2 Kumpite 22 - Zo Bible

Judah ah Josiah Maang

¹ Josiah maan ding a kipatin kum giet pha hi; kum sawmthum le khat sung Jerusalem ah ama maang hi. Anu’ min Jedidah ahi a, Bozkath-te Adaiah’ tanu ahi hi.

² Topa muna-ah a manin gamta a, a pa David’ lampi zosie zui hi; zietlamah hile veilamah hile ama piel lo hi.

Hilkiah in Thukham Laibu Mu

³ Kumpi Josiah a kum sawm le gietna kumin, kumpipa in Topa’ biehinn ah a thuvanpi pa Meshullam’ tapa Azaliah, a tapa Shaphan sawl a,

⁴ “Siempu lien pa Hilkiah kungah peito inlen, kotcingte in mite kung pana a donsa uh Topa’ biehinn sunga kipeipi sum buppi a phaza ama simsah in;

⁵ tua sumte, Topa’ biehinn a vaan nasemte’ khut sungah piesah in. Topa’ biehinn sunga innphawte tungah tua sum amate piesah in.

⁶ Tuate pen khutsiemte, innlamte, leilesuong innlam siemte ahi uhi; tuate pen biehinn puo nadinga zah ding sing lei nading le suong taw nading ahi hi.

⁷ Hizongle thumanin a gamtat ziehun amate tung panin a khut sung vua ki-ap sum zahna sazien kingen lo ding hi,” a ci hi.

⁸ Siempu lien pa Hilkiah in thuvanpi pa Shaphan kungah, “Topa’ biehinn sungah thukham laibu ka mu hi,” a ci hi. Hilkiah in Shaphan tungah tua laibu a pieh ciengin ama in a sim hi.

⁹ Tua ciengin kumpipa kungah thuvanpi pa Shaphan pei-in thu zasah a, “Na nasemte in biehinn sunga om sumte Topa’ biehinn uhte khut sungah a pie zo ta uhi,” a ci hi.

¹⁰ Thuvanpi pa Shaphan in kumpipa thu zasah a, “Siempu Hilkiah in laibu khat ei pie zo hi,” a ci hi. Tua ciengin Shaphan in kumpipa mai-ah tua laibu a gingin a sim hi.

¹¹ Kumpipa in thukham laibu sunga thu kigente a zah ciengin a puonte a ehmal hi.

¹² Tua ciengin kumpipa in siempu Hilkiah, Shaphan’ tapa Ahikam, Micaiah’ tapa Achbor, thuvanpi pa Shaphan, le kumpipa’ nasem Asaiah thu pie a,

¹³ “Pei unlen, tami laibu sunga a kimu thute tawh kisai-in kei ading, mite ading, le Judah zosie adingin Topa kungah va dong ta un, bangzieh ahei cile i pu i pate in tami laibu sunga thute, eite tawh kisai-a a kigiel zosie tawh kizui-in a sep lo ziehun, eite tungah a kikuontaw Topa’ thangpaina lien hi,” a ci hi.

¹⁴ Tuaci’n Harhas’ tapa Tikvah, a tapa Shallum, puon kempa’ zi kamsangnu Huldah kungah siempu Hilkiah, Ahikam, Achbor, Shaphan, le Asaiah-te a pei uhi; amate in ama’ tenna Jerusalem-a Veng Nina-ah thu a dong uhi.

¹⁵ Ama in a kung vuah pholah a, “Israel Pasien, Topa in tam bangin a gen hi: Keima kunga ang sawl mipa kungah gen un.

¹⁶ Topa in tam bangin gen hi: Keima in tam mun le a sunga teng zosie tungah Judah kumpipa in laibu sunga a sim gimna zosie ka tungsah tahtah ding hi.

¹⁷ Bangzieh ahei cile amate in kei ei nuasie-in pasien dangte tungah biehna a pie vua, a khut utawh a silbawl zosie un kei ei lungthahsah ahi ziehin tam munah ka lungthahna so-in a veng nawn sih ding hi.

¹⁸ Ahi vangin Topa kunga thu dong dinga note ang sawl Judah kumpipa kungah tam bangin na gen ding uhi. Israel Pasien, Topa in tam bangin a gen hi: Na zahsa thute tawh kisai-in,

¹⁹ tami mun le a sunga teng mite tungah gamkhing le samsiet ahi nading uh ka thugen na zah ciengin na lungsim kisia-in Topa mai-ah nang mama neilutin, na puonte ehmalin ka mai-a na kaa ziehin keima in na thugen ka za ta hi, Topa in ci hi.

²⁰ Tua ahi ziehin na pu na pate utawh kang gawmton ding a, lungmuongtahin na han vuah kang kaikhawm ding hi; tami muna kang tunsah ding gimna zosie na mu kha sih ding uhi,” a ci hi. Amate in kumpipa kungah tua thu a puohkia uhi.