2 Kumpite 8 - Zo Bible

Shunem Numei’ Leitang Kipiekia

¹ Tu-in Elisha in a tapa a hinkiasah numei kungah, “Tho-in na innkuon tawh pei inlen, na ten theina mun khat popo-ah teng in; azieh pen Topa in kielpi khat tunsah ding thupie zo a, gam sungah kum sagi sung kielpi tung ding hi,” a ci hi.

² Tuaci’n tua numei dingin Pasien’ mipa thugen bangin gamta hi; a innkuon tawh tua nu pei-in Philistia-te gamah kum sagi sung a teng hi.

³ Kum sagi a cin zaw, Philistia-te gam panin tua numei a kinuale ciengin, a inn le a leitang ngen dingin kumpipa kungah a pei hi.

⁴ Tua laitahin Pasien’ mipa nasem ahi Gehazi le kumpipa kiho a, “Elisha’ sepsa na lien zosie ei gen in,” a ci hi.

⁵ Elisha in a sisa mi a hinsah kiana thu kumpipa kungah a gen laitahin, a tapa a hinkiasah numei in a inn le a leitang ngen dingin kumpipa kungah a pei hi. Gehazi in, “Ka pu, kumpipa aw, tam sungah a numei om a, Elisha in a hinkiasah a tapa zong tam sungah om hi,” a ci hi.

⁶ Kumpipa in numei kungah tua thu a dawh ciengin ama in a gen hi. Tuaci’n kumpipa in tua nu adingin ulien khat koi a, “Leitang a nuasie ni-a patin tuhun dong lo pana a pieng phiengsie zosie tawh ama-a’ teng a unpi-in piekia in,” a ci hi.

Ben-hadad’ Sina

⁷ Kumpi Ben-hadad a cinat laitahin Damascus-ah Elisha a pei hi. Ama kungah, “Pasien’ mipa tam sungah ang pei hi,” ci-in a kigen ciengin

⁸ kumpipa in Hazael kungah, “Letsong khat kengin Pasien’ mipa dawn dingin va pei ta’n. Ama tungtawnin Topa tungah, ‘Tam natna panin ka damkia na diei,’ ci-in va dong ta’n,” a ci hi.

⁹ Tuaci’n ama dawn dingin Damascus-a pieng na hoi nam tuomtuom kalaoh sawmli puohkhop letsong kengin Hazael a kuon hi. Ama lutin ama mai-ah a din ciengin ama in, “Na tapa Aram Kumpipa Ben-hadad in nang kungah ei sawl a, “Tami natna panin ka damkia na diei,’ ci hi,” a ci hi

¹⁰ Elisha in, “Pei inlen ama kungah gen in, ‘Na damkia valon ding hi,’ va ci ta’n; hinanle ama a si valon nading thu Topa in kei kungah ei lah zo hi,” a ci hi.

¹¹ Ama a zalat dongin mit phe loin Elisha in Hazael a encien hi. Tua bepin Pasien’ mipa a kap hi.

¹² Hazael in, “Ka pu, bang dinga kap na hiei” ci-in dong hi. Ama in dawng a, “Azieh pen Israel mite tunga na bawl ding sietna ka thei hi; nang in a kulpite uh mei tawh na hal ding a, a tangvalte uh namsau tawh thatin, a naupangnote uh lei denna-in na nei ding hi, tuale naupaai lai numeite’ gil na kheipieh ding hi,” a ci hi.

¹³ Hazael in, “Ui bang bep lel na nasempa tami sil thupi bawl dingin bang ahi ahei?” a ci hi. Elisha in dawng a, “Aram tunga nang kumpi na hi nading thu Topa in kei kungah ei lah zo hi,” a ci hi.

¹⁴ Tua ciengin ama in Elisha nuasie-in ama kungah, “Elisha in bang ang gen ei?” a ci a pupa Ben-hadad kung a tung hi. Tuale ama in dawngin, “Ama in na damkia valon nading thu kei kungah ei gen hi,” a ci hi.

¹⁵ Hizongle a zing ciengin a netpha la-in tui sungah die a, kumpipa a si dongin ama in a mai-ah tua puon a zah hi. Tuale Hazael in ama’ za luo hi.

Judah ah Jehoram Maang

¹⁶ Israel kumpi Ahab’ tapa Joram a kum ngana kumin Judah Kumpi Jehoshaphat’ tapa Jehoram maan ding a kipan hi.

¹⁷ Kumpi a suo hunin kum sawmthum le ni pha a, ama in kum giet sung Jerusalem uh hi.

¹⁸ Ahab’ tanu ama’ zi ahi ziehin Ahab innkuonte’ gamtatsa bangin Israel kumpite’ lampi ma a zui hi. Topa’ mitmu-in a sie-in ama a gamta hi.

¹⁹ Hinanle ama in ama le a suonlehlahte tungah tawntung meivah khat pieh dingin kam ciem zo ahi ziehin a nasempa David ziehin Topa in Judah a susie nuom sih hi.

²⁰ Ama hun sungin Edom-te in Judah’ uhna a ledo vua, amau’ aituom kumpi khat koi uhi.

²¹ Tua ciengin Jehoram in a sakol leeng zosie tawh Zair-ah a galkai hi. Ama zanin kuon a, ama a imtawm Edom-te le sakol leeng bupate a busim hi; ahi vangin inn ah a galkapte a taimang uhi.

²² Tuaci’n tuni dongin Edom-te in Judah gam uhna a ledo uhi. Khum hun ma-in Libnah in zong a ledo hi.

²³ Tu-in Jehoram’ gamtatna a omlai teng le ama sep zosie, Judah Kumpite’ Khang Sutna Laibu sungah kigiel hi lo amah?

²⁴ Tuaci’n a pu a pate tawh Jehoram lumton a, David’ khuopi sungah kivui hi; a tapa Ahaziah in ama’ za luo hi.

Judah ah Ahaziah Maang

²⁵ Israel kumpi Ahab’ tapa Joram a kum sawm le nina kumin Judah kumpi Jehoram’ tapa Ahaziah maan ding a kipan hi.

²⁶ A maan a kipatin Ahaziah kum sawmni le ni pha hi; ama kum khat sung Jerusalem ah maang hi. Ama’ nu min Athaliah ahi a, Israel kumpi Omri’ tunu ahi hi.

²⁷ Ama Ahab’ innkuonte’ mahpa ahi ziehin Ahab’ innkuonte gamtat ma bangin Topa mitmu-in a sie-in gamta a, Ahab innkuonte’ lampi ma a zui hi.

²⁸ Ramoth-gilead ah Aram kumpipa Hazael sim dingin Ahab’ tapa Joram tawh Ahaziah a kuonton uhi. Tua tahah Aram-te in Joram a liemsah uhi.

²⁹ Rama ah Aram kumpipa Hazael tawh a kidona vuah Aram-te in ama a liemsahna uh liemmate kem dingin Jezreel ah kumpi Joram a kilekia hi. Jezreel ah Ahab’ tapa Joram a liem ziehin ama a ve dingin Judah kumpi Jehoram’ tapa Ahaziah a kuonsuh hi.