2 Samuel 13 - Zo Bible

Amnon le Tamar

¹ Hun phabeppi khat ang tawp hi. David’ tapa Absalom in sanggam numei a melhoi mama khat nei a, a min Tamar kici hi; tuale David’ tapa Amnon in tua nu a deigaw hi.

² Amnon in a sanggamnu Tamar a dei seng ziehin a natlaw vawt hi. Bangzieh ahei cile ama pen ngahnu siengtho ahi ziehin Amnon in ama bangma law thei lo hi.

³ Ahi vangin Amnon in David’ sanggampa Shimeah’ tapa Jonadab kici guolpa khat nei hi; ama pen mi khel mama khat ahi hi.

⁴ Ama in Amnon kungah, “Kumpipa tapa aw, bang dinga zingmawng khat zaw zingmawng khat hici gawn semsem mawh na hei? Ei gen lo ding na mah?” a ci hi. Amnon in ama kungah, “Ka sanggampa Absalom’ nau nu Tamar deigaw ka hi hi,” a ci hi.

⁵ Jonadab in ama kungah, “Na lupna tungah lum inlen a cina kipang in; tuale ang ve dinga na pa ang pei ciengin ama kungah, ‘Keima in mu-in ama’ khut panin an ka neh thei nadingin Tamar hing pei-in ka neh ding bangkhat ei bawlpieh heh,’ ci in,” a ci hi.

⁶ Tuaci’n Amnon lumin a cina a kipang hi; tuale a ve dingin kumpipa a pei ciengin Amnon in kumpipa kungah, “Ama’ khut panin an ka neh thei nadingin ka nau nu Tamar hing pei-in ka muna-ah moh pheng ni haw khat nang bawlsah nadingin kang thum hi,” a ci hi.

⁷ Tua ciengin David in inn-a Tamar kungah mi sawl a, “Na sanggampa Amnon’ inn ah va haw ta’nlen a neh ding an va bawlpieh ta’n,” a ci hi.

⁸ Tuaci’n a sanggampa Amnon lupna inn ah Tamar a va haw ta hi. Tua nu in annel lom la-in meh a, ama muna-ah mophengte bawlin tua mohte a em hi.

⁹ Tua ciengin ama in khangbel la-in a mai-ah a thuapieh vangin ama in a ne nuom sih hi. Amnon in, “Ka kung panin mi zosie pusuohsah in,” a ci hi. Tuaci’n ama kung panin mi zosie a pusuoh hi.

¹⁰ Tua ciengin Amnon in Tamar kungah, “Na khut panin an ka neh thei nadingin inndan sungah an hing tawi in,” a ci hi. Tuaci’n Tamar in a bawlsa mophengte la-in inndan sung ama’ sanggampa Amnon kungah tuate a peipi hi.

¹¹ Hinanle a neh dingin tuate ama kungah a tawi ciengin, ama in tua nu pummatin ama kungah, “Hing pei inlen kei ei luppi in, ka sanggamnu aw,” a ci hi.

¹² Tua nu in dawng a, “Hi lo hi, sanggampa aw, ei paubawl sin; azieh pen Israel sungah tam bangin kigamta ngai lo hi; tam bangin gitlo gamtat vawt sin!

¹³ Hei sungah ka mai laa ngam nawn ding ka hei? Nang zong Israel sungah mi ginalo khat na hi ta ding hi. Tua ahi ziehin tu-in kang thum hi, kumpipa kungah gen in; bang ding ahei cile ama in nang tawh kei ei khaam lo ding hi,” a ci hi.

¹⁴ Ahi vangin ama in tua nu thugen a ngai sih hi; tuale ama nu sangin a hatzawh ziehin ama in hatthawthu tawh buonin a luppi hi.

¹⁵ Tua ciengin Amnon in Tamar a nah huot mama hi; a cil-a ama nu a lunggulna sangin a huotna a lienzaw ta vanuh hi. Amnon in tua nu kungah, “Pei dawh ta’n!” a ci hi.

¹⁶ Hinanle tua nu in ama kungah, “Hi lo hi, ka sanggampa aw; azieh pen kei tunga nei bawlsa khielna sangin kei nei sawldawhna lienzaw hi,” a ci hi.

¹⁷ Ama in a nasem tangvalpa hlanin, “Ka kung panin tami numei notmang inlen, ama nua-ah kot kalh in,” a ci hi.

¹⁸ (Tua nu in puontuolpi a ban nei khat a sil hi; azieh pen kumpipa’ tanu ngahnu siengthote nidang lai-in tua banga na kivon uh ahi hi.) Tuaci’n a nasempa in a pulamah tua nu notdawhin kot a kalh hi.

¹⁹ Ahi vangin Tamar in a lu tungah vut buohin ama’ sil puontuolpi bansau botkeh hi; ama nu in a lu tungah a khut koi-in a peikawmin a gingin kap hi.

