2 Samuel 15 - Zo BibleAbsalom in Kumpi Tokhom Tu 1 Tam zaw ciengin Absalom in sakol leeng khat le a sakolte, le a mai-a tai ding mi sawmnga a kithawisah hi. 2 Absalom thobai-in kul kotpi lam gei-ah ding zel hi; tuale mi khatpo in thu nei-in kumpipa mai-ah a tut ciengin Absalom in hlan zelin, “Koi khuo pan na hiei?” a ci hi. Mipa in, “Na nasempa, Israel sunga tua minam tua khuote ka hi hi,” a ci ciengin 3 Absalom in, “En in, na thunei pen hoi a, zong a dih hi; ahi vangin kumpipa in na thu ang zahpi ding mi koima ngansie a nei sih hi,” a ci hi. 4 Absalom in a genbe lai a, “Gam sunga thukhen khat hi leng maw! Tua ciengin mi tawh kiheh, ahi sihle thunei zosie ka kungah hing pei va-un, ke’n zong a thu uh a tangin khenpieh ma ding hi veng,” a ci hi. 5 Ama tungah zatahna pie dingin mi khat in ama kung nai-in a pei sielin a khut zahin tupomin a nam zel let hi. 6 Tua bangin Absalom in kumpi kunga thukhensah dinga ang pei Israel-te tungah a gamta hi; tuaci’n Absalom in Israel mite’ lungsim a guhpieh hi. 7 Kum li a cin ciengin Absalom in kumpipa kungah, “Hebron ah ei peisah inlen, Topa kungah ka ciemsa ka thuciem ei bawlsah in, ci-in kang thum hi. 8 Azieh pen Aram-a Geshur ah ka op laitahin na nasempa in thuciem khat ka na bawl hi: Jerusalem ah Topa in ei peipikia tahtaha ahile Hebron ah Topa ka bie ding hi, ka ci hi,” a ci hi. 9 Kumpipa in ama kungah, “Lungmuong tahin pei in,” a ci hi. Tuaci’n tho-in Hebron-ah ama a pei hi. 10 Ahi vangin Absalom in Israel minam zosie kungah kamtaite sawldapin, “Note in pengkul gin na zah behun tam bangin awng un: Hebron ah Absalom kumpi suoh zo hi!’ ci-un,” a ci hi. 11 Jerusalem panin Absalom tawh mi za ni a pei uhi; amate ahile a kiciel zinte ahi vua, lungsim hoi tawh pei-in bangma thu a thei sih uhi. 12 Absalom in biehpiehna a pieh laitahin a khuopi Gilon panin David’ thu kuppipa Gilon-te Ahitophel a hlansah hi. Sawmdapna thahat semsem a, Absalom nuazui mi a khang tehteh hi. Jerusalem panin David Taimang 13 David kungah kamtai khat tung a, “Absalom lamah Israel-te’ lungtang pei sieng zo hi,” ci-in a gen hi. 14 Tua ciengin David in Jerusalem-a ama tawh a omton ama’ ulien zosie kungah, “Tho un! Tai vai, tua hi sihle Absalom kung panin i suotah nading uh om lo ding hi. Manlang un, tua hi sihle ama in ei pha pai ding hi, ama in i tung vuah gimna ang tungsah ding a, namsau tawh khuopi ang sim ding hi,” a ci hi. 15 Kumpipa’ uliente in kumpipa kungah, “Ka pu kumpipa in na khensat popo sem dingin na nasemte a baisa ahi hi,” a ci uhi. 16 Tuaci’n kumpipa pei-in inn ngaih dinga a nuasie a mei numei sawmte simlo a innkuon zosie in ama’ nua a zui uhi. 17 Kumpipa pei-in mi zosie in ama’ nua a zui uhi; tuale inn tawpna pen khatah amate a khawl uhi. 18 Ama’ ulien zosie in ama a makhel uhi; tuale Chereth-te zosie, Peleth-te zosie, le Gath pana ama ang zui Gitt-te mi za guhte zosie, kumpipa’ mai nawhin pei uhi. 19 Tua ciengin Gitt-te Ittai kungah, “Nang in zong bang dinga nei zui ahiei? Nuakia inlen kumpipa tawh omton in; bangzieh ahei cile nang gamdang mi na hi a, na gam