2 Samuel 3 - Zo Bible

David Lamah Abner Tai

¹ Saul’ innkuon le David’ innkuonte kikalah sau veipi kidona om hi; David thahat semsem a, Saul thanem semsem hi.

² David in Hebron-ah tapate nei hi: A tapa tapen Jezreel-a Ahinoam tawh a nei Amnon ahi hi;

³ a tapa nina pen Carmel-a Nabal’ zi Abigail tawh a nei Chileab ahi hi; a tapa thumna pen Geshur Kumpipa Talmai’ tanu Maacah tawh a nei Absalom ahi hi;

⁴ a tapa lina pen Haggith’ tapa Adonijah ahi hi; a tapa ngana pen Abital’ tapa Shephatiah ahi hi;

⁵ a tapa guhna pen David’ zi Eglah tawh a nei Ithream ahi hi. Tam teng pen Hebron-a David pana a piengte ahi hi.

⁶ Saul’ innkuonte le David’ innkuonte kikalah kidona a om sungin Saul’ innkuon sungah Abner a thahat semsem hi.

⁷ Tu-in Saul in Aiah’ tanu Rizpah min nei khat mei-in sie hi. Tuale Ishbaal in Abner kungah, “Bang dinga ka pa’ meinu na luppi ahei?” a ci hi.

⁸ Ishbaal’ thugente ziehin Abner lungthah mama hi; ama in, “Kei Judah dinga ui lutang bang lel ka mah? Keima in na pa Saul’ innkuonte, a sanggamte, le a guolte tungah tuni dong citahna ka lah den ziehin David’ khut sungah note kang pieh nai lo ahi bo a, ahi vangin nang in tu-in tami numei tawh kisai-in nei mawmat hi,” a ci hi.

^9-10 Saul’ innkuon panin kumpi gam khinin Dan panin Beer-sheba cieng dong Israel le Judah tungah David’ kumpi topha phut dingin David tungah Topa in a na ciemsa thu ama adingin ka tunsah sih tah ma leh Pasien in keima Abner ei dawm sih taheh!” a ci hi.

¹¹ Ishbaal in kam khat zong Abner dawng ngam lo hi, azieh pen ama a giing mama hi.

¹² Abner in Hebron-a om David kungah kamtai sawlin ama kungah, “Tam gam koi uh ding ahei?” a ci hi. Kei tawh thuciemna hing bawl in. Israel zosie nang lamah ang pei nadingin keima’n nang kang panpi ding hi,” a ci hi.

¹³ Ama in, “Hoi hi; nang tawh thuciemna khat ka bawl ding hi. Ahi vangin na kungah kang nget nop khat a om hi; kei tawh kimu dinga nang pei ciengin Saul’ tanu Michal nang zawpi sih leh ka mai na mu sih ding hi,” a ci hi.

¹⁴ Tua ciengin David in Saul’ tapa Ishbaal kungah kamtaite sawl a, “Philistia-te vuntep zakhat tawh ka leisa ka zi Michal ei pie in,” a ci hi.

¹⁵ Ishbaal in mi sawlin a pasal Laish’ tapa Paltiel kung pan tua nu a lasah hi.

¹⁶ Ahi vangin a pasal in ama zui a, Bahurim peina lam tungtawn a nua-ah a kaa kawmin a zui hi. Tua ciengin Abner in ama kungah, “Inn lamah kilekia ta’n!” a ci hi. Tuaci’n ama a kilekia hi.

¹⁷ Abner in Israel upate kam vaihlah a, “A tawpsa hun khat lai-in David na kumpi dingun na sui kawikawi uhi.

¹⁸ Tu-in tahsuosah un; azieh pen Topa in David kungah kamciem zo hi: Ka nasempa David tungtawnin Philistia-te le a galte zosie’ khut sung panin ka mi Israel ka hunkhie ding hi,’ ci hi,” a ci hi.

¹⁹ Abner in zong Benjamin-te tungah a gen hi; tua ciengin Israel zosie le Benjamin innkuon zosie in zong tua bang bawl dingin a baisa-in a om uhi, ci thu Hebron-a David kungah a gen dingin Abner a pei hi.

²⁰ Hebron-a David kungah mi sawmni tawh Abner a pei ciengin, David in Abner le a zawpi mite adingin pawi khat a bawl hi.

