2 Samuel 12 - Zo Bible

¹ tuale Topa in David kungah Nathan a sawl hi. Ama pei-in a kungah, “Khuopi khat sungah mi ni om a, khat hau-in a khat zawng hi.

² Mihaupa in tuuhon le bawnghon tampi nei hi;

³ ahi vangin a zawngpa in a leisa tuuno a nu khat losie bangma a nei sih hi. Ama in tua tuuno anva a, ama le a tate tawh a khangton hi; tua tuuno in ama’ an ne-in a hai panin dawn a, a kang sungah lumin ama adingin a tanu khat tawh a kibang hi.

⁴ Khatvei, mihaupa’ inn ah zin khat tung a, tuale ama in ama kunga tung zinpa neh dingin a tuuhon pan hile a bawnghon pan hile khat zong a gaw nuom sih a, mizawngpa’ neisun a tuuno lahpiehin ama kunga tung zinpa a gaw zawsop hi,” a ci hi.

⁵ Tua ciengin tua mipa tungah David a sinso mama hi. Ama in Nathan kungah, “Topa a hing ahi ma bangin tam banga a gamta mipa a si dingin kilawm hi;

⁶ ama in hepina nei loin tam bangin gamta ahi ziehin tua tuuno a za li-in a sangkia ding hi,” a ci hi.

⁷ Nathan in David kungah, “Tua mipa khu nang na hi hi! Israel Pasien, Topa in tam bangin a gen hi: Keima in Israel tungah kumpi-in nang sathau kang nu a, Saul’ khut sung panin kang hunkhie hi;

⁸ keima in na pu’ inn kang pie a, na pu’ zite na kang sungah a om hi. Israel innkuon le Judah innkuon zong nangma kang pie hi; tuale tam teng a tawm luo ahile tua sangin a tamzaw kang piehbe lai ding hi.

⁹ Ama muna-ah a sie gamta dingin bang dingin Topa thugen simmaw na hei? Namsau tawh Hit mi Uriah satlia-in na zi dingin ama’ zi na la a, Ammon-te’ namsau-in ama na that zo hi.

¹⁰ Nang in kei ei thusim loin na zi dingin Hit mi Uriah’ zi la zo na hi ziehin namsau in na inn a lawi ngai sih ding hi,” a ci hi.

¹¹ Topa in tam bangin a gen hi: Keima in na innkuon sung panin nangma langah buoina ka piengsah ding hi; tuale na muna-ah na zite la-in na vengpa ka pie ding a, tuale ama in suntang laipi-in na zite a luppi ding hi.

¹² Bangzieh ahei cile nang in na dapbawl ahi hi; ahi vangin keima in Israel zosie mai-ah suntang laipi-in ka bawl ding hi,’ ci hi,” a ci hi.

¹³ David in Nathan kungah, “Topa tungah ka maw zo hi,” a ci hi. Nathan in David kungah, “Tu-in Topa in na mawna la sieng zo hi; nang na si sih ding hi.

¹⁴ Hinanle tam bang gamtatna tawh Topa thusim lo na hi ziehin na sung pana ang pieng ding nausen si ding hi,” a ci hi.

¹⁵ Tua ciengin a inn ah Nathan a pei hi. Uriah’ zi in David tawh a nei nausen pen Topa in vatin nahpi-in a ci a na pai hi.

Bathsheba’ Nausen Si

¹⁶ Tua ahi ziehin nausen adingin Pasien kungah David in a thum hi; David in zong an tangin tuolpuongah a zan lup hi.

¹⁷ Ama pangah ama’ innsung upate a ding vua, tuolpuong panin a thawto nadingin ama a zawl uhi; ahi vangin ama thoto nuom loin amate tawh zong an ne nuom lo hi.

¹⁸ A ni sagi ni-in tua nausen a si hi. Tua nausen a si lam David’ nasemte in David a ko ngam sih uhi; azieh pen amate in, “Ama in nausen hinlai bawnin i hopi vangin i thugen ngai nuom lo hi; tua ahile ama kungah nausen si ta ci’n bang i ci gen thei ding ahei? Ama le ama ang kibawlsie kha thei ding hi,” a ci uhi.

¹⁹ Hinanle a nasemte’ kidap ho David in a mu ciengin nausen si hi, ci-in a thei ta hi; tuale David in a nasemte kungah, “Nausen a si ta amah?” a ci hi. Tuale amate in zong, “Ama si ta,” a ci uhi.

²⁰ Tua ciengin tuolpuong lah panin David tho-in kisil a, sathau kinu-in a puonte a khel hi. Topa’ inn sungah ama tumin Pasien bie hi; tua ciengin a inn ah ama a pei hi; tuale ama in an a nget ciengin amate in a mai-ah an a lui vua, tuale ama in a ne hi.

²¹ Tua ciengin a nasemte in ama kungah, “Tam banga na gamtat a bang bep ahei? Nausen a hin lai-in an tangin na kap hi; ahi vangin nausen a si bepin tho-in an na ne zawsop hi,” a ci uhi.

²² Ama in, “Nausen a hin lai-in an tangin ka kap hi; azieh pen keima in, ‘Nausen a hin nadingin Topa in ei lungsiet khah ding koi in thei ahei?’ ka ci hi.

²³ Hizongle tu-in ama si ta zuh a; bang dinga ken an ka tan tha ding ahei? Ama ka hingsah theikia ding amah? Ama kungah kei ka pei ding a, ahi vangin kei kungah ama ang kinuale ta sih ding hi,” a ci hi.

Solomon Suoh

²⁴ Tua ciengin David in a zi Bathsheba hlai a, a kungah pei-in a luppi hi; tuale ama in tapa khat nei a, tuale ama in a min Solomon hisah hi. Topa in ama it a,

²⁵ tuale kamsang Nathan tungtawnin thu a puoh hi; tuaci’n ama in Topa ziehin a min Jedidiah a phuoh hi.

Ammon-te Kinuoicip

²⁶ Tu-in Joab in Ammon-te’ Rabbah simin kumpi khuopi a la hi.

²⁷ Joab in David kungah kamtaite sawlin, “Rabbah ka sim zo hi; tua banah a khuopi tuikhuh zong ka la zo hi.

²⁸ Tua ciengin tu-in mi a omlai teng khawmtuo inlen, khuopi langah phuol satin khuopi la in; tua ahi sihle kei mama in tua khuopi ka la ding a, keima’ min a puo ding hi,” a ci hi.

²⁹ Tuaci’n David in mi zosie kaikhawmin Rabbah ah pei a, tua khuopi simin a la hi.

³⁰ Ama in Milcom lu tung panin a kumpi lukhu a lahpieh hi; tua lukhu kham talen khat gih a, a sungah suong manpha khat a om hi; tuale David’ kumpi lukhu tungah tua suong manpha kikoi hi. Ama in khuopi sunga van kinuasie tampitah zong a peipi hi.

³¹ Ama in a sunga om mite peipi-in sing-at ding, tuzumte le sia heite tawh na sem dingin koi a, tehlei khenna-ah amate na a semsah hi. Tua bangin ama in Ammon-te’ khuopi zosie tungah a bawl hi. Tua ciengin David le mi zosie Jerusalem ah a kilekia uhi.