2 Samuel 5 - Zo Bible

Israel’ Kumpi-in David Sathau Kinu

¹ Tua ciengin Hebron-a David kungah Israel minamte zosie pei-in, “En in, kote nangma’ gu le nangma’ tel le vo ka hi uhi.

² Hun khat lai, kote tungah Saul kumpi ahi lai-in, Israel a peipi le a tunpi pa khu nangma na hi hi. Topa in na kungah tam bangin a gen hi: Ka mi Israel a cing ding pa na hi a, Israel tungah a uhpa ding na hi hi,” ei ci uhi.

³ Tuaci’n Hebron-a kumpipa kungah Israel upa zosie a pei uhi; tuale Kumpi David in Topa mai Hebron ah amate tawh thuciemna khat bawlin Israel tungah kumpi dingin David sathau a nu uhi.

⁴ Kumpi a sep kipatin David kum sawmthum pha a, kum sawmli sung uh hi.

⁵ Ama in Hebron ah Judah gam kum sagi le hla guh sung uh hi; tuale ama in Jerusalem ah kum sawmthum le thum sung Israel zosie le Judah uh hi.

A Kigawm Kumpigam Khuopi Dingin Jerusalem Kihisah

⁶ Kumpipa le a mite khum gama teng Jebus-te sim dingin Jerusalem-ah a pei vua, amate in David kungah, “Tam sungah nang lut zo vet sih ding hi. Mittaw le khelbaite na ngawnin ang notmang zo ding uhi,” a ci hi. “Tam sungah David ang lut zo sih ding hi,” ci-in ngaisun uhi.

⁷ Ahi vangin David in tu-a David khuopi ahi Zion mun muonhuoi a la hi.

⁸ Khum ni-in David in, “Jebus-te a vatgawp nuom poma in David in a muda mite ahi mittawte le khelbaite sim dingin tuizawl dungah pei taheh,” a ci hi. Tua ahi ziehin Topa’ inn sungah mittawte le khelbaite lut lo ding hi,” kici hi.

⁹ David in mun muonhuoi a la a, David khuopi ci-in a min phuo hi. David in khuopi kimkotin Millo sunglam zosie panin khuopi a lam hi.

¹⁰ Vanglien Pasien, Topa tawh a opton ziehin David a vanglien semsem hi.

¹¹ Tyre kumpipa Hiram in David kungah kamtaite le tuum singte, le David’ inn a lampieh khutsiemte, le leiseh siemte zong a puoh hi.

¹² Tua ciengin Israel tungah ama kumpi-in Topa in a kipsah zona le ama’ mi Israel ziehin ama’ kumpi gam a tawisang lam David in a theicien hi.

¹³ Hebron panin a tun zaw ciengin David in Jerusalem panin zineute le zite lahbe lai hi; tuale David in tanu le tapate a neibe lai hi.

¹⁴ Jerusalem-a pieng David’ tate min: Shammua, Shobab, Nathan, Solomon,

¹⁵ Ibhar, Elishua, Nepheg, Japhia,

¹⁶ Elishama, Eliada, le Eliphelet ahi hi.

Philistia-te Zogawp

¹⁷ Kumpi-in Israel tungah David sathau a kinu zo lam Philistia-te in a zah ciengun David sui dingin Philistia-te zosie a kuonto uhi; hizongle David in tua thu na za-in munmuonhuoi-ah na peisuh hi.

¹⁸ Tu-in Rephaim kuomah Philistia-te pei-in a kithezah uhi.

¹⁹ David in Topa dong a, “Philistia-te sim dingin ka kuonto diei mah? Ka khut sungah amate nei pie diei mah?” a ci hi. Topa in David kungah, “Kuonto in. Azieh pen keima in na khut sungah Philistia-te kang pie tahtah ding hi,” a ci hi.

²⁰ Tuaci’n Baal-perazim ah David pei a, khum munah David in amate a zogawp hi. Ama in, “Tuikhang in a phulmang bangin Topa in ka mai-ah ka galte phulmang zo hi,” a ci hi. Tua ziehin khum mun Baal-perazim ci-in a min kiphuo hi.

²¹ Philistia-te in khum munah a milimte uh a nuasie vua, David le a mite in tuate a puomang uhi.

²² Philistia-te a kuonto kia vua, Rephaim kuomah a kithezahkia uhi.

²³ David in Topa thu a dawh ciengin ama in, “Na kuonto sih ding hi; amau’ nua lamah kuol pei inlen lungli singte galkhat panin amate del in.

²⁴ Lungli singte tung panin galte’ ketot gin na zah ciengin kigingsa-in om in; azieh pen Philistia-te a vatmai dingin na mai-ah Topa a pei hi,” a ci hi.

²⁵ Topa’ thupieh bangin David gamta hi; tuale ama in Geba panin Geza dongin Philistia-te a vatmai hi.