2 Samuel 18 - Zo Bible

Absalom’ Sina le Gallelna

¹ Tua ciengin David in a zawpi a mite khawmin a tultul a uhte le a zaza a uhte-in a koi hi:

² Tuale David in a galkapte se thum a suo a, sekhat Joab’ uhna nei-ah, sekhat Joab’ sanggampa Zeruiah’ tapa Abishai’ uhna nei-ah, sekhat Gitt mi Ittai’ uhna nei-ah koi hi. Kumpipa in mite kungah, “Kei mama zong no tawh kang kuon ding hi,” a ci hi.

³ Ahi vangin mite in, “Nang, nang kuon sih ding hi. Azieh pen kote tai uleng amate in khawh ei sa lo ding hi. Mi alang khat si nan uleng zong khawh ei sa tuom lo ding uhi. Ahi vangin kote mi tulsawm za-in nang na manpha hi; tua ahi ziehin ei hu ding khuopi panin mi hing sawl lacin hoizaw hi,” a ci uhi.

⁴ Kumpipa in amate kungah, “No hoisah pen bangin kang bawl na ding hi,” a ci hi. Tuaci’n gal sim dingin galkapte zosie a tultul a zaza-in a kihonzawt laitahun kul tunkot pangah kumpipa a ding hi.

⁵ Kumpipa in Joab, Abishai, le Ittai-te kungah, “Keima nei khuolna-un tangvalpa Absalom hing dawm bo vuo izaw,” a ci hi. Mi zosie in Absalom tawh kisai-a kumpipa in galkapmang zosie tunga a thupiehte a za uhi.

⁶ Tuaci’n gamlahah Israel do dingin galkapte a kuon uhi; tuale Ephraim gammang tulahah a kido uhi.

⁷ Khum munah David’ nasemte in Israel mite a zo vua, khum ni-in mi kithat a tam mama a, a si mi tul sawmni pha hi.

⁸ Gam sung muncin tengah gal kidona kizel hi; tuale khum ni-in namsau’ tha sangin gamlahah a si mi tamzaw hi.

⁹ Absalom in David’ nasemte tuoh kha khelkhel hi. Absalom a laa tungah tuong a, gangpi sing golpi a ba pha mama nei khatah a laa tai-in gangpi ba lahah a lutang awh a, a laa taisuohin vanlelei kikalah a kikhaisa-in ama a kinuasie hi.

¹⁰ Mi khat in mu a, Joab kungah, “Gangpi singba kawmah Absalom a kikhailawng ka mu hi,” a ci hi.

¹¹ Joab in ama kunga thugen pa kungah, “Bang e na gen, ama na mu i! Tua ahile bang dinga khumnah ama satlia-in tuoldenna nang nei pai lo ahiei? Ngun peh sawm le kawnggah khat beh hing pie ngel ma ding hi veng,” a ci hi.

¹² Ahi vangin tua mipa in Joab kungah, “Ka khut sungah ngun shekel tulkhat nangawn ei kipie le zong kumpipa’ tapa tha nadingin ka khut ka hlang sih ding hi; azieh pen kote zahin kumpipa in nang, Abishai, le Ittai tam bangin thu ang vaihlah hi: Keima nei khuolna-un tangvalpa Absalom hing dawm bo un!’ ang ci hi.

¹³ Thu dang khatah kei zuoutatin ama’ hinna that mawh leng, (kumpipa tungah bangma phuolsel om lo hi), nang mama kikangkoi-in nei hum tuom sih ding hi,” a ci hi.

¹⁴ Joab in, “Tam bangin nang tawh hun mawh tawpsah sih vang,” ci-in ama in teipi thum la-in gangpi singba kawmah a hinglai-in Absalom’ lungtang sontah sun pailet hi.

¹⁵ Tuale Joab’ galhiem a puo tangval sawm in Absalom imtawmin a satlia uhi.

¹⁶ Tua ciengin Joab in zong pengkul tum a, Israel-te a delna panun galkapte a kilekia uhi. Bangzieh ahei cile Joab in galkapte a khaam hi.

¹⁷ Amate in Absalom luonghawm a la vua, gamlaha dum golpi khat sungah ama pai-in ama tungah suongcien gol mama khat a ciengto uhi. Khum laitahin Israel-te zosie a inn ciet vuah a taimang uhi.

¹⁸ Absalom in ama’ khan sungin kumpipa’ kuomah khuompi khat la-in ama adingin phut hi, azieh pen ama in, “Keima’ min a kiphaw nading tapa ka nei sih hi,” a ci hi; ama in tua khuompi pen ama’ min tap a, tuni cieng dongin Absalom’ Muolsuong kici hi.

