2 Kumpite 4 - Zo Bible

Elisha le Meigongnu’ Sathau

¹ Tu-in Elisha kungah kamsang honte lahah mi khat’ zi kiko a, “Na nasem ka pasal si hi; tuale na nasempa in Topa a zatah lam na thei a, ahi vangin ka tapa nite sila dinga la dingin a leibatna pa ang kuon hi,” a ci hi.

² Elisha in tua nu kungah, “Nang adingin bang kang bawlpieh diei? Innah bang na nei ei, ei gen in?” a ci hi. Ama in dawng a, “Na nasemnu in inn ah sathau bung khat ci longal bangma zamtawng a nei sih hi,” a ci hi.

³ Ama in, “A pulamah pei-in na vengte zosie’ beel hawm teng va kawm ta’nlen hing tawm kawm vawt sin.

⁴ Tua ciengin sungtumin na tapate tawh kot kikhalu unlen, tam beel zosie sungah sung in; beel khat a dim sielin tuomkoi paipai in,” a ci hi.

⁵ Tuaci’n khum nu in ama nuasie-in a tapate tawh kot a kikhalu uhi; amate in tua nu kungah beelte a puohpuoh vua, tua nu in zong beel sungah na sungsung hi.

⁶ Beel teng a dim ciengin tua nu in a tapa kungah, “Beel dang khat ei pie in,” a ci hi. Ahi vangin a tapa in tua nu kungah, “Beel dang om nawn sih,” a ci hi. Tua bepin sathau a kang hi.

⁷ Tua nu pei-in Pasien’ mipa kungah gen a, tuale ama in, “Pei in, tua sathau zua inlen na leiba sang in. Tua hile na zahmawh teng tawh nangma le na tapate na hing thei ding uhi,” a ci hi.

Shunem Numeinu’ Tapa Kithosahkia

⁸ Ni khat Elisha in Shunem khuo nawhkha a, tua khuo sunga a teng a cithei numei khat in an ne dingin ama hlan hi. Tuaci’n ama in khum lam a nawh sielin khum sungah baangin an ne zel hi.

⁹ Tua nu in a pasal kungah, “En in, i lampi ang nawh zing tam mipa pen Pasien’ mi tahtah ahi lam ka thei hi.

¹⁰ Eite kunga ang tun sielin innkhum tungah ama’ gie nadingin kawm a nei innmeng khat bawlpiehin, tua sungah ama dingin lupna khat, sabuoi khat, topha khat le meivah khat koipieh vai,” a ci hi.

¹¹ Ni khat ama tua mun a tun ciengin innkhan tungah kato-in a lum hi.

¹² Ama in a nasempa Gehazi kungah, “Shunem numei hlan in,” a ci hi. Ama in tua numei a hlat ciengin ama mai-ah tua nu a ding hi.

¹³ Ama in tua mipa kungah, “Tua nu kungah gen in, ‘Ko adingin tam lunggimna zosie na thuoh hi. Nangma dingin bang kang bawlpieh diei? Kumpipa kungah ahi sihle galkapmangpa kungah nangma tangin thu khat popo ang kigenpieh ding na dei a om ei mah?’ ci in,” a ci hi. Tua nu in dawng a, “Keima’ mite lahah teng ka hi hi,” a ci hi.

¹⁴ Ama in, “Tua bang ahile ama dingin bang a kibawlpieh thei diei?” a ci hi. Gehazi in dawng a, “Thu khat beh om hi, ama in tapa nei loin a pasal lah vuoikawn zo hi,” a ci hi.

¹⁵ Ama in, “Tua nu hlan in,” a ci hi. Ama in tua numei a hlat zaw ciengin kotbieng ah tua nu a ding hi.

¹⁶ Ama in, “Khuovei tu bang hun ciengin tapa khat na tawi ding hi,” a ci hi. Tua nu in dawng a, “Hi lo hi, ka pu Pasien’ mipa aw; na nasemnu sol sin,” a ci hi.

¹⁷ Elisha in tua nu kungah a gensa bangin tua numei nau pai a, khuovei a hun a tun ciengin ama in tapa khat a nei hi.

¹⁸ A nausen a gol ciengin ni khat a pa kung anlate lahah a va haw ta hi.

¹⁹ Ama in a pa kungah, “Aw kadei, ka lutang na, ka lutang na!” a ci hi. A pa in a nasempa kungah, “A nu kungah va koi ta’n,” a ci hi.

²⁰ Ama in domin a nu kungah peipi hi; a nu’ phei tungah sunkim dongin to a, tuale ama a si hi.

²¹ Tua nu kato-in Pasien’ mipa’ lupna tungah a siel a, kot khalu-in a nuasie hi.

²² Tua ciengin tua nu in a pasal hlanin, “Mallang tahin Pasien’ mipa kungah va haw-in kang kile pai thei nadingin nasemte khat le laa khat ei puoh in,” a ci hi.

²³ Ama in, “Bang zieha tuni-a ama kunga haw ding na hei? Hladet ni lah hi lo, sabbath ni zong lah hi lo,” a ci hi. Tua nu in, “Hing hoi na va” a ci hi.