²⁰ A sanggampa Absalom in ama kungah, “Na sanggampa Amnon in ang luppi ta amah? Tu-in dai in, sanggamnu aw; ama na sanggampa ahi hi; tam thu na lungsimah koi da ta’n,” a ci hi. Tuaci’n Tamar pen a sanggampa Absalom’ inn ah numei lungzuong khatin a om hi.

²¹ Kumpi David in tam thu teng zosie a zah ciengin lungthah mama a, ahi vangin ama pen a tacil ahi a, ama a it ziehin a tapa Amnon dan a pie sih hi.

²² Ahi vangin Absalom in Amnon kungah a pha hile a sie hile bangma gen vet lo hi; azieh pen ama in a sanggamnu Tamar a buon ziehin Absalom in Amnon a muda hi.

Absalom in a Sanggamnu’ Kibawlsietna Phula

²³ Kum ni bih a cin zaw ciangin Absalom in Ephraim gei-a Baal-hazor ah tuumul heu pawi bawl a, Absalom in kumpipa’ tapate zosie hlan hi.

²⁴ Kumpipa kungah Absalom pei a, “Na nasempa in tuumul heute ka nei hi; nei hepina-in kumpipa le a nasemte, na nasempa tawh nang pei zo ding vuoi mah?” a ci hi.

²⁵ Ahi vangin kumpipa in Absalom kungah, “Hi sih, ka tapa aw, ka unpi-un ei peisah sin; hing pei uleng zong nang adingin vangih ka suoh ding uhi,” a ci hi. Ama in paugen a, ahi vangin ama pei nuom loin ama thupha a pie hi.

²⁶ Tua ciengin Absalom in, “Tua bang ahi thei vawt sih ding leh ka sanggampa Amnon beh tawh ei zawhsah in, hing thum ing,” a ci hi. Kumpipa in ama kungah, “Ama bang dinga nang tawh hing pei ding ahei?” a ci hi.

²⁷ Ahi vangin Absalom in ama tawh Amnon le kumpipa’ tapa zosie a zawsah masangsie ha genin a gen hi. Absalom in kumpipa’ pawi tawh a kibang pawi khat a bawl hi.

²⁸ Tua ciengin Absalom in a nasemte thu pie a, “Amnon’ zu lungnop hun khu melci unlen, keima in na kung vuah, ‘Amnon sat un,’ kang ci ciengin ama that un. Zau sih un; kei mama-in thu hing pie zo hi lo ka mah? Kihangsah unlen, hangsan un,” a ci hi.

²⁹ Tuaci’n Absalom thupiehsa bangin a nasemte in Amnon a bawl uhi. Tua ciengin kumpipa’ tapa zosie dingin a laa tung ciet vuah tuongin a tai uhi.

³⁰ Amate lamkal a gei laitahun David kungah thu tung a, “Absalom in kumpipa’ tapate that sieng ta, koima khat beh kihen nawn sih,” kici hi.

³¹ Kumpipa dingin a puonte botkeh a, tuol sena’n a kinei pai hi; tuale ama kunga a ding a nasem zosie in a puon a botkeh uhi.

³² Ahi vangin David’ sanggampa Shimeah’ tapa Jonadab in, “Kumpipa’ tapa zosie that sieng ta uhi, ci-in ka pu in ngaisun sin; Amnon khat maimai si ahi bo hi. Amnon in a nau nu Tamar a pumbuon ni-a patin Absalom in tam thu a na vaihawmsa ahi ta bo hi.

³³ Tua ziehin tu-in kumpipa’ tapa zosie si sieng ta hi, ci-in ka pu in tam thu na lungsim sungah koi sin; azieh pen Amnon khat maimai si ahi bo hi,” a ci hi.

³⁴ Ahi vangin Absalom a taimang hi. Galvil tangvalpa a khuodah leh muolpang Horonaim lampi panin mi tampi a pei mu hi.

³⁵ Jonadab in kumpipa kungah, “En in, kumpipa’ tapate ang pei ta uhi; na nasemte gen bangin pieng tahpi hi,” a ci hi.

³⁶ A thugen a man zaw lienin kumpipa’ tapate tungin awngin a kap uhi; tuale Kumpipa le a nasem zosie zong nahpitahin a kap uhi.

³⁷ Ahi vangin Absalom taimang a, Geshur kumpipa Ammihud’ tapa Talmai kungah a pei hi. A tapa ziehin David ni khat zaw ni khat a kapkap hi.

³⁸ Geshur ah Absalom tai a, khum sungah kum thum sung a om hi.

³⁹ Kumpipa’ lungtang sungah Absalom kunga haw ding a hlagul hi; azieh pen tu-in Amnon sina tung tangah ama a kihlai zo ta hi.