2 Kumpite 24 - Zo Bible

Galte in Judah Tuoncil

¹ Ama’ hun sungin Babylon kumpipa Nebuchadnezzar kuonto hi; Jehoiakim kum thum sung ama’ sila a suoh hi; tua ciengin Jehoiakim kiphinin ama a ledo hi.

² Topa in ama a langpang dingin Chaldea mihonte, Aram mihonte, Moab mihonte, le Ammon mihonte a sawl hi. Ama’ nasem kamsangte tungtawnin ama’ gen Topa’ kammal dung zui-in ama in Judah a langpang ding le a susie dingin amate a sawl hi.

³ A tahtahin Manasseh’ mawnate, a bawlsa mawnate zosie ziehin ama’ muna panin amate a khin thei nadingin Topa’ thupiehna tawh Judah tunga tam thute a tung ahi hi.

⁴ Tuale mawna nei lo mite’ sisan a luonsahnate zosie zieh zong ahi hi. Ama in mawna nei lo mite’ sisan tawh Jerusalem a kidimsah ziehin Topa in ama’ mawna maisah nuom lo hi.

⁵ Tu-in Jehoiakim’ sepna a omlai teng, le a bawl zosie, Judah Kumpite’ Khang Sutna Laibu sungah kigiel hi lo amah?

⁶ Tuaci’n a pu a pate tawh ama a lumton hi; tua ciengin a tapa Jehoiachin in ama’ za luo hi.

⁷ Babylon kumpipa in Egypt kumpipa-a’ ahi Egypt Lui panin Euphrates Gun dongin a unpi-in lahpieh zo ta ahi ziehin ama’ gam panin Egypt kumpipa a kuonkia nawn sih hi.

Jehoiachin’ Maanna le Saltanna

⁸ Jehoiachin maan ding a kipatin kum sawm le giet pha hi; ama hla thum sung Jerusalem ah maang hi. A nu’ min Nehushta ahi a, Jerusalem-te Elnathan’ tanu ahi hi.

⁹ A pu a pate gamtat bang lienin Topa muna-ah ama siet gamtat hi.

¹⁰ Tua hun laitahin Jerusalem-ah Babylon kumpi Nebuchadnezzar’ nasemte kuonto-in tua khuopi a kui-im uhi.

¹¹ A nasemte in a kui-im laitahin tua khuopi-ah Babylon kumpipa Nebuchadnezzar a tung hi.

¹² Judah kumpipa Jehoiachin in Babylon kumpipa tungah ama-a kipan a nu, a uliente, le kumpi inn sunga uliente a kipie uhi. Ama in a uh a kum gietna kumin Babylon kumpipa in ama salin a man hi.

Jerusalem Kilahna

¹³ Ama in Topa’ inn sunga gou zosie le kumpipa’ inn sunga goute puomang hi; tamte zosie Topa in a na genkholsa ahi ma bangin ama in Babylon kumpipa Solomon in a na bawlsa Topa’ biehinn sunga a om kham vanzah zosie a tawguoi sieng hi.

¹⁴ Ama in Jerusalem mi zosie, ulien zosie, galhang zosie, sala kiman mi tul sawm, khutsiem zosie le siakheng zosie, a gama mi zawng pente ci sim lo, koima hen nei loin a peipi hi.

¹⁵ Ama in Babylon ah Jehoiachin peipi hi; ama in Jerusalem panin Babylon ah kumpipa’ nu, kumpipa’ zite, a uliente, le gam upate galmatin peipi hi.

¹⁶ Babylon kumpipa in galsim thei ding galhang mite zosie, le mi thahat zosie a unpi-in tul sagi, le khutsiemte le siakhengte tulkhat, galmatin Babylon ah a peipi hi.

¹⁷ Babylon kumpipa in ama tanga kumpi-in Jehoachin’ gangpa Mattaniah koi a, ama’ min Zedekiah-in a khelpieh hi.

Judah ah Zedekiah Maang

¹⁸ Zedekiah maan ding a kipatin kum sawmni le khat pha hi; ama Jerusalem ah kum sawm le khat sung maang hi. A nu’ min Hamutal ahi a, Libnah-te Jeremiah’ tanu ahi hi.

¹⁹ Jehoiakim’ gamtat bang lienin Topa’ muna-ah ama a siet gamtat hi.

²⁰ A tahtahin, Jerusalem le Judah in Topa a lungthahsah ziehun ama kung panin amate a notmang hi. Zedekiah in Babylon kumpipa a ledo hi.