David in Absalom’ Si Za

¹⁹ Tua ciengin Zadok’ tapa Ahimaaz in, “Keima ei taisah inlen, Topa in a galte’ vanglietna panin ama hunkhie zo hi, ci-in kumpipa kungah thu ei puohsah in,” a ci hi.

²⁰ Joab in ama kungah, “Tuni-in nang in lungdamna thu na puoh thei sih ding hi; nidang khat ciengin thu na puoh thei pan beh ding a, ahi vangin tuni-in tua bang na bawl thei sih ding hi, azieh pen kumpipa’ tapa si zo hi,” a ci hi.

²¹ Tua ciengin Joab in Cush mipa kungah, “Pei inlen na sil musa teng kumpipa kungah va gen in,” a ci hi. Cush mipa zong Joab mai-ah kunin a tai pai hi.

²² Tua ciengin Zadok’ tapa Ahimaaz in Joab kungah, “Bangbang hi leh Cush mipa’ nua-ah ei taisah in,” cikia hi. Joab in, “Lungdamna thu puohna ziehin thaman nga tuom ngap lo ding, bang dinga tai sawm na hei, ka tapa aw?” a ci hi.

²³ Ama in, “A suoh nuom suoh, kei zong ka va tai ta ding hi,” a ci hi. Tuaci’n ama in, “Tai in,” a ci hi. Tua ciengin zanglei lam zuonin Ahimaaz a tai a, Cush mipa a makhel hi.

²⁴ Tua laitahin kul kotpi a sungta pen le a puta pen kikalah David a to hi. Galvil pa kulkotpi khumzang a pang panin kato-in a dahto leh ama guoha ang tai mi khat a mu hi.

²⁵ Galvil pa awngin kumpipa kungah gen hi. Kumpipa in, “Ama guoh ahile lungdamna thu hing tut ahi hi,” a ci hi. Ama nawtai-in a neh semsem hi.

²⁶ Galvil pa in mituom a tai khat mukia hi; galvil pa in kot cingpa hlanin ama kungah, “En in, mituom khat ama guohin ang taikia ta!” a ci hi. Kumpipa in, “Ama zong lungdamna thu ang puoh ma ahi hi,” a ci hi.

²⁷ Tua ciengin galvil pa in, “Pasal ang tai masa pa Zadok’ tapa Ahimaaz’ taidan tawh kisun sa veng aw,” a ci hi. Kumpipa in, “Ama mihoi ahi a, lungdamna thuhoi tawh ang tung ahi hi,” ci hi.

²⁸ Tua ciengin kumpipa kungah Ahimaaz kiko a, “Na zosie hoi hi!” a ci hi. Tua ciengin kumpipa mai-ah a mai kunin tuolah khupbawh a, “ Ka pu kumpipa’ langkhatah a khuttum a ziel mite nangma khut sunga ang pie Topa na Pasien in thupha nga taheh,” a ci hi.

²⁹ Kumpipa in, “Tangval Absalom a dam nai mah?” a ci hi. Ahimaaz in dawng a, “Joab in na nasempa ei sawl laitahin buoina lienpi khat ka mu a, ahi vangin bang ahei ci ka thei sih hi,” a ci hi.

³⁰ Kumpipa in, “Kihei inlen tanah ding in,” a ci hi. Tuaci’n ama kihei-in pia lo-in a ding hi.

³¹ Tua ciengin Cush mipa a tung hi; tuale Cush mipa in, “Ka pu kumpipa adingin lungdamna thu ahi hi! Azieh pen tuni-in Topa in na dihna a talang zo ta a, nangma langkhatah a ding mi zosie’ vanglietna panin ang hun zo hi,” a ci hi.

³² Kumpipa in Cush mipa kungah, “Tangvalpa Absalom a dam nai mah?” a ci hi. Cush mipa in dawng a, “Ka pu kumpipa’ galte, le na siet nadinga na langa dingte zosie tua tangvalpa bang taheh,” a ci hi.

David in Absalom Kaa

³³ Kumpipa’ lungsim nahpi-in sukha a, tunkot tunga inndanah a kato pumin a kap hi; tuale ama in, “Aw ka tapa Absalom, ka tapa, ka tapa Absalom! Nang si tangin kei sizaw ve leng izaw. Aw Absalom, ka tapa, ka tapa!” a ci hi.