2 Kumpite 9 - Zo Bible

Jehu Sathau A Kinuna

¹ Tua ciengin kamsang Elisha in kamsang honte lah panin khat hlanin ama kungah, “Na kawng gah inlen, tami sathau bung tawi-in Ramoth-gilead ah va haw ta’n.

² Na tun ciengin khumnah Nimshi’ tapa Jehoshaphat, a tapa Jehu sui in; a sungah lutin a guolte lahah kaikhie inlen, innkhan sungtawng khatah lutpi in.

³ Tua ciengin sathau um la-in a lu tungah sungsuh inlen, ‘Topa in tam bangin a gen hi: Israel tunga kumpi sem dingin sathau kang nu hi,’ ci hi,” va ci ta’n. Tua ciengin kot hong inlen tai in; khuomuong sin,” a ci hi.

⁴ Tuaci’n Ramoth-gilead ah kamsang tangvalpa a pei hi.

⁵ Galkap bute in kikupna a nei laitahun ama tung a, tuale ama in, “Galkap bupa aw, nang adingin thu khat kang puoh hi,” a ci hi. Jehu in, “Kote lahah koi pen gen a kinei na hei?” ci-in a dong hi. Galkap bupa, nang ang gen ka hi hi,” a ci hi.

⁶ Tuaci’n Jehu dingin inn sungah lut hi; tangvalpa in a lu tungah sathau sungin ama kungah, “Israel Pasien Topa in tam bangin gen hi: Keima in Topa’ mite ahi Israel tunga kumpi sem dingin nang sathau kang nu hi.

⁷ Jazebel tungah ka nasem kamsangte’ sisan le Topa nasem zosie’ sisan phu ka lah thei nadingin na pupa Ahab’ innkuon na satlia ding hi.

⁸ Azieh pen Ahab’ innkuon zosie a mangthai ding hi; keima in Israel sungah Ahab’ innkuon panin pasal poma, sal hile, sal lo hile ka sumaimang ding hi.

⁹ Nebat’ tapa Jeroboam’ innkuon le Ahijah’ tapa Baasha’ innkuon bangin Ahab innkuon ka bawl ding hi.

¹⁰ Jezreel gam sungah uite in Jezebel’ sa a ne ding vua, koima in ama vui lo ding hi,’ ci hi,” a ci hi. Tua ciengin kot hongin ama a taimang hi.

¹¹ A pu’ nasemte kungah Jehu a tunkia ciengin amate in a kungah, “Bangkim a hoi ma ahiei mah? Bang hing bawla tua mimaw pa na kunga hing haw ahiei?” a ci uhi. Ama in a kung vuah, “Tam mipa dan le a thugen bielbualte na thei uhi,” a ci hi.

¹² Amate in, “Mi zuou pa! Ko ei gen in!” a ci uhi. Tuaci’n ama in, “Topa in tam bangin a gen hi: ‘Israel tunga kumpi dingin keima in nang sathau kang nu hi,’ ei ci hi,” a ci hi.

¹³ Tua ciengin amate in zong mallangtahin a puonte uh suo-in kalei tungnung pen ah a pha uhi; tuale pengkul mutin, “Jehu, kumpi hi,” ci-in a tangtawh uhi.

Israel kumpi Joram Kithat

¹⁴ Tua ciengin Nimshi’ tapa Jehoshaphat, a tapa Jehu in Joram a sawmdap hi. Aram kumpi Hazael langpangin Ramoth-gilead ah Israel zosie tawh khuo cingin Joram a om hi;

¹⁵ ahi vangin Aram kumpipa Hazael tawh a kido lai-a Aram-te in a liemsahna liemma a kem dingin Jezreel- ah kumpi Joram kilekia zo hi.

¹⁶ Tua ciengin Jehu a sakol-leeng tungah tuongin a dam lo lupmun tung a ngah Joram opna Jezreel ah haw hi. Joram ve dingin Judah kumpi Ahaziah na tungsuh zo hi.

¹⁷ Jezreel ah galvil pa khat tausang tungah ding a, tuale ama in Jehu’ pawlte a tun laitah mu a, “Mi honkhat ka mu hi,” a ci hi. Joram in, “Sakol tung tuong mi khat la-in, amate dawn dingin sawl inlen, ‘Thu hoi ahiei mah?’ cisah in,” a ci hi.

¹⁸ Tuaci’n ama dawn dingin sakol tung tuong pa pei-in ama in, “Kumpipa in tam bangin gen hi, ‘Thu hoi-a hing haw na hi uh amah,’ ci hi,” a ci hi. Jehu in dawngkia a, “Thuhoi le nang bang kisai na hei? Ka nua ei zui in,” a ci hi. Tua galvil pa in thu zasahin, “Kamtai pa in amate kung pha napi ama ang kilekia ta sih hi,” a ci hi.