²¹ Abner in David kungah, “Amate in nangma tawh thuciemna a bawl thei nading ule na lungsim sunga om bangin amate zosie tungah na uh thei nadingin, kei va pei-in ka pu kumpipa kungah Israel zosie ka va kaikhawm ta ding hi,” a ci hi.

Joab in Abner That

²² Tua zaw lientahin a galsimna panun Joab tawh David’ nasemte tungin na tampi a tut uhi. Ahi vangin Hebron-a David kungah Abner na om lo hi; azieh pen David in ama a na sawldawh ta a, ama lungmuongin a na pei ta hi.

²³ Joab le a zawpi galkap zosie a tun ciengun Joab kungah, “Kumpipa kungah Ner’ tapa Abner pei a, ama lungmuongin peikia zo hi,” ci-in kigen hi.

²⁴ Tua ciengin Joab pei-in kumpipa kungah, “Bang bawl na hi ahei? Na kungah Abner ang haw hi; a suotah thei nadinga bang dinga ama na sawldawh ahei?

²⁵ Nang ang sol ding, na sungtum na pusuo ang thei ding, le nasepna zosie ang kan dinga Ner’ tapa Abner na kunga ang haw ahi lam na thei gegu ahi hi,” a ci hi.

²⁶ David kung panin Joab a pei zaw ciengin ama in Abner kungah kamtaite sawl a, amate in Sirah Tuikhuh panin ama a nua zawpikia uhi; ahi vangin David in tua thu thei lo hi.

²⁷ Hebron ah Abner a kilekia ciengin Joab in kituom hopi dingin tunkot phung lamah ama zawpi a, tuale ama in a gil a sutpieh hi. Tuaci’n Joab’ sanggampa Asahel’ sisan luonna ziehin ama a si hi.

²⁸ Tua zaw ciengin, David in tua thu a zah ciengin ama in, “Ner’ tapa Abner’ sisan ziehin Topa mai-ah keima le ka kumpigam a tawntungin maw ka baang sih uhi,” a ci hi.

²⁹ Joab lutung le a pa’ innkuonte zosie tungah tami khielna tu taheh; tuale Joab’ innkuon tawh nin pei mi hile, a phah mi hile, ciengkhut khun mi hile, namsau tawh a kithat mi hile, anneh ding nei lo mi tawh hile kilawi ngai sih taheh!” a ci hi.

³⁰ Tuaci’n ama in Gibeon-a galkidona-ah a sanggampa uh Asahel a thapieh ziehin Joab le a sanggampa Abishai in Abner a that uhi.

³¹ Tua ciengin David in Joab le a optonpi mi zosie kungah, “Na puonsilte uh botkehin la-ip puon sil unlen Abner adingin kap un,” a ci hi. Tuale kumpipa David in mi siluong a zui hi.

³² Amate in Hebron ah Abner a vui uhi. Abner’ hanah kumpipa a gingin kap a, mi zosie zong a kap uhi.

³³ Abner adingin kumpipa in kaateng a lo a, Abner, mimaw khat’ si banga mawh si ding na ta amah?

³⁴ Na khutte kikan lo a, na kengte kol kibul lo hi; mi gilote mai-a puate bangin nang zong na pua ta hi,” a ci hi. Tuale ama ziehin mi zosie a kap uhi.

³⁵ Tua ciengin ni a op sungin an ne dingin David a zawl uhi; ahi vangin David kiciemin, “Ni tum masangin an hile, na khat popo hile ka tep leh Pasien in keima ei dawm sih taheh!” a ci hi.

³⁶ Mi zosie in tua thu a phawh vua, tua in amate a lungdamsah hi; kumpipa’ sep zosie in zong mi zosie a lungkimsah hi.

³⁷ Tuaci’n mi zosie le Israel zosie in Ner’ tapa Abner kithana thu-ah kumpipa kikum kha lo hi, ci thu khum ni-in a thei uhi.

³⁸ Tuale kumpipa in a nasemte kungah, “Israel sungah ulien le mi thupi khat si zo hi, ci thu note in na thei nai sih uh amah?

³⁹ Sathau kinu kumpi ka hi vangin tuni-in kei ka tha zawngkhal mama hi. Zeruiah’ ta tam mite khu kei adingin a thuohha mama hi. Gitlo a bawlpa a gitlona bangin Topa in thuhkia taheh!” a ci hi.