2 Kumpite 18 - Zo Bible

Hezekiah in Judah Uh

¹ Israel kumpi, Elah’ tapa Hoshea a kum thumna kumin Judah kumpi, Ahaz’ tapa Hezekiah maan ding a kipan hi.

² Ama a maan ding a kipatin kum sawmni le nga pha a, Jerusalem ah kum sawmni le kuo sung maang hi. A nu’ min Abi ahi a, Zechariah’ tanu ahi hi.

³ A pu David bangin Topa muna-ah ama a manin gamta hi.

⁴ Ama in munsangte hemkhie-in biehna songte susie a, khuom siengtho a phuamang hi. Tua hun dongin Israel mite in tua tungah biehnate a pieh ziehun ama in Moses’ na bawlsa sumngo gulpi satguoi hi; tua pen Neshutan kici hi.

⁵ Ama in Israel Pasien, Topa muong hi; tuaci’n ama’ nua-a Judah kumpite zosie lahah hile ama mai-ate lahah hile ama bang koima khat beh om lo hi.

⁶ Azieh pen ama in Topa a tudet hi; ama’ nua a zuina panin ama kihem ngai loin Topa in Moses kunga a gen thupiehnate a zui hi.

⁷ Ama tawh Topa a om hi; a peina popo-ah ama lawcing hi. Ama in Assyria kumpipa ledo a, ama’ na a sem sih hi.

⁸ Ama in galvilna tausang panin kulpi nei khuopi dong, le Gaza le a gam sung cieng dongin Philistia-te a sim hi.

⁹ Israel kumpi, Elah’ tapa Hoshea a kum sagina kum ahi, kumpi Hezekiah a kum lina kumin Samaria sim dingin Assyria Kumpipa Shalmaneser kuonto-in imtawm a,

¹⁰ kum thum a cin ciengin Samaria kila hi. Israel kumpi Hoshea’ kum kuona kum ahi, Hezekiah’ kum guhna kumin Samaria kila hi.

¹¹ Assyria kumpipa in Assyria ah Israel-te puoh a, Halah gam sung, Habor gam, Gozan lui le Media khuopite sungah amate a tengsah hi,

¹² bangzieh ahei cile amate in Topa a Pasien uh’ thu mang loin, a thuciemna ahi Topa’ nasem Moses’ thupieh zosie palsat uhi; amate in thu ngai loin, thu zong a mang sih uhi.

Sennacherib In Judah Sim

¹³ Kumpi Hezekiah a kum sawm le lina kumin kulpi a nei Judah khuopite zosie a sim dingin Assyria kumpipa Sennacherib kuonto-in tua khuo teng a la hi.

¹⁴ Judah kumpi Hezekiah in Lachish-a Assyria kumpi kungah mi sawl a, “Ka gamta khiel ta hi; ka kung panin nuakia ta’n; nei nget popo kang pie ding hi,” a ci hi. Assyria kumpipa in Judah kumpipa Hezekiah kungah ngun talent zathum le kham talent sawmthum ngen hi.

¹⁵ Hezekiah in Topa’ biehinn sung le kumpipa’ goukholna-a om ngun zosie ama a pie hi.

¹⁶ Tua hunin Hezekiah in Topa’ biehinn kotte tung pan le Judah kumpipa Hezekiah in innkhuom tunga a zut khamte khawhin Assyria kumpipa tungah tua teng a pie hi.

¹⁷ Assyria kumpipa in Tartan-te, Rabsaris mite le Rabshakeh-te, galkap hon tampi tawh Lachish panin Jerusalem-a Kumpi Hezekiah kungah a sawl hi. Amate kuonto-in Jerusalem a tung uhi. Amate a tun ciengun amate pei-in Puonsawppa’ Lo zotna lampi-a om buol tungnung tuilahna gei-ah a ding uhi.

¹⁸ Kumpipa a hlat ciengun amate kungah kumpi inn uhpa Hilkiah’ tapa Eliakim, thuvanpi pa Shebna le thuciemte Asaph’ tapa Joah-te a pei uhi.

¹⁹ Rabshakeh in amate kungah, “Hezekiah kungah gen un: Kumpi thupi, Assyria kumpipa in tam bangin gen hi: Tam banga na kimuonna uh bang pen suong na hi uh ahei?

²⁰ Note in thu kigen maimai haw po galdo nadinga galsiemna le thahatna-in ngaisun na hi uh amah? Kei nei ledo nadingun a koi pen suong na hi uh ahei?

