2 Kumpite 6 - Zo Bible

Heitang Tawh Kisai Na Lamdang

¹ Tu-in kamsang honte in Elisha kungah, “Na theisa bangin nangma’ khut nei-a ka opna mun uh kote adingin kuocih luo hi.

² Jordan-ah keima ei peisah inlen, tuanah singluong khat ciet puo-in ka ten nading uh mun khat ei bawlsah in,” a ci uhi. Ama in dawngin, “Tua bangin bawl un,” a ci hi.

³ Tua ciengin amate khat in, “Na nasemte tawh hing kuon in, kang thum hi,” a ci hi. Tuale ama in dawng a, “Hing kuon na vang,” a ci hi.

⁴ Tuaci’n a nasemte tawh ama a kuon hi. Jordan a tun ciengun sing a phua uhi.

⁵ Ahi vangin mi khat in singluong a phua laitahin tui sungah a heitang a kiehsuo hi; ama awngin, “Ehei, Ka pupa! Tami hei zong mi-a’ kikawm ahi bo’n,” a ci hi.

⁶ Tua ciengin Pasien’ mipa in, “Hei sunga kiesuh ahiei?” a ci hi. Ama in a kiehna mun ama kungah a hil ciengin ama in ciengkang khat sattanin tua sontahah sepin a heitang a lamtosah hi.

⁷ Ama in, “La to aw,” a ci hi. Tuaci’n ama in a khut tawh zamin tuami heitang a la hi.

Aram-te’ Busimna Kikhahtan

⁸ Khatvei Aram kumpipa le Israel a kido ciengun ama in a uliente kuppi hi. Ama in, “Khum mun khum munah ka giephuol ka sat ding hi,” a ci hi.

⁹ Ahi vangin Pasien’ mipa in Israel kumpipa kungah thu puoh a, “Aram-te ang peisuh ding ahi ziehin tami mun na nawh khah lo nadingun kidawm un,” a ci hi.

¹⁰ Israel kumpipa in Pasien’ mipa genna munah kam vaihlah hi. Amate a kigalgin thei nadingun khatvei nivei sanga a tamzaw thu hilkhol hi.

¹¹ Tami thu ziehin Aram kumpipa patau mama hi; ama in a uliente hlanin amate kungah, “Tu-in ei gen un, eite lahah Israel kumpipa lama a pang koi na hi vuoi?” a ci hi.

¹² Tua ciengin a uliente khat in, “Ka pu, kumpipa, koima pang sih. Israel gama om kamsang Elisha in Israel kumpipa kungah na lupna tunga na thugente a na gen sawn ahi bo hi,” a ci hi.

¹³ Ama in, “Va pei ta’nlen ama hei sunga om ahei va sui ta’n.; keima in mi sawlin ama ka mansah ding hi,” a ci hi. Ama kungah, “Dothan-ah ama om hi,” ci-in kigen hi.

¹⁴ Tuaci’n ama in tua munah sakolte le sakol leengte le galkap hon tampite sawl hi; zan lai-in amate pei-in tua khuopi a kui-im pai uhi.

¹⁵ Zingmawngin Pasien mipa’ nasem khat thobai-in a pei leh khuopi kimkot zosie-ah sakolte le sakol leengte tawh galkap honpi a om hi. A nasempa in, “Ehei, pu! Bang i ci ta diei?” a ci hi.

¹⁶ Ama in a dawngkia a, “Zau sin, bangzieh ahei cile amate tawh a omte sangin eite tawh a omte tamzaw hi,” a ci hi.

¹⁷ Tua ciengin Elisha in tam bangin thu ngen hi: “Topa aw, ama in khuo a mu thei nadingin a mit honpieh in, kang thum hi,” a ci hi. Tuaci’n Topa in nasempa’ mitte honpiehin ama in khuo a mu hi; Elisha’ kimvel zosie-a muol tungah sakolte le meikuong sakol leengte a dimin a om hi.

¹⁸ Ama do dingin Aram-te a kuonsuh uh ciengin Elisha in Topa kungah thu ngen a, “Tam mite mittawtna tawh vatmai in, kang thum hi,” a ci hi. Tuaci’n Elisha’ nget bangin ama in mittawtna tawh amate a vatmai hi.

