2 Timothy 1 - Zo Bible

Hopina

¹ Khris Jesu sunga om hinna kamciem tawh kizui-in Pasien’ deina tawh Khris’ sawltahpi ahi Paul in,

² Pa Pasien le i Topa Jesu Khris tung panin hepina, khuotuona le lungmuonna in ka it ka tapa Timothy tungah hing tung taheh.

Lungdamkona le Hanthotna

³ Ka thungetna ah sun le zanin nang kang phaw zing ciengin, ka pu ka pate ma bangin lungsim siengtho tawh a na ka seppieh Pasien tungah lungdam thu ka tut hi.

⁴ Lungnopna tawh ka kidim thei nadingin na hlitui luonnate phawhkia-in kang mu ding kal ka ngahla mama hi.

⁵ Lungsim tahpi tawh na upna ka phawh a, na pi Lois le na nu Eunice sungah tua upna na nungta masa-in, tu-in nang sungah ang nungta hi, ci thu ka theicien hi.

⁶ Tam thu ziehin nangma tungah khut kang ngahna tungtawnin keima in na sunga a om Pasien’ letsong na kuontawkia ding kang phawhsah hi.

⁷ Bangzieh ahei cile Pasien in meipuona lungsim ei pie sih a, vanglietna, itna, le ki-uh zawhna lungsim ei pie hizaw hi.

⁸ Tua ciengin i Topa’ thu tecipanna maizumpi loin, ama zieha thongkie ahi keima zong ei maizumpi sinlen, Pasien’ vanglietna tungah kingam kawmin lungdamna thu adinga ka genthei thuohna ah ei thuohpi zaw in.

⁹ Ama in eite’ nasepna zieh hi loin ama’ ngimnasa bangin a hepina ziehin eite ei hundamin a siengtho hlatna tawh ei hlan hi. Tami hepina pen leitung pien masang Khris Jesu sunga ei piehsa ahi ta bo hi.

¹⁰ Hizongle sina sumaimang a, lungdamna thu ziehin hinna le si thei lona a kilangsah i hundam pa Khris Jesu ang kilahna tungtawnin tu-in tua hepina ang kilang zo hi.

¹¹ Tami lungdamna thu adinga a tangkopa, sawltahpi le siepa dinga ei kisesa ahi a,

¹² tami thu hang tawh ka sep banga a thuoh ka hi hi. Hizongle ka mai a zum sih hi, bangzieh ahei cile ka up pa ka thei a, ama tunga ka silpiehte zong ama in khum Ni dongin ei keppieh zo ding hi, ci ka cienthei hi.

¹³ Keima tung pana na zahsa thuhilna dihte, Khris Jesu sunga a om upna le itna sungah pomkip in.

¹⁴ Ei sunga a teng Hlagau Siengtho thahatna tawh nangma tunga ang ki-ap tua sil hoi kemcing in.

¹⁵ Asia gam sunga om zosie in kei ei taisan vua, tuate lahah Phygelus le Hermogenes-te zong kihal hi, ci thu na thei uhi.

¹⁶ Onesiphorus innkuonte tungah Topa in khuotuona pie taheh, azieh pen ama in ei thahatsah ngitnget a, ka thongkiehna zong ei maizumpi sih hi.

¹⁷ Rome ah ama ang tun ciengin keima ei sui-in ei mu pai hi.

¹⁸ Khumi ni ciengin Topa kung panin ama in khuotuona a mu thei nading Topa in pie taheh! Ama in Ephesus khuo ah kei adingin bangza tahin ei seppieh ahei ci thu na theisa ahi hi.