²¹ Tu-in note in a tunga a kingam poma’ khut a sun ding pumpeng kikuoitan kung khat tawh a kibang lel Egypt na suong uhi. Ama a suong mi zosie tungah Egypt kumpipa Pharaoh pen tua bang lel ahi hi.

²² Ahi vangin note in keima kungah, ‘Topa ka Pasien ka suong uhi,’ na ci uleh Hezekiah in a munsangte le a maitamte hepkhiet piehin Judah le Jerusalem kungah, “Jerusalem-a tami maitam mai-ah na bie ding uhi,” a ci pa pen ama hi lo amah?

²³ Tu-in hing pei un, ka pupa ahi Assyria kumpipa tawh kikhapna khat bawl un. No lam panin a tunga tuong ding mi na nga zo ding uleh sakol tulni kang pie ding hi.

²⁴ Egypt-te’ leengte le sakol tungtuongte muong na hi uleh ka pu’ nasemte lahah a neupen galkap bu khat zong bangci nan zo ding na hi uh ahei?

²⁵ Tua tham loin, Topa tawh loin tam mun simin a susie dinga ang kuonto ka hi amah? Topa in keima kungah, “Tami gam sim dingin kuonto inlen susie in,” ei ci hi.

²⁶ Tua ciengin Hilkiah’ tapa Eliakim, Shebnah, le Joah in Rabshakeh kungah, “Kang thum uhi, kote in Aram ham thei ka hi ziehun na nasemte Aram hamin ei hopi in. Kulpi tunga mite zahin Jew hamin ei hopi sin,” a ci uhi.

²⁷ Ahi vangin Rabshakeh in a kung vuah, “Ka pupa in na pupa uh kung le no kung beha tami thugen dingin ei sawl a, amau’ eh ma ne-in amau’ zun ma a dawn, note tawh siton dinga kul tunga omte kungah zong ei sawl tuom sih amah?” a ci hi.

²⁸ Tua ciengin Rabshakeh dingto-in a Jew hamin a gingin kiko a, “Kumpi lien, Assyria kumpipa’ thu za un!

²⁹ Kumpipa in tam bangin a gen hi: ‘Hezekiah kisolsah sih un, azieh pen ama in ka khut sung panin note ang hunkhie zo sih ding hi.

³⁰ Topa in eite ei hunkhie tahtah ding a, Assyria kumpipa’ khut sungah tami khuopi kipie lo ding hi, ci-a Hezekiah’ ang genna tawh Topa suong luo sih un,’ a ci hi.

^31-32 Hezekiah’ thu ngai sih un. Bangzieh ahei cile Assyria kumpipa in tam bangin a gen hi: ‘Keima kungah hing pei-in keima tawh noma’ leitang tawh kibang mun le gam, an le lengga pienna, moh le lengga um opna, olive thau le khuoizu pienna gamah si loin na hin zawh thei nading uh gamah kang tut masangin a koima po in noma’ lengga ciet kinehin noma’ theiga ciet ne a, noma’ tuinah ciet pan tui na kidawn ding uhi. Ama in na kung vuah, “Topa in note ang hunkhie ding hi,” ci-in Hezekiah in ang lekai ciengin a thu na mang sih un.

³³ Minamte’ pasien khatpo in Assyria kumpipa’ khut sung panin a gam hunkhie zo ngai amah?

³⁴ Hamath le Arpad’ pasien-te heita uh ahei? Shepharvaim, Hena, le Ivvah’ pasien-te lah? Amate in ka khut sung panin Samaria a hunkhie zo ngel vuoi mah?

³⁵ Topa in ka khut sung panin Jerusalem a hutkhiet nadingin gam zosie-a pasien-te lahah a koi pen in ka khut sung panin a gam uh hunkhie zo ngai ahei?’ ci hi,” a ci hi.

³⁶ Ahi vangin kumpipa in, “Koima in dawng sih un,” ci-in thu a pieh ziehin mite sip dide-in kam khat beh a dawngkia sih uhi.

³⁷ Tua ciengin kumpi inn uhpa, Hilkiah’ tapa Eliakim, thuvanpi pa Shebnah, le thuciemte pa Asaph’ tapa Joah-te a puon uh ehkehsa-in Hezekiah kungah a pei vua, Rabshakeh’ thu gen teng ama kungah a gen uhi.