Amos 9 - Zo Bible

Israel’ Kisietna

¹ Keima in maitam gei-a a ding Topa ka mu a, ama in: Biehinn bulpite a kilin dongin khuompiluzang zepnate satcim inlen, mizosie’ lutungah tuate tusah in; Keima in a suohta teng namsau tawh ka that ding hi; koima khat beh tai mang loin, koima khat beh suohta lo ding hi.

² Misikhuo sungah lei to nan ule, khum panin ka khut tawh ka ladawh veve ding hi; vantung dongah kato nan ule, khum panin ka khiesuh veve ding hi.

³ Carmel muolvum ah kiphuol nan ule, khum panin sui-in ka ladawh veve ding hi; ka muna panin tuipi tawngah kiphuol nan ule, khum sungah tuipi-gulpi thu ka pie ding a, tua gul in ka tusah veve ding hi.

⁴ A galte uh mai-ah salin pei nan ule, khum sungah namsau thu ka pie ding a, amate ka thatsah veve ding hi; amau’ hoi nading hi loin, a siet nadingun amate mittuhna-in ka nei ding hi.

⁵ Vanglien Topa Pasien in leitung a tham ciengin tui suohin, leitunga a teng zosiete a kap amau vua, a unpi-un Nile gun bangin khang vapualin, Egypt gama Nile gun bangin a kiemsuhkia uhi.

⁶ Ama in vantungah inndan tungnung lam a, leitang tung lamah vanthamzawl phut hi; tuipi panin tuite hlan a, lei maitanga tuate a sungsuh pa, tam banga a bawl pa’ ama’ min Topa ahi hi.

⁷ Israel mite aw, kei adingin Ethiopia mite tawh a kibang hi lo na hi uh amah? Topa in ci hi. Keima in Israel-te, Egypt pan, Philistia-te, Caphtor pan le Aram-te, Kir panin peipi to hi lo ka mah?

⁸ Topa Pasien in mawna a nei kumpi gamte mittuhna-in nei ding a, lei maitang panin Jacob innkuonte simlo, ka sumaimang ding hi, Topa in ci hi.

⁹ Azieh pen keima in thu ka pie ding a, nam zosie lahah Israel innkuonte, gawdal-a ki zoi bangin ka zoi ding a, ahi vangin suongtang khat zong tuolah a kie sih ding hi.

¹⁰ “Sietna in eite ei pha sih va,” a ci ka mi mawneite zosie, namsau-in a si ding uhi.

David’ Kumpigam A ngai Bangkia

¹¹ Khum ni ciengin a puasa David’ buh phongto-in a vang teng ka phawbih ding a, a kisie teng zong phongto-in tanglai huna bangin ka lamphakia ding hi;

¹² tua khu amate in Edom a omlai teng le ka mina a kihlan minam zosie a luo thei nading uh ahi hi, tami a bawl Topa in ci hi.

¹³ Lokai pa in bu-at pa a makhel ding hun, lengga cilpa in a khaici tupa a makhel ding hun ang tung valon ding hi, Topa in ci hi. Muolsangte panin lenggazu hlum taasuh ding a, muoltang zosie panin lenggazu luong ding hi.

¹⁴ Agam vuah ka mi Israel-te ka tutkia ding a, amate in a kisiesa khuopite lamphakia-in a tang ding uhi. Amate in lenggui suonin a zute a dawn ding vua, um bawlin a gate a ne ding uhi.

¹⁵ Ka piehsa leitang panin amate ka phungkal ngai ta sih ding a, a leitang tung vuah amate ka suon ding hi, Topa na Pasien un ci hi.