te’ lungtang tuisuoh ding hi.

² Egypt-te le Egypt-te a kihau dingin ka tawh ding a, amate khatlekhat, veng khatlekhat, khuopi khatlekhat, gam khatlekhat a kisim ding uhi;

³ amate sungah Egypt-te’ lungsim hawmsuoh ding a, keima in amau’ gelna ka suhsietpieh ding hi; amate in milimte le misi hlate, dawi siemte le mibum theite thu a kuppi ding uhi;

⁴ keima in a khansie pupa khat’ khut sungah Egypt-te ka pie ding hi; amate tungah a giinhuoi kumpi khat in vai a hawm ding hi, Thunei pen pa, Vanglien Topa in ci hi.

⁵ Nile guntuite kanggaw ding a, guntui kangin gawta ding hi;

⁶ luinah tui kilate namsie ding a, Egypt gama Nile gun mengte kiemin gawta ding a, pumpeng le phaipheng phungte a muot sieng ding uhi.

⁷ Nile lui gei le Nile luipieu-a munte pawnkieu ding a, Nile lui gei-a kitu khaici zosie gawta-in hui in taw nawn lo ding hi.

⁸ Ngabengte da-in a kap ding uhi; Nile gun sunga ngathang siete zosie kapin mau-in, tui sunga len khu ngai mite a thanem sieng ding uhi.

⁹ Anthul khau a ciing nasemte lungkie-in, patpuon gante lungkham ding uhi.

¹⁰ Puon gante zauthawngin, sumlaw-a nasem zosie da ding uhi.

¹¹ Zoan uliente mot citahin a maw uhi; Pharaoh’ thu kikuppi mipilte in mot thu vive a hil uhi. Bangci-in Pharaoh kungah, “Kei mipil khat ka hi a, tanglai kumpite’ a suon a hlahte khat ka hi hi,” ci thei ding na hei?

¹² Tu-in na mipilte uh hei-a om uh ahei? Vanglien Topa in Egypt sim dinga a gelsa thute, bang ahei ci amate in na kungah gensah inlen, kitheisah in.

¹³ Zion uliente mimaw a suoh sieng ta vua, Memphis uliente zong mite’ solin a om ta uhi; a minam ding vua innkiu suonga a kineite in Egypt a puikhiel ta uhi.

¹⁴ Topa in amate sungah kituhkalna hlagau buohsuh zo hi; a luoh lahah zukham pa a hawipua bangin, amate in Egypt-te’ sepna zosie-ah khielsahin a hawisah ta uhi.

¹⁵ Egypt-te adingin a lutang in ahi a, a mei in ahi a, lutu ba in ahi a, pumpeng in ahi zongin, bangma a bawlpieh thei sih ding hi.

¹⁶ Tua ni ciengin Egypt-te numei bangin om ding a, amate a sim dinga a khut a zah Vanglien Topa mai-ah zau-in citun ding uhi.

¹⁷ Tuale Judah gam pen Egypt-te’ giin khat suoh ding a, Vanglien Topa in amate sim dingin a gelna ziehin tami thu kigenna mi zosiete a zau ding uhi.

Egypt, Assyria, le Israel Thupha Kipie

¹⁸ Tua ni ciengin Egypt gam sungah Canaan-te’ ham a zang khuopi nga in Vanglien Topa’ thu mang dingin a kiciem ding uhi. Tuate lahah khat pen Ni Khuopi kici ding hi.

¹⁹ Tua ni ciengin Egypt gam laizangah Topa adingin maitam khat, a gamgi-ah Topa adingin khuom khat om ding hi.

²⁰ Tua pen Vanglien Topa adingin Egypt gam sungah lim le teci hi ding hi; amate a bawlsie mite ziehin Topa kungah a kiko ciengun, ama in amate kungah a hundam ding mi khat sawlin amate panpi-in hunkhie ding hi.

²¹ Egypt-te kungah Topa amama kipholah ding hi; khum ni ciengin Egypt-te in Topa ang thei ta ding a, tuale biehpiehna le meihal biehna tawh Pasien a bie ding vua, Topa tungah amate in thuciemnate bawlin, tuate a sem ding uhi.

²² Topa in Egypt-te sat ding a, a satna damsahkia ding hi; Topa kungah amate kilekia ding a, ama in a thumna uh ngai-in a damsah ding hi.

²³ Tua ni ciengin Egypt gam panin Assyria gamah lamlien khat kisiel ding a, tuale Assyria-te Egypt gamah haw-in, Egypt-te zong Assyria gamah haw ding a, Egypt-te in Assyria-te tawh Pasien a bieton ding uhi.

²⁴ Khum ni ciengin Israel-te pen Egypt-te le Assyria-te banah a thumna hi ding a, leitung zosie adingin thupha ahi ding vua,

²⁵ Vanglien Topa in, “Ka mi Egypt-te, ka khutsuoh Assyria-te, le keima’ gouluo Israel-te in thupha nga taheh,” ci-in thupha a pieh mite ahi ding uhi.