Hosea 5 - Zo Bible

Israel le Judah Tungah a Tung ding Thukhenna

¹ Siempute aw, tam thu za un! Israel innkuonte aw, tami thu ngai un! Kumpi innkuonte aw, ngai un! Azieh pen note tawh kisai-in thu kikhen ahi hi. Mizpah ah note in thang sie-in, Tabor ah ngen na hlung vua,

² Shittim ah dum thuh na to uhi; ahi vangin tuate zosie dan ka pie ding hi.

³ Keima in Ephraim ka thei a, keima kung panin Israel kiphuol lo hi; azieh pen Ephraim aw, tu-in ahile nang na pahtat zo hi; Israel zong a thanghuoi hi.

⁴ Amau’ gamtatna in a Pasien kung uh a kilesah thei sih hi. Azieh pen a lungsim sung vuah pahtat nopna lungsim om a, Topa a thei sih uhi.

⁵ Israel’ kilietsahna in ama langkhatah teci pang hi; ama’ mawna sungah Ephraim kipalpua ding hi; Judah zong amate tawh a kipalpua ding hi.

⁶ A tuuhon ule a bawnghonte tawh Topa sui-in amate a pei ding vua, ahi vangin amate in ama a mu sih ding uhi; amate kung panin ama a nuakia zo ta hi.

⁷ Amate in Topa tungah muonna nei loin a gamta uhi; bangzieh ahei cile amate in zawlta tampi a nei uhi. Tu-in hla tha in a lote utawh amate a valtum ding hi.

⁸ Gibeah ah sakii tum unlen, Ramah ah pengkul mut un. Beth-aven ah pataukona gingsah un. Benjamin aw, na nua en in!

⁹ Dan piehna ni ang tun ciengin Ephraim hawmsuoh ding a, Israel minamte lahah a tung tahtah ding thu ka gen hi.

¹⁰ Judah uliente, gamgi suong a khin mite tawh kibang uhi; amate tungah ka thangpaina tui bangin ka sungsuh ding hi.

¹¹ Ephraim kibawlsie a, thukhenna ah guol lel hi. Azieh pen ama in a kimang lo nate’ nua zui ding a hanciem mama hi.

¹² Tua ziehin Ephraim adingin a pet thei lung tawh ka kibang a, Judah innkuonte adingin a muotsah thei na tawh ka kibang hi.

¹³ Ephraim in a natna mu-in Judah in a hima a mu ciengin, Assyria gamah Ephraim pei-in kumpi lienpa kungah mi a sawl hi. Ahi vangin ama in na natna damsah thei lo a, na hima zong damsah thei lo hi.

¹⁴ Azieh pen Ephraim tungah humpi ka bang ding a, Judah innkuonte tungah humpi khangdawng ka bang ding hi. Kei mama in ka ehmal ding a, ka peisan ding hi. Keima in ka kaiphit ding a, koima in hunkhie zo lo ding hi.

¹⁵ Amate in a mawna uh pulahin ka mai ei sui masangun, ka opna munah ka kilekia ding hi. Amate a lungkham ciengun ka maipha ang sui ding uhi: