2 Kumpite 20 - Zo Bible

Hezekiah’ Cinatna

¹ Khum hun lai-in Hezekiah a cina-in si dihtah hi. Amoz’ tapa Isaiah pei-in ama kungah, “Topa in tam bangin a gen hi: Na innkuon vai hawm in, azieh pen nang na si ding hi; na damkia nawn sih ding hi,” a ci hi.

² Tua ciengin Hezekiah kawm lam nga-in Topa kungah thu ngen hi:

³ “Topa aw, na mai-ah thuman le lungsim zosie tawh ka gamtatna, le na muna-ah a hoi ka sepzona thu tu-in ei phawh in, kang thum hi,” a ci hi. Hezekiah kaa citahin kap hi.

⁴ Isaiah in inntuol laita a kal masangin ama kungah Topa’ thu tung a,

⁵ “Kilekia inlen ka mite makaipa Hezekiah kungah gen in. Na pu David’ Pasien Topa in tam bangin gen hi: Keima in na thungetna ka za zo hi, na hlitui luongte ka mu zo hi; keima in kang damsah tahtah ding hi; a ni thum ni-in Topa’ biehinn ah na peito ding hi.

⁶ Keima in na khan kum sawm le kum nga kang belap ding hi. Assyria kumpipa khut sung panin nangma le tami khuopi ka hunkhie ding hi; keima’ zieh le ka nasempa David ziehin tami khuopi ka hu ding hi, ci hi,” a ci hi.

⁷ Tua ciengin Isaiah in, “Thei tawh a kibawl moh khat hing la un. Ama a damkia nadingin amate in tuate la-in a uilut nusah un,” a ci hi.

⁸ Hezekiah in Isaiah kungah, “Topa in keima ei damsah nading le a ni thum ni-a Topa’ biehinn-a ka peito nading a lim bang hi ding ahei?” a ci hi.

⁹ Isaiah in, “Topa in a ciemsa thu a bawl nadingin tami khu nang adingin Topa kung pan lim hi ding hi: Nihlim kal sawm a matawn zo hi; kal sawm nuatawn kia ding amah?” a ci hi.

¹⁰ Hezekiah in dawng a, “Nihlim kal sawm a matawn ding pen a ngaina ahi hi; tua nihlim kal sawm nuatawnsah kia zaw in,” a ci hi.

¹¹ Topa kungah Isaiah kiko a, ama in Ahaz’ ni-nai tungah a nitumsa a hlim kal sawm a lekaikia hi.

Babylon pan Palaite

¹² Tua hunin Babylon Kumpipa, Baladan’ tapa Merodach-baladan in laihlahte le letsong khat tawh Hezekiah kungah kamtaite a sawl hi, azieh pen ama in Hezekiah a ci na hi, ci-in a za hi.

¹³ Hezekiah in amate na muoh hi; ama in a goukholna inn zosie, ngun, kham, a gim namtuite, sathau mantamte, a galvante, a vankoina innte sunga om zosie amate a ensah hi; ama’ innsung hile ama’ gam sung zosie-a vante hile Hezekiah in amate a etsah lo khat beh a om sih hi.

¹⁴ Tua ciengin Kumpi Hezekiah kungah kamsang Isaiah haw-in ama kungah, “Tam mite in bang gen uh ahei? Hei pana hing pei-a nang kunga hing haw uh ahei?” a ci hi. Hezekiah in dawng a, “Amate pen Babylon gam, a gamlapi pana ang kipan ahi tabo uh hi,” a ci hi.

¹⁵ Ama in, “Amate in na inn sungah bang teng a mu vuoi?” a ci hi. Hezekiah in dawng a, “Ka inn sunga a om zosie a mu uhi; ka vankoina inn sungte panin amate ka etsah lo bangma a om sih hi,” a ci hi.

¹⁶ Tua ciengin Isaiah in Hezekiah kungah, “Topa’ thugen ngai in:

¹⁷ Na inn sunga van zosie, le tuni donga na pu na pate in a na kholsa van zosie Babylon ah a kipuohmang nading hun ang tung ding hi; bangma khat beh kihen lo ding hi, Topa in ci hi.

¹⁸ Nangma sunga a pieng na tapa te pawlkhat kikaimang ding hi; amate in Babylon kumpi’ kumpi inn sunga nasem dingin numei uh dingin cilgesa-in a om ding uhi,” a ci hi.

¹⁹ Tua ciengin Hezekiah in Isaiah kungah, “Na gensa Topa’ thugen khu a hoi hi,” a ci hi. Azieh pen ama in, “Kei hun sungin kilemna le bihna a om nah leh hoi lel hi lo amah?” ci-in a ngaisun hi.

Hezekiah’ Sina

²⁰ Hezekiah’ nasep a omlai teng, a vanglietna, le tuikhuh le tuilahna to-in khuopi sunga tui a tunsahna, Judah Kumpite’ Khang Sutna Laibu sungah kigiel hi lo amah?

²¹ A pu a pate tawh Hezekiah lumton a, a tapa Manasseh in ama’ za luo hi.