pana ang kinotmang na hi bo hi. 20 Zani ahiei khat a ang tung pan hi bo cin a, kei na ngawn in zong nang hei lam zuon ding ci kang thei lo laitahin tuni-in kote tawh a vah kawikawi dingin kang pui ding amah? Na sanggamte zawpi inlen peikia ta’n; tuale Topa in nang tungah a itna kip le a thumanna hing lah taheh,” a ci hi. 21 Hinanle Ittai in kumpipa dawng a, “Topa hing a, ka pu kumpipa zong a hing ahi ma bangin, ka pu kumpipa opna popo-ah si leng hing leng na nasempa kang pei ding hi,” a ci hi. 22 David in Ittai kungah, “Tua ahile pei in, peisuoh in,” a ci hi. Tuaci’n Gitt-te Ittai, a mite zosie le a zawpi numei naupang zosie tawh a peisuoh hi. 23 Mi zosie a pei laitahin gam sung mi zosie a gingin a kap uhi; kumpipa in Kidron Lui galkai-in mi zosie in senel gam lam a manaw uhi. 24 Abiathar a peito a, tuale Zadok zong Levi-te zosie tawh pei-in Pasien’ thuciemna singkuong a puo uhi. Mite in khuopi a kal zaw masangsie amate in Pasien’ thuciemna singkuong a nga phot tadi uhi. 25 Tua ciengin kumpipa in Zadok kungah, “Khuopi sungah Pasien’ singkuong puokia in. Topa’ maipha ka mu leh ama in kei ei puohkia ding a, tuami le a opna mun ei musahkia ding hi. 26 Ahi vangin ama in, ‘Nang tungah lungkim sing,’ ei ci leh tanah kei ka om hi, ama in hoi a sah bangin kei tungah bawl taheh,” a ci hi. 27 Kumpipa in zong siempu Zadok kungah, “En in, nuom tahin nangma le Abiathar, na tapa nite Ahimaaz le Abiathar’ tapa Jonathan tawh khuopi sungah peikia ta un. 28 En un, kei thu ei puoh dingin nangma kung panin thu ang tun masang senel gam sunga tanmunte-ah kang na ngah ding hi,” cibe lai hi. 29 Tuaci’n Jerusalem-ah Zadok le Abiathar in Pasien’ singkuong a puokia vua, tua munah ama gel a om uhi. 30 Ahi vangin Olive Muoltung katona lam zuonin a pei pumin David kap a, puon kilukhu-in a keng guohin lam a pei hi; a zawpi mi zosie puon kilukhusa-in a peito pumun a kap uhi. 31 David kungah, A sawmsim mite lahah Ahithophel zong Absalom tawh kipawl hi,” ci-in kigen hi. David in, “Topa aw, kang thum hi. Ahithophel’ thumopte motna-in na heipieh in,” a ci hi. Hushai, David’ Thukan Suoh 32 Pasien biehna muol vumah David a tun ciengin a dawn dingin a puontungsil balkehsa le a lu tungah leivui bangsa-in Archi mi Hushai a pei hi. 33 David in ama kungah, “Kei nei zui suoh leh kei adingin vangih na hi ding hi. 34 Ahi vangin khuopi sungah peikia-in Absalom kungah, ‘Kumpipa aw; masang lai-a na pa’ nasem ka hi ma bangin tu-in zong nangma’ nasem ka hi ding hi,’ ci-in va gen ta’n, tua hile keima dingin Ahithophel’ thumopte na sumit thei ding hi. 35 Khum munah nang tawh siempu Zadok le Abiathar ang om ding uhi. Tuaci’n kumpipa’ inn sunga na thu zah poma Zadok le Abiathar siempu tegel kungah gen in. 36 Khum munah amau’ tapa gel, Zadok’ tapa Ahimaaz le Abiathar’ tapa Jonathan, tawh a omton uhi; tuale ama gel tungtawnin na thuzah zosie kei nei theisah ding hi,” a ci hi. 37 Tuaci’n Jerusalem ah Absalom a lut laitahin David’ guolpa Hushai zong khuopi sungah a pei hi. |
Zo Bible © Bible Society of Myanmar, 2018.
Bible Society of Myanmar