2 Timothy 2 - Zo Bible

Khris Jesu’ Galkap Hoi

¹ Tua ahi ciengin nang ka tapa aw, Khris Jesu sunga om hepina sungah thahat in;

² teci tampite tungtawnin kei tung pana na zahsa thute, midangte zong a hilsawn thei ding mi muonhuoite tungah na ap in.

³ Khris Jesu’ galkap hoi khat bangin hamsatna ei thuohpi in.

⁴ Galkap a sem lai mi koima in nisim vaite ah a kisawpawi sih hi; tua galkap pa’ lungtup in nasep a guon a bupa lungkimsah ding ahi hi.

⁵ Kidemna sungah a kihal mi koima in thuhlun tawh kituohin a dem sih leh lukhu a nga sih hi.

⁶ Lohlo nasem pa in zong lo-a pieng gate a nga masah dinga a kilawm ahi hi.

⁷ Ka thugen ngaisun in, bang ding ahei cile Topa in sil bangkimah theina ang pie ding hi.

⁸ David’ suonlehlah ahi sina panin a thokia Jesu Khris phawh in, tua khu keima hil lungdamna thu ahi a,

⁹ tua thu ziehin gimna ka thuoh a, tuolthat khat bangin kolbulna cieng nangawn ka thuoh hi. Hizongle Pasien’ thu kol kibul thei lo hi.

¹⁰ Tua ahi ziehin a teelsa mite in zong Khris Jesu sunga hutdamna le tawntung minthanna a ngaton thei nadingun amau’ ziehin sil bangkim ka thuoh hi.

¹¹ A muontah mama thu in: Ama tawh i siton uleh eite zong ama tawh i hington ding uhi;

¹² eite in i thuohzawh uleh ama tawh zong i mangton ding uhi; eite in ama i niel uleh ama in zong eite ei niel ding hi;

¹³ eite i muonhuoi sih uleh zong, ama a muonhuoi zing hi, azieh pen ama le ama ki niel thei lo hi.

A Kipahta Nasempa

¹⁴ Tam thu theisah inlen, thu ginalo, thu ngai mite a siesah thei bep ding kam kinielnate a pel nadingun Pasien mai-ah amate thuhil in.

¹⁵ Maizum om lo thuman thutah mantaha a gen, ama in a pahtat nasempa khat bangin Pasien tungah na ki-ap thei nadingin na thei tawpin bawl in.

¹⁶ A thanghuoi a mawhna kamte na pel in, azieh pen tua bang thute in Pasien up lona lamah mite pui semsem ding a,

¹⁷ a thugente uh zong a dam thei lo a bantawn hima bangin kizel ding hi. Tua bang mite lahah Hymenaeus le Philetus zong a kihal vua,

¹⁸ ama gel in thawkiana tung zo hi, ci-in thuman thutah panin pielin mi pawlkhatte’ upna a subuoi uhi.

¹⁹ Ahi vangin Pasien’ khuombul kiptahin ding a, tam bangin kiciemte hi: “Topa in ama-ate’ thei hi,” ci thu le, “Topa mina a kilo mi zosie in gitlona panin kihemkhie heh,” ci thu ahi hi.

²⁰ Inn golpi khat sungah ngun le kham beh a om sih a, sing le lei tawh a kibawl vanzahte zong a om hi, pawlkhatte a thupi-a zah ding, pawlkhatte pen a kithangzah ding ahi hi.

²¹ Ka gensa silte panin amau le amau a kisiensuo mi zosie pen nasep hoi namcin sem dingin a baisa-a om, inn neipa dinga kimanna a nei, a thupi-a zah dinga a ki-apsa vanzahte a suoh ding uhi.

²² Khangno lunggulnate pel inlen, lungsim siengtho panin Topa a hlan mite tawh dihna, upna, itna le kilemna del in.

²³ Hizongle a mothuoi le theitel lopi-a kam kiselnate tawh na kicisaw kha sin; tuate in kihaunate piengsah hi, ci thu na theisa ahi hi.

²⁴ Topa’ nasempa pen mi tawh kihau poma lo ding a, tuale mahin mikim tungah a nunnem, thuhil lam a kiva, a lungduoi,

²⁵ ama a langpang mite lungnemna tawh a hil mi hi ding hi. Pasien in amate kisiasahin thuman thutah theina pie theikha ding a,

²⁶ tuale dawimangpa’ thang panin ama’ deina lam sem dinga a matsa mite a suohta thei ding uhi.