2 Kumpite 3 - Zo Bible

Jehoram in Israel Uh

¹ Judah kumpi Jehoshaphat’ kum sawm le gietna kumin Samaria sung Israel tungah Ahab’ tapa Jehoram in kumpi sem hi; ama kum sawm le ni sung a maang hi.

² A nu le a pa za-in ama a sie-a a gamtat lo vangin Topa muna-ah a sie-in a gamta hi, azieh pen ama in a pa na bawlsa Baal biehna song pen hemkhie tei sam hi.

³ Ahi vangin ama in Israel a mawsah Nebat’ tapa Jeroboam’ mawna ma pomlai hi; tua panin ama kikoicing lo hi.

Moab-te tawh Gal Kidona

⁴ Moab kumpipa Mesha pen tuu khawi pa ahi a, ama in kum sielin Israel kumpipa tungah tuuno tul zakhat le tuutang zakhat’ mul pie zel hi.

⁵ Ahi vangin Ahab a si ciengin Moab kumpipa in Israel kumpipa a ledo hi.

⁶ Tuaci’n khum hun laitahin Kumpi Jehoram in Samaria panin Israel mi zosie khawm hi.

⁷ Ama pei-in Judah Kumpi Jehoshaphat kungah, “Moab kumpipa in kei ei ledo zo hi; Moab sim dingin kei tawh nang kuon diei mah?” a ci hi. Ama in dawng a, “Kang kuon ding hi; nangma tawh kang omton a, ka mite nangma-a’ ahi a, ka sakolte zong nangma’ sakol ahi hi,” a ci hi.

⁸ Tua ciengin ama in, “Hei lamah i kuon diei?” ci-in dong hi. Jehoram in dawng a, “Edom senel gam zui-in i kuon ding hi,” a ci hi.

⁹ Tuaci’n Israel kumpipa, Judah kumpipa, le Edom kumpipa-te a kuon uhi; amate ni sagi sung a kuol pei zaw ciengun a galkapte ule a peipi uh a ganhingte adingin tui a om nawn sih hi.

¹⁰ Tua ciengin Israel kumpipa in, “Eh ka dei! Topa in ei kumpi thum teng Moab’ khut sunga pieh dinga ei na hlat ahi mawh vele,” a ci hi.

¹¹ Ahi vangin Jehoshaphat in, “Tam sungah Topa ei dawhpieh thei ding Topa’ kamsang khat beh a om sih amah?” a ci hi. Tua ciengin Israel kumpipa’ nasemte khat in, “Elijah’ khut tunga tuisung pa, Shaphat’ tapa Elisha tam sungah om hi,” ci-in a dawng hi.

¹² Jehoshaphat in, “Topa’ kammal in ama a ompi hi,” a ci hi. Tuaci’n ama kungah Israel kumpipa le Jehoshaphat le Edom kumpipa a hawsuh uhi.

¹³ Elisha in Israel kumpipa kungah, “Nang tawh bang kisai ka hei? Na pa’ kamsangte ahi sihle na nu’ kamsangte kungah kipei ta’n,” a ci hi. Ahi vangin Israel kumpipa in ama kungah, “Hi lo hi; Moab kumpipa’ khut sungah ko kumpi thum teng pieh dinga ei hlanpa khu Topa ahi hi,” a ci hi.

¹⁴ Elisha in, “A na ka seppieh Vanglien Topa a hing ahi ma bangin Judah kumpipa Jehoshaphat a thusim lo khat hi poma leng ka mit hemin zong kang en sih ding a, a mu-in zong kang mu sih ding hi.

¹⁵ Hinanle tumging tumsiem khat ei hlatpieh un,” a ci hi. Tua ciengin tumging siempa in a tumging a sai laitahin Topa’ vanglietna ama tungah a tung hi.

¹⁶ Ama in, “Topa in tam bangin a gen hi: Tami lui gawta pen tui ka dimsah ding hi,’ a ci hi.

¹⁷ Azieh pen Topa in tam bangin a gen hi: ‘Hui le guo na mu sih ding vua, ahi vangin nangma le na bawng honte le na gantate utawh na dawn dingin khum lui gawta pen tui ka dimsah ding hi,’ a ci hi.

¹⁸ Tam pen Topa muna-ah thuneu no khat ahi hi. Bang ding ahei cile ama in na khut sungah Moab-te zong ang pie ding hi.

¹⁹ Nangma in kulpi tawh a ki-im khuopi zosie le a kituomteel khuopi zosie na zo ding hi; singkung hoi zosie zong phua-in, tuinah zosie na kangsah ding a, leitang zosie suong tawh kidimsahin hawllei na suohsah ding hi,” a ci hi.

²⁰ A zing cieng zingmawng biehpieh hun pawl ciengin gamsung teng tui tawh a kidim masangin thakhatthu-in Edom lam panin tui luon a kipan hi.

²¹ Amate sim dingin kumpite kuonto zo ci thu Moab-te zosie in a zah ciengun a khang pen panin a vuoi pen dongin galvan sil thei zosie hlanin gamgi lamah a kikhawm uhi.

²² Zingmawng ciengin amate a thobai uleh nisa in tui tung khaw a, Moab-te in a galkhat lam vua om tui pen sisan bangin a sanin a mu uhi.

²³ Amate in, “Tami sisan ahi hi; kumpite khatlekhat kido-in khatlekhat kithat hi ngel ding hi. Tua ahi ciengin tu-in, Moab-te aw, van kinuasie teng va la ta vai!” a ci uhi.

²⁴ Ahi vangin amate Israel’ giephuol a tun ciengun Israel-te dingin a mai vua a tai Moab-te a busim uhi; Moab gam a lut kawmun amate in a bansim toto uhi.

²⁵ Amate in khuopite a thalpaih vua, suong in a khucip dongin lei hoina gam zosie tungah mi zosie in suong a sep uhi; amate in a tuinah teng uh khahcipin singkung hoi zosie a phua sieng uhi. Kir-hareseth behah suongtum kulpite om a, saili tawi teng in kui-imin a busim uhi.

²⁶ Gal in ama lam a naw lam Moab kumpipa in a thei ciengin Edom kumpipa sontah phukeh dingin namsau tawi mi za sagi tawh a kuon hi; ahi vangin amate in a phukeh zo sih uhi.

²⁷ Tua ciengin ama in ama’ zaluo ding a tapa kai-in kul tungah meihal biehna-in a pie hi. Israel-te tungah a lien mama lungthahna tungin ama kung panin amate nuakinin a gam vuah a kilekia uhi.