2 Kumpite 21 - Zo Bible

Judah ah Manasseh Maang

¹ Manasseh a maan ding a kipatin kum sawm le ni pha hi; ama kum sawmnga le nga sung Jerusalem ah maang hi. A nu’ min Hephzibah ahi hi.

² Israel mite mai-ah Topa in a na delmangsa a huothuoi minamte’ gamtatnate ama in zui-in, Topa’ muna-ah a sie-in a gamta hi.

³ Bangzieh ahei cile ama in a pa Hezekiah’ a na suhsietsa munsangte a lamphakia hi; Israel kumpipa Ahab’ bawlsa bangin ama in Baal adingin maitamte phutin khuom siengtho khat bawl a, vantung na zosie bie-in tuate’ na a sem hi.

⁴ Topa in, “Jerusalem-ah ka min ka koi ding hi,” a cinasa Topa’ biehinn sungah ama in maitamte a lam hi.

⁵ Ama in Topa’ biehinn tuol ni gel tungah vantung nate zosie adingin maitamte a lam hi.

⁶ Meihal biehna-in ama in a tapa pie a, mailam thugenkholna le khutlam etnate semin, dawilawm neite le bum tawite tawh kigop hi. Ama in Topa muna-ah sietna tampi semin ama a lungtang thahsah hi.

⁷ Topa in David le a tapa Solomon kungah, “Ama in Israel minam zosie sung panin ka teelkhiet tam biehinn sung le Jerusalem ah ka min ka koi zing ding hi, a cina biehinn sungah ama’ bawlsa Asherah milim a koi hi.

⁸ Amate in ka thupiehsa zosie dung zui le ka nasempa Moses in amate a thupiehsa thukham zosie tawh kizui-in limtaha a zui nah po uleh, keima in a pu a pate uh tunga ka piehsa gam panin Israel’ kengte ka vahvaihsah nawn sih ding hi,” a ci hi.

⁹ Ahi vangin amate in a ngai nuom sih uhi. Topa in Israel mite mai-a a thasa minamte’ gamtat sangin a sie zaw-in a gamtat nadingun Manasseh in amate a lelamin a pui hi.

¹⁰ Topa in a nasem a kamsangte tungtawnin thu gen a,

¹¹ “Judah Kumpipa Manasseh in tami a huothuoite a bawl ziehin, ama mai-a Amor-te’ gamtat sangin a siezaw-in gamta a, a milimte tawh Judah zong a mawsah hi;

¹² tua ahi ziehin Israel Pasien Topa in tam bangin gen hi: Jerusalem le Judah tungah tua thu a za kha tapo’ bil a vut ding sietna ka tungsah ding hi.

¹³ Mikhat in a khup a thalin kuong a nawt bangin keima in Jerusalem nawtin ka khuleh ding hi. Samaria adingin tena pikhau, le Ahab innkuon’ tena suongkhai ka hlung ding hi.

¹⁴ Keima in ka gouluo ding ahi a omlai teng paidawhin a galte uh khutah ka pie ding hi; tuaci’n amate pen galte’ kivana ahi ding vua, a gal zosie in a tomgam van a suoh ding uhi,

¹⁵ bangzieh ahei cile Egypt panin a pu a pate uh a peikhiet vua kipanin tuni dongin ka muna-ah a sie-in amate gamta-in kei ei lungthahsah uhi,” a ci hi.

¹⁶ Tua tham loin Topa muna-ah amate a siet gamtat nadingun ama in Judah mite a mawsah banah, Jerusalem mong khat panin mong khat dongah sisan a dim dongin Manasseh in maw nei lote’ sisan tampi luongsah hi.

¹⁷ Manasseh’ nasep a omlai teng, a silbawl zosie, le ama bawlsa a mawna, Judah Kumpite’ Khang Sutna Laibu sungah kigiel hi lo amah?

¹⁸ A pu a pate tawh Manasseh lumton a, tuale Uzza’ um sung, ama’ inn um sungah kivui hi. A tapa Amon in ama’ za luo hi.

Amon in Judah Uh

¹⁹ Amon maan ding a kipatin kum sawmni le ni pha a, kum ni sung Jerusalem ah maang hi. A nu’ min Meshullemeth hi a, Jotbah-te Haruz’ tanu ahi hi.

²⁰ A pa Manasseh’ gamtat dan bangin Topa muna-ah ama a sie-in a gamta hi.

²¹ Ama in a pa totsa lampi teng zui a, a pa in a na a seppieh milimte’ na ma semin tuate a bie hi,

²² ama in a pu a pate’ Pasien ahi Topa nuasie a, Topa’ lampi zui lo hi.

²³ Amon’ nasemte in ama a sawmdap vua, ama inn sungah kumpipa a that uhi.

²⁴ Ahi vangin gam mite in Kumpi Amon a sawmdap mi zosie thatin ama munah kumpi-in a tapa Josiah a koi uhi.

²⁵ Tu-in Amon’ bawlsa a gamtatna a omlaite Judah Kumpite’ Khang Sutna Laibu sungah kigiel hi lo amah?

²⁶ Uzza’ um sunga ama’ hanah ama kivui hi; tua ciengin a tapa Josiah in ama’ za luo hi.