²⁴ Tua ciengin tua nu in laa phaw pha-in a nasempa kungah, “Gan kinawsah in; kang gen sih nah leh muon peisah sin,” a ci hi.

²⁵ Tuaci’n tua nu pei a, Carmel Muol tunga Pasien’ mipa kung a tung hi. Pasien’ mipa in tua nu a pei a mu ciengin a nasempa Gehazi kungah, “En in, khum tahah Shunem numei khat ang pei hi;

²⁶ tua nu dawn dingin thakhatin va tai ta’nlen ama kungah, ‘Na dam ei mah? Na pasal a dam ei mah? Naupang a dam ei mah?’ va ci ta’n,” a ci hi. Tua nu in dawng a, “Hoi gawp na,” a ci hi.

²⁷ Muol tunga Pasien’ mipa kung a tun ciengin tua nu in a keng a tupom pai hi. Gehazi in sawnthop dingin tua nu a nai hi. Ahi vangin Pasien’ mipa in, “Ama tua ci opsah lel in; azieh pen ama a lung kham seng zieh ahi bo hi. Topa in keima kungah a thu ei imin keima kungah ang genkha sih hi,” a ci hi.

²⁸ Tua ciengin tua nu in, “Ka pu kungah ta pasal kang ngen amah? Kei ei puikhiel sin, hing ci hi lo ka mah?” a ci hi.

²⁹ Ama in Gehazi kungah, “Na kawng gah inlen na khut sungah ka ciengkhut khunin pei ta’n. Mi khatpo tawh na kituo khah leh hopi sin len, mi khatpo in ang hopi le zong dawng sin; tuale naupang maitangah ka ciengkhut va nga ta’n,” a ci hi.

³⁰ Tua ciengin tua naupang’ nu in, “Topa a hing ahi ma bangin nang lo tawh ka pei sih ding hi,” a ci hi. Tuaci’n ama dingin tua nu a zui hi.

³¹ Gehazi na mapei-in tua naupang tungah a ciengkhut a ngah vangin awging hileh hinna lim hile bangma om lo hi. Ama dawn dingin a kilekia a, tuale ama kungah, “Naupang khanglo nai lo hi,” a ci hi.

³² Inn sungah Elisha a lut ciengin a lupna tungah a sisa-a a lum tua naupang a mu hi.

³³ Tuaci’n ama lut a, ama gel beh kot kikhalu-in Topa tungah thu a ngen uhi.

³⁴ Tua ciengin lupna tungah ama kato-in naupang tungah kingam a, naupang’ kam le ama’ kam tuo-in, a mit tungah ama’ mit omsah a, a khut tungah ama’ khut a omsah hi; ama tunga a zam phei laitahin naupang’ pum a lum hi.

³⁵ Ama kumsuh kia-in innkhan sungah pei kawikawi a, tua ciengin ama kato-in naupang tungah a zamkia leuleu hi; naupang in sagivei hahthi loin a mit tegel hah hi.

³⁶ Elisha in Gehazi hlanin, “Shunem numei hlan in,” a ci hi. Tuaci’n tua nu hlan hi. Tua nu a tun ciengin ama in, “Na tapa kilah in,” a ci hi.

³⁷ Tua nu pei-in a kephungah pua-in tuolah a kunsuh hi; tua ciengin ama in a tapa la-in a pei hi.

Elisha in Sabeel Siensuo

³⁸ Gilgal-ah Elisha a kilekia ciengin khum gam sungah kiel a tung hi. Ama mai-ah kamsang honte a to laitahun ama in a nasempa kungah, “Beelpi suong inlen kamsangte adingin me huon in,” a ci hi.

³⁹ Me sui dingin amate lahah khat gamlahah a pei hi; ama in gam-um gui khat mu-in a puontuol dimin tua gam umga loin kilekia a, tuate bang ahei ci thei lopi-in atnenin mebeel sungah bua hi.

⁴⁰ Amate in mite neh dingin an a thua uhi. Ahi vangin me a neh laitahun, “Pasien’ mipa aw, beel sungah si theina gu om!” ci-in a kiko uhi. Amate in an a ne thei ta sih uhi.

⁴¹ Ama in, “Tua ahile an themkhat hing la un,” a ci hi. Ama in beel sungah tua an pai a, “Mite neh dingin an lui-in nesah un,” a ci hi. Tuale beel sungah neh thei lo ding bangma a om nawn sih hi.

Elisha in Mihing Zakhat Anva

⁴² Baal-shalishah panin mi khat pei-in Pasien’ mipa kungah anpal anlum, mangbuham lum sawmni, le bupal vuitha a ip sungah guongin a peipi hi. Elisha in, “A neh dingun tam sunga mite pie un,” a ci hi.

⁴³ Ahi vangin a nasempa kungah, “Mi zakhat mai-ah tami bang ka ci lui thei ding ahei?” a ci hi. Tuaci’n ama in, “Mite pie inlen nesah in. Azieh pen Topa in tam bangin a gen hi: ‘Amate in ne-in themkhat val lai ding hi,’ ci hi,” cikia hi.

⁴⁴ Ama in a mai vuah tuate lui-in amate in a ne vua, Topa’ gensa bangin pawlkhat a val lai hi.