¹⁹ Tua ciengin ama in sakol tung tuong a nina pa sawlin a kung vuah pei a, “Kumpipa in tam bangin gen hi: ‘Thuhoi-a hing haw na hi uh amah?’ ci hi,” a ci hi. Jehu in dawng a, “Thuhoi le nang bang kisai na hei? Ka nua ei zui in,” a ci hi.

²⁰ Galvil pa in thu zasahkia a, “Ama in amate kung pha napi ama kilekia nawn lo hi. Nimshi’ tapa Jehu’ leeng hawl dan tawh kibang hi; azieh pen ama in mimaw bangin a hawl hi,” a ci hi.

²¹ Joram in, “Kithawi un,” a ci hi. Amate in a sakol leeng a guonpieh uhi. Tua ciengin Israel kumpi Joram le Judah kumpi Ahaziah, a sakol leeng tuoh vuah tuongin a dingkhie uhi; amate zong Jehu tawh kimu dingin a kuon vua, ama tawh Jezreel mi Naboth’ lo-ah a kimu uhi.

²² Joram in Jehu a mu ciengin, “Jehu, thuhoi-a hing haw na hiei mah?” a ci hi. Ama in dawng a, “Na nu Jezebel’ bum le aisanna le numei pahtatte a op laisie bang thuhoi om thei ding ahei,” a ci hi.

²³ Tua ciengin a sakol kamkai lehei-in Joram tai a, Ahaziah kungah, “Ahaziah, kumpi suon sawm!” a ci hi.

²⁴ Jehu in a tha nei za tawh a thalpi kuoi-in ama’ lungtang sontah pailet dingin Joram’ liengko kikal kap hi; tuale a sakol leeng sungah ama a tumsuh hi.

²⁵ Jehu in ama a hupa Bidkar kungah, “Domto inlen Jezreel-te Naboth’ neisa leitangah pai in; azieh pen a pa Ahab nua-ah nang le kei, kimai kimin i tuonton lai-in ama langpangin Topa in tami thuphuon a gen phawh in:

²⁶ “Zani-in Naboth’ sisan le a tapate’ sisan ka mu ziehin tami leitang tung tehteh-ah kang thuh ding hi, ci-in ka kiciem hi,’ Topa in ci hi. Tua ahi ziehin Topa’ thugen dung zui-in tu-in ama domto inlen, tua leitang tungah ama pai in,” a ci hi.

Judah Kumpi Ahaziah Kithat

²⁷ Judah kumpi Ahaziah in tua thu a mu ciengin Beth-haggan lamah a tai hi. Jehu in ama nuadel a, “Ama zong kap un!” a ci hi. Ibleam gei, Gur katona sontah sakol leeng tungah amate in ama a kap uhi. Tua ciengin Megiddo ah ama tai-in tua munah a si hi.

²⁸ A uliente in Jerusalem ah sakol leeng khat tawh ama a puo vua, David’ khuopi sunga ama’ hanah a pu a pate tawh a vuiton uhi.

²⁹ Ahab’ tapa Joram a kum sawm le khatna kumin Ahaziah in Judah tungah maan ding kipan hi.

Jezebel’ Sina

³⁰ Jezree ah Jehu a tun ciengin Jezebel in tam thu na za hi; tua nu in a mitte zutin a lu zem a, tawlet panin a khuodah hi.

³¹ Tunkot-ah Jehu a lut laitahin ama in, “Nang Zimri, na pu that pa, thu hoi-a hing haw na hiei mah?” na ci hi.

³² Ama in tawlet lam ento-in, “Kei lamah koi teng na om vuoi? Koi e?” a ci hi. Numeite a uh cilgesa pasal ni ahiei thum ahiei in ama a ensuh uhi.

³³ Ama in, “Tua nu hing sepsuh un,” a ci hi. Tuaci’n amate in tua nu a sepsuh uhi; ama’ sisan kimkhat kawm tung le sakolte tungah kithethang a, tuaci’n ama a tuoncil uhi.

³⁴ Tua ciengin ama sung tumin an ne-in tui a dawn hi; ama in, “A kisamsie numei enin va vuibawl ta un; azieh pen ama kumpipa’ tanu ahi hi,” a ci hi.

³⁵ Hinanle tua nu vui dinga a pei ciengun amate in a lugu, a kephang le a khutphang cite simlo bangma dang a mu nawn sih uhi.

³⁶ Amate kilekia-in Jehu kungah a gen ciengun ama in, “Tam pen a nasempa, Tishbe mi Elijah tung tawna Topa na gensa ahi hi: ‘Jezreel gam sungah uite in Jezebel’ sa a ne ding uhi;

³⁷ koima in, ‘Tami Jezebel ahi hi,’ a ci thei lo nadingin Jezreel gam sunga lolai-ah Jezebel’ luonghawm ehlei bang ding hi,” a ci hi.