¹⁹ Elisha in amate kungah, “Tam pen a lampi ahi sih a, tam zong a khuopi ahi sih hi; ei zui un, na sui uh mipa kungah kang peipi ding hi,” a ci hi. Tuale ama in Samaria ah amate a peipi hi.

²⁰ Samaria ah amate a lut behun Elisha in, “Topa aw, tam mite in khuo a mu thei nadingun amau’ mit honpieh in,” a ci hi. Topa in a mit uh honpieh a, Samaria khuo sunga a om lam uh a kithei uhi.

²¹ Israel kumpipa in amate a mu bepin Elisha kungah, “Ka pa, amate ka that diei?” a ci hi.

²² Ama in dawng a, “That sin! Na thasawm mite, na namsau le na thalpi tawh na mat ahi son amah? Amate in an ne-in tui a dawn thei nadingun amai vuah an le tui lui in; tuale a pu uh kungah amate peisah in,” a ci hi.

²³ Tuaci’n ama in ama adingin pawi lienpi khat bawlpieh hi; amate in an ne-in tui a dawn zaw ciengun a lampi vuah amate a peisah a, tuale a pupa kung zuonin a pei uhi. Tuale Israel gam sung a sim dingin Aram-te a kuon nawn sih uhi.

Ben-hadad in Samaria a Kui-imna

²⁴ Tua zaw hun khat ciengin Aram kumpipa Ben-hadad in a galkap zosie khawm hi; Samaria do ding le a kuikhum dingin ama a kuonto hi.

²⁵ Amate in a kuikhum den ziehun Samaria-ah kiel nasie mama a, laa lutang khat ngun shekel sawmgiet, gam kaisuon hai khat seli-suo-sekhat ngun shekel nga-in a kizua dongin kielpi a tung hi.

²⁶ Kulpi tungah Israel kumpipa a pei laitahin ama kungah numei khat kiko a, “Ei panpi ven, ka pu kumpipa!” a ci hi.

²⁷ Ama in, “Hi lo hi! Topa kipanpisah zaw in. Ke’n nang bang kang ci panpi thei kan ding ahei? Ancilna phuol pan ahi sihle lengga tui suhna pana kang panpi ding amah?” a ci hi.

²⁸ Ahi vangin kumpipa in tua nu dong a, “Na lungkhamna bang ahiei?” a ci hi. Ama in dawng a, “Tam numei in ka kungah, ‘Na tapa ei pie in; tuni-in ama i ne ding a, kei tapa zing ciengin i ne ding hi,’ ei ci hi.

²⁹ Tuaci’n ka tapa’ sa huonin ka ne uhi. A zing ciengin ama kungah, ‘Na tapa ei pie in, a sa i ne ding hi,’ ka ci hi. Hizongle tua nu in a tapa a na phuolmang ta hi,” a ci hi.

³⁰ Kumpipa in tua numei’ thugen a zah ciengin a puonte a ehkeh hi; ama khuopikul tunga a pei laitah ahi ziehin mite in a pumpi nei lamah la-ip puon a sil lam a mu uhi.

³¹ Ama in, “Tu ni-in Shaphat’ tapa Elisha’ lutang a liengko tunga a op sih tah ma leh Pasien in kei ei dawm sih hinlen, a nasie zaw-in ei bawl lai heh,” a ci hi.

³² Tuaci’n ama in ama mai-ah mi khat a sawl hi. Tu-in a inn sungah Elisha to a, ama tawh upate a to ton laitah ahi hi. Kamtaipa a tun masangin Elisha in upate kungah, “Tam mithat pa in ka lu tan dingin mi khat ang sawl lam na thei vuoi mah? Kamtai pa ang tun ciengin kot khah unlen, ama lang khatah kotpi tucip un. Ama nua-ah a pu’ ketot ging kiza hi lo amah?” a ci hi.

³³ Amate tawh a holim laitahin ama kungah kumpipa peisuh a, “Tami gimna Topa kung pan ahi hi! Bang dingin Topa sungah kinem na lai ding ka hei?” a ci hi.