2 Kumpite 23 - Zo Bible

Josiah’ Puophatna

¹ Tua ciengin kumpipa in Judah le Jerusalem upa zosie ama kunga kikhawm dingin thu a pie hi.

² Topa’ biehinn-ah kumpipa peito a, ama tawh Judah mi zosie, Jerusalem-a teng zosie, siempute, kamsangte, le mi zosie, a neu a lien tawh a pei uhi; ama in Topa’ biehinn sunga a kimu thuciemna laibu sunga kigiel thu zosie amau’ zahin a sim hi.

³ Khuompi gei-ah kumpipa ding a, tam laibu sunga kigiel thuciemna kammalte a sep nading, a lungtang le a hinna zosie tawh Topa nua a zui nading, a thupiehnate, a thupiehte, le a thukhamte a zui nadingin ama in Topa mai-ah thuciemna khat a bawl hi. Tua thuciemna sungah mi zosie a kihal uhi.

⁴ Kumpipa in siempu lien pa Hilkiah, a nina siempute, le kot cingte in Topa’ biehinn sung panin Baal le Asherah dinga kibawl vanzah zosie, le vantung nate zosie bieh nadinga a kibawl zosie a peipi nadingun thu a pie hi; ama in Jerusalem pulam Kidron lolai-ah tuate halin Bethel ah a vutvamte a puo hi.

⁵ Ama in Judah khuopite le Jerusalem kimvela munsangte tungah biehna pie dinga kisesa milim siempute notmang a, Baal tung, ni tung, hlapi tung, aasi honpite tung, le vantung na zosie tunga siemthoi mite zong a notmang hi.

⁶ Topa’ biehinn sung panin ama in Asherah milim la-in Jerusalem pulam Kidron Lui-ah puo-in hal a, gawtvui-in mi nautangte’ han tungah a vuite the hi.

⁷ Ama in Asherah dinga numeite puon gatna mun Topa’ biehinn sunga pasal pahtatte’ inn a phelkhepieh hi.

⁸ Ama in Judah khuopite panin siempu zosie peipi a, Geba panin Beer-sheba dongin siempute in siemthoina-a a zah uh ahi munsangte a susie hi; ama in khuopi tunkot veilam, khuopi uhpa Joshua’ tunkot lutna muna om munsangte a phelmang hi.

⁹ Ahi vangin Jerusalem Topa’ maitam ah munsanga sem siempute a peito sih vua, hizongle a sanggamte lah vuah tol saw lo anlum a ne uhi.

¹⁰ Molech tungah a tanu hile, a tapa hile kithoina-in koima in a haltum thei lo nadingin Hinnom Kuom sunga om Topheth milim a buasah uhi.

¹¹ Ama in Topa’ biehinn lutna, numeite a uh cilgesa pasal Nathan-melech’ innkhan gei-a inntuolah Judah kumpite in ni tunga a ap uh sakolte a hemmang hi; tua ciengin ama in mei tawh ni sakol leengte a hal hi.

¹² Tua panin ama in Judah kumpite in a na bawlsa, Ahaz’ innkhan tungnung khumzanga om maitamte le Topa’ biehinn tuol nite sunga Manasseh in a na bawlsa maitamte pheldawhin satguoi a, a nengtawng teng Kidron Lui-ah pai hi.

¹³ Solomon in Sidon-te’ kidahhuoina ahi Astarte pasien-nu ading, le Moab-te’ kidahhuoina ahi Chemosh pasien ading , Ammon-te’ kidahhuoina ahi Milcom pasien adinga a lam, Jerusalem nisuona lam, Sietna Muol leitaw lama munsangte a susie hi.

¹⁴ Ama in biehna songte satkehin, khuom siengthote phuamang a, mihing gu in tua mun teng a tuomsah hi.

¹⁵ Tua tham loin ama in Israel a mawsah Nebat’ tapa Jeroboam in Bethel-a a na phusa munsang tunga maitam tawh a phelmang a, munsang haltumin a gawtvui hi; ama in khuom siengtho zong a haltum hi.

¹⁶ Josiah a kihei leh ama in muol tunga om hante mu hi; tuale ama in mi sawlin hante sung panin gute lasah a, Pasien’ mipa in a tangko Topa’ kammal dung zui-in ama in maitam tungah tuate halin a buasah hi.

¹⁷ Tua ciengin ama in, “Tua sunga ka mu phawna muolsuong bang ahiei?” a ci hi. Khuo mite in ama kungah, “Bethel-a maitam tungah na bawlsa tam thute a genkhol, Judah pana ang pei Pasien’ mipa’ han ahi hi,” a ci hi.

¹⁸ Ama in, “Ama khawlsah khinkhian un; koima in ama’ gute khin sih un,” a ci hi. Tuaci’n amate in Samaria pana a pei kamsangpa’ gu le ama’ gute a khuci omsah uhi.

