2 Kumpite 25 - Zo Bible

¹ Ama in a uh zaw a kum kuona, a hla sawmna, a ni sawm ni-in Jerusalem sim dingin Babylon kumpi Nebuchadnezzar a galkap zosie tawh kuonin a kui-im hi; amate in a kimvelah tua khuo kui-im nading panmun a bawl uhi.

² Tuaci’n kumpi Zedekiah a kum sawm le khatna kum dongin tua khuopi kikui-im hi.

³ A hla lina, a ni kuo ni-in tua khuopi sungah kielpi nasie ahi ziehin tua gam mite neh ding an om nawn lo hi.

⁴ Tua ciengin khuopi ki-imna kulbang mun khat a phetvang vua, khuopi kimvelah Chaldea-te a om vangun, kumpipa’ um gei-a kulbang gel kikalah zan lai-in a galkapte tawh kumpipa tai a, Arabah lam manaw-in a pei uhi.

⁵ Ahi vangin Chaldea galkapte in kumpipa delin Jericho zanglei-ah a pha uhi; a galkap zosie kithethangin ama a nuasie uhi.

⁶ Tua ciengin kumpipa manin ama tunga thukhen, Riblah-a Babylon kumpipa kungah a peipi uhi.

⁷ Zedekiah’ muna-ah a tapa thatin tua ciengin Zedekiah’ mit a kheipieh uhi; amate in ama kol bulin Babylon ah a peipi uhi.

⁸ A hla ngana, a ni sagi ni-in, Babylon kumpi Nebuchadnezzar a kum sawm le kuo cin kumin, Jerusalem ah Babylon kumpipa’ nasem, a cingte a uh galkap bupa Nebuzaradan a tung hi.

⁹ Ama in Topa’ biehinn, kumpipa’ inn, le Jerusalem khuo sunga inn zosie hal hi; ama in inn thupi zosie haltum hi.

¹⁰ A cingte a uh galkap bupa tawh a omton Chaldea galkap zosie in Jerusalem kimvela om kulbangte a satguoi uhi.

¹¹ A cingte a uh galkap bupa Nebuzaradan in khuopi sunga kinuasie a omlai teng le Babylon kumpipa lama a taite, mi honpi a omlai teng tawh salin a peipi hi.

¹² Ahi vangin a cingte a uh galkap bupa in lengga um bawl ding le lo kai dingin tua gammi a zawngpen pawlkhat a nuasie hi.

¹³ Chaldea-te in Topa’ biehinn sunga a om sumngo khuompite, Topa’ biehinn sunga a om tuikuong tunnate, le sumngo tuikuongpi tawguoi siengin Babylon-ah a sumngo a puo uhi.

¹⁴ Amate in beelte, kawbiate, taite te, gimnamtui halna kuongte, le biehbuh nasepna-a kizang sumngo vanzah zosie,

¹⁵ vutluonate le haite zong a la uhi.

¹⁶ Topa’ biehinn adingin Solomon in a bawl khuompi nite, tuikuongpi khat, a tunnate, sumngo tawh a kibawl tam bang vanzah zosie ahile a gihna te zawh ding hi lo hi.

¹⁷ Khuompi khat a sanna tong sawm le giet hi a, tua tungah sumngo khuomlu zepna khat a om hi; tua khuomlu zepna pen a sanna tong thum ahi hi; khuomlu zepna kimvelah a unpi-a sumngo tawh kibawl lenta banga kiphante le mang kawlsingte a om hi. Khuompi nina zong tua ma bangin lenta banga kiphan ahi hi.

¹⁸ A cing galkap bupa in siempu lien pa Seraiah, siempu a nina Zephaniah, le kotcing mi thum man hi;

¹⁹ khuopi panin galkapte a uh galkap bupa khat, le khuopi sunga om kumpipa’ thudawhpite mi nga man hi. Gamsung mite a khawm galkap mangpa’ thuvanpi pa zong man hi. Khuopi sunga a om gamsung mi sawmguh zong man hi.

²⁰ A cing galkap bupa Nebuzaradan in amate manin Riblah-a Babylon kumpipa kungah peipi hi.

²¹ Babylon kumpipa in amate sat a, Hamath gam sunga Riblah-ah that hi. Tuaci’n ama’ gam panin Judah salin kikai hi.

Judah Uhpi-in Gedaliah Kikoi

²² Judah gam sunga a omlai teng tunga uhpi dingin ama in Shaphan’ tapa Ahikam, a tapa Gedaliah se hi.

²³ Tu-in galkap bute zosie le a mite, Babylon kumpipa in uhpa dingin Gedaliah a sena thu a zah uh ciengin, amate zong a mite utawh Mizpah-a Gedaliah kungah a pei uhi. A minte uh pen Nethaniah’ tapa Ishmael, Kareah’ tapa Johanan, Netophah-te Tanhumeth’ tapa Seraiah, le Maacath-te Jaazaniah ahi uhi.

²⁴ Amate le a mite kungah Gedaliah kiciem a, “Chaldea uliente ziehin zau sih un. Gam sungah tengin, Babylon kumpipa’ na sem un. Tua hile no adingin thu a hoi ding hi,” a ci hi.

²⁵ Ahi vangin a hla sagina a cin ciengin kumpipa innkuon sung panin Elishama’ tapa Nethaniah, a tapa Ishmael mihing sawm tawh kuon a, Gedaliah le Judea-te le Mizpah-a ama tawh a omton Chaldea-te simin that hi.

²⁶ Tua ciengin a sang a ngiemin mi zosie le galkap bute kithawi-in Egypt ah a tai uhi; azieh pen amate in Chaldea-te a giing uhi.

Thong pan Jehoiachin Kihla

²⁷ Judah kumpi Jehoiachin a thongkieh zaw kum sawmthum le sagi a cin kum, hla sawm le hla nina, tua hla ni sawmni le ni sagi a cin ni, Babylon kumpipa Evil-merodach a maan kumin ama in a hepi ziehin thong panin Jehoiakhin hla hi.

²⁸ Ama in kamdam tawh ama hopi a, Babylon gama a ompi kumpi dangte’ topha sangin a sangzaw munah ama a tosah hi.

²⁹ Tuaci’n Jehoiachin in a thong puonte a sutdawh hi. Ama’ hin sungin ama in kumpipa’ mai-ah nisielin an ne-in tui a dawn hi.

³⁰ A hin sungin kumpipa in a zahtawm ding sih den a, nisielin ama tanh a pie den hi.