Ezra 8 - Zo Bible

Ezra tawh A Kilekia Innkuon Lutangte

¹ Kumpi Artaxerxes a maan hun sungin Babylon pana ka peitopi innkuon lutangte le a khangsimna uh tam bang ahi hi:

² Phinehas suonte pan Gershom ahi hi. Ithamar suonte pan Daniel ahi hi. David suonte pan Hattush,

³ Shecaniah suonte pan Parosh-te Zechariah le ama tawh pasal zakhat le sawmnga a min kikhum hi.

⁴ Pahath-moab suonte pan Zerahiah’ tapa Elihoenai le ama tawh pasal zani ahi hi.

⁵ Zattu suonte pan Jahaziel’ tapa Shecaniah, le ama tawh pasal zathum ahi hi.

⁶ Adin suonte pan Jonathan’ tapa Ebed, le ama tawh pasal sawmnga ahi hi.

⁷ Elam-te suon pan Athaliah’ tapa Jeshaiah, ama tawh pasal sawm sagi ahi hi.

⁸ Shephatiah suonte pan Michael’ tapa Zebadaih, le ama tawh pasal sawmgiet ahi hi.

⁹ Joab suonte pan Jehiel’ tapa Obadiah, le ama tawh pasal zani le sawm le giet ahi hi.

¹⁰ Bani suonte pan Josiphiah’ tapa Shelomit, le ama tawh pasal za le sawmguh ahi hi.

¹¹ Bebai suonte pan Bebai’ tapa Zechariah, le ama tawh pasal sawmni le giet ahi hi.

¹² Azgad suonte pan Hakkatan’ tapa Johanan, le ama tawh pasal za le sawmkhat ahi hi.

¹³ Adonikam suonte pan ang nuapeite, a min uh Eliphelet, Jeuel, le Shemaiah le ama tawh pasal sawmguh ahi hi.

¹⁴ Bigvai suonte Uthai le Zaccur amate tawh pasal sawm sagi ahi hi.

Biehinn ading Nasemte

¹⁵ Keima in Ahava gam lama a luong lui gei khatah amate ka khawmtuo a, khum sungah ni thum sung phuol ka sat uhi. Mite le siempute ka etphat ciengin tua munah Levi’ suonte khat zong ka mu sih hi.

¹⁶ Tua ciengin keima in Eliezer, Ariel, Shemaiah, Elnathan, Jarib, Elnathan, Nathan, Zechariah, le Meshullam-te, le mipil Joiarib le Elnathan-te ka hlansah a,

¹⁷ Casiphia a kici muna a makaipa Iddo kungah amate va pei-in Iddo kung le Casiphia-a a septonpi uh biehinn nasemte kungah i Pasien uh’ biehinn sungah nasem ding mi ang puoh nadingun a gen dingin amate ka sawl hi.

¹⁸ Hepina a nei i Pasien in ei ompi ahi ziehin Levi-te Mahli suonte panin thu ngaisut a siem Sherebiah, a tate le a hieng a sante tawh pasal sawm le giet;

¹⁹ le Merari suonte pan Jesaiah, a hieng a sante le a tate mi sawm le ni le Hashabiah tawh zong;

²⁰ tua banah David le ama’ uliente in Levi-te’ na sem dinga a tuomkoi uh biehinn nasem zani le sawmni ang puoh uhi. Amate a unpi-un a min ciet utawh kihlan hi.

Kidal Nadingin Antanna le Thungetna

²¹ Tua ciengin eite’ Pasien mai-ah ko le ko kingielin, ko le ka naupangte ule ka neisa zosie uh dam le bitin ama tungah khuolzinna khat ka nei thei nading vua ka nget thei nadingun keima in Ahava lui-ah antan nading thu ka tangko hi.

²² Bangzieh ahei cile kumpipa kungah ka Pasien un ama a suite zosie hepi a, a hi vangin ama a nuasie zosiete tungah a zauhuoi a lungthahna tungsah hi, ka na cisa uh ahi ziehin lampi-ah kote ei hun dingin galkapte le sakol galkapte ama kunga ka nget ding ka mai a zum hi.

²³ Tuaci’n ka Pasien uh tungah tami adingin antangin ka ngen vua, ama in ka thum ka tauna uh ei ngaipieh hi.

Biehinn ading Letsongte

²⁴ Tua ciengin a makai siempute sawm le ni ka tuomkoi hi: Sherebiah, Hashabiah, le amate tawh a hieng a san uh mi sawm ahi uhi.

²⁵ Tuale keima in i Pasien uh’ inn dinga kumpipa le a thu kuppite, a tote ule tua muna om Israel mi zosie in a pieh ngun le kham le vanzahte, amate adingin ka tepieh hi;

²⁶ keima in a khut sung vuah ngun talent zaguh le sawmnga, le ngun tawh kibawl vanzahte zakhat man ... talent-te, le kham talent zakhat,

²⁷ darics tulkhat man kham kuongkum sawmni, le kham banga a manpha a kitaival sumsan hoi tawh kibawl beel ni ka tepieh hi.

²⁸ Tuale keima in amate kungah, “Note Topa adingin na siengtho vua, vanzahte zong a siengtho hi; tuale ngun le khamte khu na pu na pate uh’ Pasien ahi Topa tunga kipie nopthu-a biehna ahi hi.

²⁹ Jerusalem-a om Topa’ biehinn dan sunga siempu liente, Levi-te, le Israel innkuon lutangte mai-ah na tepieh masangsie uh tuate vilin kemcing un,” ka ci hi.

³⁰ Tuaci’n siempute le Levi-te in Jerusalem-a om i Pasien’ biehinn sunga puoh dinga a kitesa ngun le kham le vanzahte a sang uhi.

Jerusalem-ah Kilekiana

³¹ Tua ciengin Jerusalem zuon dingin hla masa a ni sawm le ni ni-in Ahava gun panin ka dingkhie uhi; ka Pasien un ei na panpi a, lam kalah galte le ei na buhdap a tuomtuomte’ khut sung panin ei na hunkhie hi.

³² Jerusalem-ah ka tung vua, tua munah ni thum sung ka taam uhi.

³³ A ni li ni-in ka Pasien uh’ inn sunga Uriah’ tapa siempu Meremoth khut sungah ngun le kham, le vanzahte kite a, tuale ama tawh Phinehas’ tapa Eleazar a om vua, ama gel tawh Levi-te Jeshua’ tapa Jozabad le Binnui’ tapa Noadiah zong a om uhi.

³⁴ A unpi-in kisimin kite a, tua na zosie’ a gihna kiciemte hi.

³⁵ Khum hun laitahin saltanna pana ang kilekiate in Israel zosie ading Israel’ Pasien tungah meihal biehna dingin bawngtang sawm le ni, tuutang sawmkuo le guh, tuuno sawmsagi le sagi, le mawna zieha biehna dingin keeltang sawm le ni a pie uhi; tam teng zosie pen Topa kunga kipie meihal biehna ahi hi.

³⁶ Amate in Gungal gam a uhte le kumpipa’ khut nei-a thunei vaihawmte tungah kumpipa sawlnate a gen uhi; tuale amate in mite le Pasien’ biehinn lam nasep a hu uhi.