Biblia Todo Logo
Bìoball air-loidhne

- Sanasan -

2 Kumpite 2 - Zo Bible


Vantungah Elijah Kato

1 Topa in vantungah pumpei tawh Elijah a lahto kuonin Elijah le Elisha-te Gilgal panin inn lam zuonin lamkalah a om uhi.

2 Elijah in Elisha kungah, “Tanah na om in; bangzieh ahei cile Topa in Bethel cieng dong pha dingin kei ei sawl hi,” a ci hi. Ahi vangin Elisha in, “Topa hingin nangma zong a hing na hi ma bangin, nang kang nuasie sih ding hi,” a ci hi. Tuaci’n Bethel ah ama gel a peisuh uhi.

3 Elisha kungah Bethel-a om kamsang honkhat a pei vua, amate in, “Tuni-in nangma kung panin Topa in na pupa a lah ding lam na thei ei mah?” a ci uhi. Tuale ama in, “Hi hi, ka thei hi; dai dide un,” a ci hi.

4 Elijah in ama kungah, “Elisha, tanah na om in; azieh pen Topa in Jericho cieng dong pha dingin ei sawl hi,” a ci hi. Ahi vangin ama in, “Topa hingin nangma zong na hin ma bangin nang kang nuasie sih ding hi,” a ci hi. Tuaci’n ama gel Jericho-ah a zawhton uhi.

5 Jericho-a om kamsang honkhat in Elisha nai-in ama kungah, “Tuni-in Topa in nang kung pan na pupa a lah ding lam na thei ei mah?” a ci uhi. Ama in dawng a, “Hi hi, ka thei hi; dai dide un,” a ci hi.

6 Tua ciengin Elijah in ama kungah, “Tanah na om in; Topa in Jordan cieng dong pha dingin ei sawl hi,” a ci hi. Ahi vangin ama in, “ Topa hing a, nangma zong a hing na hi ma bangin nang kang nuasie sih ding hi,” a ci hi. Tuaci’n ama gel a zawhton suoh lai uhi.

7 Kamsang hon sawmngate in zong zui-in Jordan gei-ah a din laitahun ama gel tawh a kigamla deu-in kamsangte a ding uhi.

8 Tua ciengin Elijah in a puontuol ladawhin ziel a, tua tawh tui a sat hi; tuol gumgaw-ah ama gel a galkai masangsie langkhat tuohah tua tui a kikhenzah hi.

9 Ama gel a galkai zaw ciengun Elijah in Elisha kungah, “Nangma kung panin kei ei kilahto masangin nang adinga kang bawlpieh ding na dei ei gen in,” a ci hi. Elisha in, “Na hlagau tanh ni ei luosah in, hing thum ing,” a ci hi.

10 Ama in dawngkia a, “A hahsa na khat nang ngen hi; ahi vangin nang kung pana kei ei kilahto laitah nei mu leh na sil nget ang kipie ding hi; nei mu sih leh ang kipie lo ding hi” a ci hi.

11 Lam pei kawmin ama gel a holim laitahun mei leeng khat le mei sakolte in ama gel khenkhe-in pumpei tawh vanah Elijah a kato hi.

12 Elisha in a et kawmin awng a, “Ka pa, ka pa! Israel leengte le a sakol tung tuongte!” a ci hi. Ahi vangin ama kimu thei nawn loin ama in a puonsilte manin ehkehin phal ni a suo hi.


Elisha in Elijah’ Za Luo

13 Ama in Elijah kung pana a kiesuh puontuol tungin a kilekia a, Jordan pieu-ah a ding hi.

14 Ama in Elijah tung pana kie puontuol la-in tui sat a, “Elijah’ Pasien Topa hei sunga om ahiei?” a ci hi. Ama in tui a sat ciengin a lang khat tuohah tui kikhenin Elisha a galkai hi.

15 Jericho-a om kamsang honte in a gal mu ciengun, “Elisha tungah Elijah’ hlagau tu hi,” ci-in a tangko uhi. Ama tawh kimu dingin kuonin ama mai-ah a tuolkun uhi.

16 Amate in ama kungah, “Tu-in en in, na nasemte lahah mi thahat sawmnga i nei uhi; amate sawl inlen na pupa suisah in, kang thum hi,” a ci uhi. Topa’ hlagau in ama domto-in muoltung khat ahi sihle hawhguom khat a a khiehsuh dawh khat hi va,” a ci uhi. Ama in thuhkia a, “Hi lo hi, amate sawl sin,” a ci hi.

17 Hizongnanle amate in a maizum dongin a gengen ciengun ama in, “Amate sawl un,” a ci hi. Tuaci’n mihing sawmngate sawlin ni thum sung a sui vangun ama a mu zo sih uhi.

18 Amate a kilekia ciengun (Jericho ah ama a om hi) ama in amate kungah, “Na kung vuah, ‘Pei sih un,’ hing ci hi lo ka mah?” a ci hi.


Elisha in Nalamdangte Bawl

19 Tu-in khuopi sunga mite in Elisha kungah, “Ka pu in na mu bangin tami khuopi opna pen mun hoi ahi hi; ahi vangin a tuineh hoi loin leitangah bangma pieng lo hi,” a ci uhi.

20 Ama in, “Kuongkum a tha khat hing peipi unlen a sungah ci koi un,” a ci hi. Tuaci’n amate in zong ama kungah a peipi uhi.

21 Tua ciengin tuinah-ah ama pei-in a sungah ci sung a, “Topa in tam bangin a gen hi: Tami tui a hoi-in ka bawl zo hi; tu-a patin tami tui pan sina hile, nausietna hile pieng nawn lo ding hi,” a ci hi.

22 Tuaci’n Elisha’ thugen tawh kizui-in tuni dongin tua tui khu tui hoi a suoh hi.

23 Ama in khum mun panin Bethel a zuonto hi; lampi a peito laitahin khuopi pan naupang honkhat pei-in ama a zako vua, “Dawtol pa! peimang ta’n, dawtol pa! peimang ta’n,” a ci uhi.

24 Ama kinua hei-in amate a mu ciengin Topa’ min tawh amate a samsie hi. Tua ciengin gamlah panin vompi ni pei-in tua naupang sawmli le nite a ehmal sieng hi.

25 Ama khum mun panin Carmel ah a peisuoh a, tua ciengin Samaria ah a peikia hi.

Zo Bible © Bible Society of Myanmar, 2018.

Bible Society of Myanmar
Lean sinn:



Sanasan