Ezra 5 - Zo Bible

A Ngai Bangkia Dingin Biehinnpi Lam Kizom

¹ Tu-in kamsangpa Haggai le Iddo’ tapa Zechariah-te in Judah le Jerusalem-a om Jews-te tungah Israel Pasien’ minin kam a sang uhi.

² Tua ciengin Shealtiel’ tapa Zerubabbel le Jozadak’ tapa Jeshua in Jerusalem ah Pasien’ biehinn lamkia ding a kipan uhi; tuale amate tawh Pasien’ kamsangte a omton vua, amate a hu uhi.

³ Khum hun laitahin amate kungah Gungal gamkhen uhpa Tattenai, Shethar-bozenai, le ama’ kithuopite pei-in amate kungah, “Tami biehinn na lam nading ule a khuom a zawlte hlungin na man sieng nading uh koi hing thupieh ahiei?” a ci uhi.

⁴ Amate in amate kungah, “Tami inn lamte’ min koi teng ahei?” ci zong a dong uhi.

⁵ Hinanle a Pasien uh’ mit in Jews upate vil gige a, Darius kungah tam thu va tungin ama kung pan lai tawh thuhkiana a kilekia masangsie, amate in a nasep uh a khawlsah sih uhi.

⁶ Gungal gamkhen uhpa Tattenai, Shethar-bozenai, le Gungal gamkhente-a a om ama’ kithuopi palai teng in Kumpi Darius tungah a kiteisawn laihlah khat a hlah uhi;

⁷ amate in a hlah uh thuzahsahna lai tam banga kigiel ahi hi: “Darius kumpipa tungah thupha namcin hing tung taheh!

⁸ Judah gama a lien mama Pasien’ biehinn-a ka va hawna uh kumpipa kungah kang theisah uhi. Tami biehinn pen suong kikhengzolsa tawh kilam ahi a, a kawmte sing tawh kibawl ahi hi. Amau’ khut sungah tami nasep limtahin a kisem a, masot toto uhi.

⁹ Tua ciengin upate tawh ka kiho vua, amate kungah, ‘Note in tami biehinn na lam nading ule tami a khuom a zawlte hlungin na man sieng nading uh koi hing thu pieh ahiei?’ ci-in ka dong uhi.

¹⁰ Na thei dingin a minte uzong ka dong vua, a makaite’ min zong ka giel uhi.

¹¹ Amau’ ei dawnna tam bang teng ahi hi: ‘Ko pen van le lei Pasien’ nasemte ka hi vua, kum sawtpi lai-a Israel’ kumpi lien khat in a na lamsa a lamkia ka hi bo uhi.

¹² Hinanle ka pu ka pate un vantung Pasien a lungthahsah ziehun Babylon Kumpipa, Chaldea-te Nebuchadnezzar’ khut sungah amate a na pieh lai-in, tami biehinn zong a na suhsiet ahi a, a mite zong Babylon gama a na peipi ahi hi.

¹³ Hinanle Babylon Kumpipa Cyrus in a uh a kum khatna kumin tami Pasien’ biehinn lamkia nading thu a pie hi.

¹⁴ Tua tham loin, Nebuchadnezzar in Jerusalem biehinnpi sung pana a na lah, Babylon biehinnpi sunga a na koi ahi Pasien’ biehinn sunga a om ngaisa kham le ngun tawh a kibawl vanzah teng Kumpi Cyrus in Babylon biehinnpi panin la-in ama in tua teng pen gam uhpa dinga a koi Sheshbazzar a kici mipa kungah ap hi.

¹⁵ Kumpipa in ama kungah, “Tami vanzah teng peipi inlen, Jerusalem biehinnpi sungah va koikia ta’n. Ama’ mun ngai ma-ah Pasien’ biehinnpi lamsahkia in,” a ci hi.

¹⁶ Tua ciengin Sheshbazzar pei-in Jerusalem ah Pasien’ biehinn bulpite a phut hi; tuale khum huna kipanin tudong kilamin kizo nai lo hi,’ a ci uhi.

¹⁷ Tuale tu-in kumpipa in pha na sah leh, Jerusalem biehinn lamkia nading thu kumpipa Cyrus in thu a pie tahpi amah, pie lo ahei ci thu tawh kisai-in Babylon khuo sunga kikoi kumpite’ thuciemtena laibu sungah suisah in. Kumpipa in tam thu tawh kisai-in na lunglam bang ahi ei mah ci ei zasahkia in,” a ci uhi.