Isaiah 11 - Zo Bible

Kilemna Kumpi Gam

¹ Jessi’ phung panin a ba khat ang meng ding a, a zungte panin a ba khat ang khang ding hi.

² Ama tungah Topa’ hlagau ahi, pilna hlagau le theitelna hlagau, ngaisut theina hlagau le thahatna hlagau, theina hlagau le Topa zatahna hlagau a om ding hi.

³ Ama in Topa zatahna khu nuom a sa ding hi. Ama in a mita a mu bangin thu khen loin, a bila a zah bangin zong khensat lo ding hi.

⁴ Ahi vangin ama in dihna tawh mizawngte’ thu khenpiehin, leitunga a nunnem mite adingin khentuom nei loin, thu a khensat ding hi. Ama in a kama ciengzawl tawh leitung sat ding a, ama’ nephu husan in migilote a that ding hi.

⁵ Ama in dihna kawnggahin nei ding a, a muonhuoina a taigahna-in nei ding hi.

⁶ Keivom le tuuno omtonin, kamkei le keelno lumton ding hi; bawngno, humpi, le ganhing thaute lumtonin, naupangno khat in tuate a hawi ding hi.

⁷ Bawngpi le vompi in an maitonin a note zong lumton ding uhi; bawngtang bangin humpi in bukungte a ne ding hi.

⁸ Gul guneite’ kuo vangah nausen nawitawp laite apmai ding a, nawitang nausente in a khut utawh gulsie’ kuo a sawh ding uhi.

⁹ Ka muol siengthote tungah khatlekhat kiliemsah loin, zong a kisusie sih ding uhi. Azieh pen tuite in tuipi a tuommang bangin Topa theina tawh leitung kidim ding hi.

A Omlai Israel le Judah Kilekiana

¹⁰ Tua ni ciengin mite tungah Jessi’ zung khu lim khatin ding ding hi; minamte in ama sui-in ama’ opna mun a thupi ding hi.

¹¹ Tua ni ciengin Topa in Assyria, Egypt, Pathros, Ethiopia, Elam, Shinar, Hamath, le tuipi gei-a gamte panin ama’ mi a kinuasie a omlaite a ngakia thei nadingin a niveina a khut a zahkia ding hi.

¹² Ama in minamte adingin lim khat khai ding a, a kinotmang Israel-te kaikhawmin, ama in lei kiuli panin a kithezah Judah a khawmtuo ding hi.

¹³ Ephraim’ thangsietna peimang ta ding a, Judah a kigalbawlna teng a kisumaimang ta ding hi; Ephraim in Judah a thangsie sih ding a, Judah in Ephraim a galbawl sih ding hi.

¹⁴ Hinanle nitumna lama Philistia-te’ elzangah bawhsuhin a tuong ding vua, nisuona lama mite a bulu ton ding uhi. Edom le Moab tungah a khut uh a hla ding vua, Ammon-te in amau’ thu a mang ding uhi.

¹⁵ Topa in nahpi-in Egypt tuipi’ lei khu a susie ding a, Gun tungah huisa tawh khut a zah ding hi. Tua khu luidung sagi-in kikhenzahin, ama in keng tawh galkai nading lampi a bawl ding hi.

¹⁶ Tuaci’n Egypt gam pan a peito lai vua Israel adinga lamlien a op bangin, a omlai a kinuasiete adingin Assyria gam panin lam lienpi khat om ding hi.