¹⁹ Tham loin Josiah in Israel kumpite’ na bawlsa, Topa a lungthahsahna uh ahi Samaria khuopite sunga munsang biehbuhnote zosie a hemmang hi; ama in Bethel-a a na bawlsa bang lienin amate tungah a bawl hi.

²⁰ Ama in maitam tungah tua sunga om munsanga sem siempu zosie thatin amate tungah mihing gute a hal hi. Tua ciengin Jerusalem ah ama kilekia hi.

Peisan Pawi Kibawl

²¹ Kumpipa in mi zosie thu pie a, “Tam thuciemna laibu sunga a kigiel bangin Topa na Pasien uh kungah peisan pawi bawl un,” a ci hi.

²² Israel tunga thu a khen thukhente’ huna kipanin hitale Israel kumpite ahi sihle Judah kumpite’ hun sung zosie-ah hitale tam bang peisan pawi kibawl ngai lo hi.

²³ Ahi vangin Kumpi Josiah’ uh kum sawm le gietna kumin Jerusalem-a Topa kungah tami peisan pawi kibawl hi.

²⁴ Tua tham loin Topa’ biehinn sunga siempu Hilkiah in a mu laibu sunga kigiel thukham kammalte a kipsah thei nadingin Judah gam le Jerusalem-a om dawilawm neite, ai tawite, teraphim-te, inn dawite, le a kidahhuoi zosie a paimang hi.

²⁵ Ama’ mai-a Moses’ thukham dung zui-in a lungtang zosie, a hinna zosie, le a hatna zosie tawh Topa’ lamah a kihei ama tawh a kibang kumpi om lo a, ama’ nua-ah ama tawh a kibang kumpi khat beh khang nawn lo hi.

²⁶ Manasseh in ama a lungthahsahna zosie hangin Judah tungah a sin so-in a gim nei mama a lungthahna lienpi panin Topa kihei nai lo hi.

²⁷ Topa in, “Ka muna panin Israel ka hepdawh bangin Judah zong ka hemdawh ding hi; ka teelsa tami khuopi Jerusalem le, ‘Khum sungah ka min a om ding hi,’ ka cina biehinn ka nuol ding hi,” a ci hi.

Gal Sungah Josiah Si

²⁸ Tu-in Josiah’ gamtatna a omlaite, le a sep zosie, Judah Kumpite’ Khang Sutna Laibu sungah kigiel hi lo amah?

²⁹ Ama’ hun sungin Egypt kumpipa Pharaoh Neco, Euphrates gun-a Assyria kumpipa kunga haw dingin a kuonto hi. Ama tawh kimu dingin kumpi Josiah pei hi; ahi vangin Pharaoh Neco in Megiddo ah Josiah a mu ciengin a that hi.

³⁰ A nasemte in Megiddo panin Jerusalem ah ama’ luong puo-in ama’ hanah a vui uhi. Khum gam mite in Josiah’ tapa Jehoahaz la-in sathau a nu vua, a pa munah kumpi-in ama a koi uhi.

Jehoahaz’ Maanna le A Saltanna

³¹ Jehoahaz maan ding a kipatin kum sawmni le thum pha hi; hla thum sung ama Jerusalem ah maang hi. A nu’ min Hamutal ahi a, Libnah-te Jeremiah’ tanu ahi hi.

³² A pu a pate gamtatnasa bang lienin Topa’ muna-ah ama a siet gamtat hi.

³³ Ama in Jerusalem a uh thei lo nadingin Pharaoh Neco in Hamath gam sung Riblah khuo-ah ama khum a, gam sungah ngun talent zakhat le kham talent khat siehin kai hi.

³⁴ Pharaoh Neco in a pa Josiah munah Josiah’ tapa Eliakim kumpi-in koi a, tuale ama’ min Jehoiakim-in a khel hi. Ahi vangin ama in Jehoahaz a peipi hi; Egypt ah ama tungin khum sungah a si hi.

³⁵ Jehoiakim in Pharaoh tungah ngun le kham a pie a, ahi vangin Pharaoh’ ngetza sum a pieh zawh nadingin a gam sungah phiengsieh a dong hi. Pharaoh Neco tunga a pieh dingin amau’ neina tawh kizui-in ama in gam sung mite kung panin ngun le kham a dong hi.

Judah ah Jehoiakim Maang

³⁶ Jehoiakim maan ding a kipatin kum sawmni le nga pha hi; Jerusalem ah kum sawm le khat sung maang hi. A nu’ min Zebidah ahi a, Rumah-te Pedaiah’ tanu ahi hi.

³⁷ A pu a pate’ gamtat bang lienin Topa’ muna-ah ama a siet gamtat hi.