Galatia-te 1 - Zo Bible

Hopina

¹ Mihingte sawlna tawh ahi lo, thunei mihingte tung pan zong hi loin Jesu Khris le misite lah panin ama a thosah Pasien tung panin sawltahpi khat ahi keima Paul le

² ka ompi Pasien’ innkuonpite zosie in, Galati gam hlattuom pawlpite tungah:

³ Note tungah i Pa Pasien le i Topa Jesu Khris tung panin hepina le kilemna hing tung taheh, ci-in kang hopi uhi.

⁴ I Pa Pasien’ deina tawh kizui-in tuhun khang gilo panin ei hunkhie dingin eite’ mawna zieha ama le ama ang kipiekhie pa ahi,

⁵ ama tungah minthanna om zingzing taheh. Amen.

Adang Lungdamna Thu Om lo

⁶ Khris’ hepina sungah note ang hlan pa nuasie-in adang lungdamna thu-ah na kihei tahzuoi uh lamdang ka sa mama hi.

⁷ Lungdamna thu adang a om sih a, ahi vangin mi kimkhat in note hing buoisahin tua Khris’ lungdamna thu a lehei sawm uhi.

⁸ Hizongle note tungah kang hilsa uh lungdamna thu tawh a kilengatin kote nangawnin ahi a, vantung panin vantungmi khat in ahi zongin note tunga ang gen a op leh tua mi pa in samsietna nga taheh!

⁹ Masang lama kang gensa bangin kang genkiana-ah, note kungah na sansa uh thu tawh a kilengat ahi adang lungdamna thu ang gen mi khatpo a op leh tua mi pa in samsietna thuoh taheh!

¹⁰ Tu-in mihingte’ maipha sui ka mah, ahi sihle Pasien’ maipha sui ka hei? Mite po a lungdamsah sawm lailai ka hi mawh leh Khris’ nasem ka hi sih ding hi.

Paul in Sawltahpi Za a Hutna

¹¹ Sanggamte aw, keima in kang hil lungdamna thu pen mihingte’ bawltawm ahi lo lam na thei ding uh ka dei hi;

¹² bangzieh ahei cile tua thu pen mihing tung pana ka nga hi loin ei kihil zong ahi sih a, Jesu Khris’ ang kilahna pana ka nga ahi bo hi.

¹³ Note in Judah biehna sunga ka om lai-a ka hinkhuo masa lamte na za zo ta uhi. Pasien’ hlattuom pawlpite nahpi tahin ka na bawlsie a, suhsiet ding ka na hanciem hi.

¹⁴ Ka pu ka pate’ tang ngainate pawnthaw mama ka hi ziehin Jew biehna sunga ka mipi ka khanguolte lahah a madawh penin ka na om hi.

¹⁵ Hinanle ka suo masangin kei ei tuom koi-a ama’ hepina tungtawnin keima ei hlan Pasien in,

¹⁶ Gentile-te lahah ama’ thu ka gen thei nadingin keima tungah lungkimtahin a Tapa ang kilahsah lai-in mi koima khat zong ka dong sih a,

¹⁷ ka masanga sawltahpi na suohsate dong dingin zong Jerusalem ah peito tuon loin, thakhatthu-in Arabia gamah ka pei zaw a, tua zaw ciengin Damascus ah ka kilekia hi.

¹⁸ Tua zaw kum thum ciengin Cephas kunga haw dingin Jerusalem ah ka peito a, ama kungah ni sawm le ni nga sung ka tam hi.

¹⁹ Ahi vangin Topa’ sanggam pa James simlo sawltahpi dangte khat zong ka mu kha sih hi.

²⁰ Note tunga kang giel laite pen Pasien mai-a kang giel ahi a, zuouthu ka gen vawt sih hi!

²¹ Tua zaw ciengin Syria le Cilicia gam sung teng ah ka pei hi.

²² Khris sunga a om Judea gam hlattuom pawlpite in ka melin kei ei thei nai sih uhi;

²³ amate in, “Masang lama ei bawlsie pa in khatvei lai-a suhsiet a sawm tua upna thu tu-in tangko ta mel,” ci-a a kigen thu beh a za uhi.

²⁴ Tuale keima ziehin amate in Pasien’ min a phat uhi.