2 Samuel 16 - Zo BibleDavid’ Alangte 1 David in muolvum a hlen zep tahin Mephibosheth’ nasempa Ziba in anlum zani, lengga a kiphogawsa bawh zakhat, khal theiga zakhat le lenggazu savun thawldim khat a puo, a phaw kivawsa laa ni tawh ama na lamdot hi. 2 Kumpipa in Ziba kungah, “Tamte bang dinga nei puoh ahei?” a ci hi. Ziba in dawng a, “Laate kumpipa’ innkuonte tuon nading, anlum le khal theigate tangvalte neh ding, le lenggazu pen senel gama a basamte dawn ding ahi hi,” a ci hi. 3 Kumpipa in, “Tua ahile na pu’ tapa hei sunga om ahiei?” a ci hi. Ziba in kumpipa kungah, “Ama Jeruaslem-ah om hi. Bang ding ahei cile ama in, ‘Tuni-in Israel innkuon in ka pu’ kumpi gam keima ei piekia ding hi,’ ci hi,” a ci hi. 4 Tua ciengin kumpipa in Ziba kungah, “Mephibosheth’ neisa zosie tu-in nang-a’ ahi ta hi,” a ci hi. Ziba in, “Keima in nang zatahna kang pie hi; ka pu kumpipa’ muna-ah maipha ei musah ta’n,” a ci hi. Shimei in David Samsie 5 Bahurim-ah Kumpi David a tun ciengin ama a samsie dingin Saul’ innkuon sunga a innsung mi, Gera’ tapa Shimei kici pa khat a pei hi; a samsiet kawmin ama a peikhie hi. 6 Ama in Kumpi David le a nasemte zosie suong tawh sep hi; tua laitahin mi zosie le galhang zosie a ziet a vei-ah a om uhi. 7 Shimei in a samsiet kawmin, “Peimang! Peimang! Tuol thatpa! Mi ginalo Pa! 8 Ama tanga na uh Saul innkuonte’ sisan luongsah na hi ziehin Topa in nang tungah ang thuh zo hi; tuale Topa in na tapa Absalom tungah na kumpi gam a pie zo hi. En in, gimna in ang nuaphah zo hi; bangzieh ahei cile nang sisan luongsah mipa na hi hi,” a ci hi. 9 Tua ciengin Zeruiah’ tapa Abishai in kumpipa kungah, “Tami uisi tawh a kibang lel khat in bang dinga ka pu kumpipa hici samsiet viel ding ahei? Ei kuonsah inlen a lu ei tansah in,” a ci hi. 10 Ahi vangin kumpipa in, “No Zeruiah’ tapate aw, kei le no bang kisai i hei? Topa in ama kungah, ‘David va samsie tan,’ a ci zieha ei samsiet ahile koi in, ‘Bang dinga na tuaci bawl ahei?’ ci thei ding ahei?” a ci hi. 11 David in Abishai le a nasem zosie kungah, “Keima’ tapa bawn in tha dingin ei sui zuh a; tu-in tam Benjamin mipa in bangza-in ei suizaw kan lai ding ahei! Ama’ thu-in omsah unlen ei samsiesah lel un; bangzieh ahei cile Topa in ama a sawl zong hi thei kha ding hi. 12 Topa in ka gentheina ei ensuhin tuni-in tam banga ei kisamsietna ziehin Topa in a hoi tawh kei ei thuh kha ding hi,” a ci hi. 13 Tuaci’n lampi-ah David le a mite a pei vua, ama tawh kigalsai muolpangah Shimei a pei laitahin, ama in a pei kawmin ama samsie-in suong tawh sepin leivui a the hi. 14 Kumpipa le a zawpi mi zosie lamba-in Jordan ah a tung uhi; tuale khum munah ama kitoidamsah hi. Ahithophel’ Thumopna 15 Tu-in Jerusalem ah Absalom le Israel-te zosie a tung uhi; Ahithophel zong ama tawh a om hi. 16 Absalom kungah David’ guolpa, Archi mi Hushai a tun ciengin Hushai in Absalom kungah, “Kumpipa damsawt heh! Kumpipa dam sawt heh!” a ci hi. 17 Absalom in Hushai kungah, “Tam khu na guolpa tunga na thumanna pen amah? Bang dinga na guolpa tawh zawh lo na hiei?” a ci hi. 18 Hushai in Absalom kungah, “Hi lo hi; Topa le tam mite le Israel-te zosie in a teelsa uh mipa-a’ ka hi ding a, ama tawh ka om ding hi. 19 Tua banah a koi pen’ na sem ding ka hei? Ama’ tapa hi lo ding amah? Na pa’ na ka sep bang lienin nangma’ na zong ka sem ding hi,” a ci hi. 20 Tua ciengin Absalom in Ahithophel kungah, “Thu ei kuppi in; bang bawl ding i hei?” a ci hi. 21 Ahithophel in Absalom kungah, “Na pa in inn ngah dinga a nuasie a meite va luppi ta’n; tua hile na pa’ huot thei dinga nang le nang na kibawl lam Israel zosie in za-in tuaci’n nang tawh ang om mi zosie’ khutte ang thakhau tuom ding hi,” a ci hi. 22 Tuaci’n amate in zong innkhum zangah Absalom adingin puonbuh khat a lam uhi; Israel zosie’ mitmu-in Absalom in a pa’ meite a luppi hi. 23 Khum hun lai-in Ahithophel’ thumopte Pasien’ thuphuon bangin kingaisun hi; tuaci’n David le Absalom in Ahithophel’ thumopte zosie thupi sim tuoh uhi. |
Zo Bible © Bible Society of Myanmar, 2018.
Bible Society of Myanmar