Ezra 3 - Zo Bible

Jerusalem ah Biehpiehna Kibawlkia

¹ A hla sagina a tun ciengin a khuopi te vuah Israel-te a teng vua, mite Jerusalem ah a kisutuo uhi;

² tua ciengin Jozadak’ tapa Jeshua le a siempu seppite, Shealtiel’ tapa Zerubbabel le a sanggamte kipanin Pasien’ mi Moses’ thukham sunga a kigiel bangin meihal biehna dingin Israel Pasien’ maitam a bawl uhi.

³ A veng vua teng mite a giin ziehun amate in a khuombul ma-ah maitam phutin zingmawng le nitahin Topa tungah meihal biehna a pie uhi.

⁴ Amate in a kigielsa bangin buh pawi a bawl vua, ngaina kip a om dung zui-in nisima a kisam za bangin meihal biehnate nisimin a pie vua,

⁵ tuale tatsat lo meihal biehnate a bawl zaw ciengun, amate in hla tha siela biehnate, le a siengtho Topa’ pawi zosiete le Topa tungah amau’ nopthu tawh a pie mi zosie’ biehnate a pie uhi.

⁶ Amate in a hla sagina a ni masa ni panin Topa tungah meihal biehna ding a kipan uhi. Ahi vangin Topa’ biehinnpi adingin khuombul a kiphut nai sih hi.

⁷ Tuaci’n amate in suongkhengte le khutsiemte tungah sum pie-in Persia Kumpipa Cyrus tung pan a sum nga dan uh tawh kizui-in Lebanon panin tuipi gei Joppa ah taamtah singte a puohsuh nadingun Sidon-te le Tyre-te tungah anneh tuidawn le sathau a pie uhi.

Biehinnpi’ Khuombul Kiphum

⁸ Jerusalem-a Pasien’ biehinn ah a tun zaw uh a kum nina, tua kum a hla nina sungin Shealtiel’ tapa Zerubbabel le Jozadak’ tapa Jeshua in a omlai amau’ mite, siempute, Levi-te, le saltanna pan Jerusalem a peikia-te zosie tawh nasep a kipan uhi. Amate in Levi-te, kum sawmni pan a tunglam sie poma Topa’ biehinn lam nasep van dingin a se uhi.

⁹ Tuale Jeshua a tapate le a tanaute tawh, Hodaviah-te’ sanggamte Kadmiel le a tapate, Binnui le Henadad a tapate tawh, Levi-te a tapate le a tanaute tawh kithuo-in Pasien’ biehinn nasemte vanton uhi.

¹⁰ Innlamte in Topa’ biehinnpi khuom bul a phu ciengun, Israel kumpipa David’ thupiehna tawh kizui-in Topa patawi dingin siempute in a puon uh silin pengkul tawh, Asaph’ tapa Levi-te daltuo tawh a panmun ding vuah a pang uhi;

¹¹ Topa phatna le lungdamkona a kidawngin a sa vua, “Bangzieh ahei cile Topa hoi a, Israel-te a itna kip tawntung hi,” a ci uhi. Topa’ biehinn khuombul kiphut zo ta ahi ziehin amate in Topa a phat ciengun mi zosie in a aw neiza utawh dawngin a phat uhi.

¹² Mi tampite kipahin a kiko vangun a biehinn masa uh a mu ngai siempu tampite, Levi-te, le innkuon lutangte, tehsiete in tam biehinn a mu ciengun a gingin a kap uhi;

¹³ tuaci’n mite in lungdamna awging le kaana awging a khen thei sih uhi, bangzieh ahei cile a gingin mite a awng vua, a gamla panin tua awging a kiza hi.