2 Kumpite 17 - Zo Bible

Hoshea in Israel Uh

¹ Judah kumpi Ahaz’ a kum sawm le nina kumin Elah’ tapa Hoshea in Samaria panin Israel tungah maan ding a kipan a, ama kum kuo sung maang hi.

² Topa muna-ah ama siet gamtat a, hinanle ama mai-a Israel kumpite bang lo hi.

³ Ama sim dingin Assyria kumpipa Shalmaneser kuonto hi; Hoshea pen a khut nei mi suohin ama sieh le kaih a pie hi.

⁴ Ahi vangin Assyria kumpipa in Hoshea’ lebawlna mu hi; azieh pen ama in Egypt kumpi So kungah kamtaite sawlin kumsiela a pieh bangin sieh le kaihte a pie nawn sih hi. Tua ahi ziehin Assyria kumpipa in ama manin thong sungah a khum hi.

Assyria ah Israel Salin Kipuoh

⁵ Tua ciengin Assyria kumpipa in gam sung zosie simin Samaria dong ban hi; kum thum sung tua khuopi a kui-im hi.

⁶ Hoshea a kum kuona kumin Assyria kumpipa in Samaria la hi; ama in Israel-te, Assyria ah a peipi hi. Ama in Halah gam sung, Habor gam, Gozan gun le Medes khuopite sungah amate a koi hi.

⁷ Tami thu a pienna pen Egypt kumpi Pharaoh’ khut nei Egypt gam panin amate a peipi Topa a Pasien uh tungah Israel mite a maw zieh uh ahi hi. Amate in pasien dangte a bie vua,

⁸ Topa in Israel mite mai-a a delmang minamte’ ngaina le Israel kumpite in a na pat ngainate a zui zieh uh ahi hi.

⁹ Israel mite in a Topa a Pasien uh’ lang khatah a man lo thute a dapbawl uhi;

¹⁰ amate in muolsang zosie le a na dawng sing hlim nei zosie-ah amate dingin songte le khuom siengthote a phut uhi.

¹¹ Khum mun amate mai-a Topa in a na nawmang minamte’ bawl bangin amate in munsang zosie-ah biehnate a lui uhi. Amate in a hoi lo nate semin Topa lungthahsah uhi;

¹² Topa in amate kungah, “Note in tamte haw’ na na sem sih ding uhi,” a ci milimte’ na a sem uhi.

¹³ Hizongle Topa in kamsang zosie le thumu zosie tungtawnin Israel le Judah hilkhol a, “Na pu na pate uh ka thupiehsa thukhamte le ka nasem kamsangte tung tawna na kung vua thu kang puoh tawh kituohin na tatsietnate uh panin kihei-in ka thupiehnate le ka thukhamte zui un,” a ci hi.

¹⁴ Ahi vangin amate in a thu ngai loin, Topa a Pasien uh a um lo a pu a pate ma bangin a lungkhauh uhi.

¹⁵ Amate in ama’ thukhamte le a pu a pate tawh a bawlsa a thuciemna le amate tunga a pieh hilkholnate a thusim sih uhi. Amate in milim zuoute nuazui-in mizuou a suoh uhi; amate bangin gamta sih un ci-in Topa in a thupieh tawh kisai-in, amate in a kim a pam vua om minamte a zui uhi.

¹⁶ Amate in Topa a Pasien uh’ thupieh zosie nuolin amate dingin bawngno lim ni a kheng vua, khuom siengtho khat a bawl uhi; amate in vantunga na om zosie bie-in Baal’ na a sem uhi.

¹⁷ Amate in a tanute le a tapate kithoina-in mei ah a hal uhi; amate in aisanna le khutlam etnate a zang uhi; tuale Topa muna-ah amate siet gamtat ding kiphalin ama a lungthahsah uhi.

¹⁸ Tua ahi ziehin Israel tungah Topa lungthahin ama in ama’ muna panin amate a hemkhie hi; Judah minam khat beh ci simlo, koima dang om nawn lo hi.

¹⁹ Judah in Topa a Pasien uh’ thupiehnate zui loin Israel in a na bawltawm ngainate a zuipi hi.

²⁰ Topa in Israel’ suonlehlahte zosie a nuol hi; ama in amate dan pie a, ama kung panin a hawlkhiet masangin mi bulute’ khut sungah amate a pie hi.

²¹ Ama in David innkuon panin Israel a khenkhiet zaw ciengin amate in Nebat’ tapa Jeroboam kumpi-in a koi uhi. Jeroboam in Topa a zuina panin Israel notmangin mawna lienpi a bawlsah hi.

^22-23 Jeroboam in a na bawlsa mawna zosie Israel mite in a bawl uhi; a nasem kamsangte tungtawnin a genkholsa bangin a mu lona munah Topa in Israel a hepkhiet dongin tuate panin amate a kikoicing sih uhi. Tuaci’n tuni dongin a gam panun Assyria-ah salin Israel a om hi.

Assyria in Samaria ah Mi Tengsahkia

²⁴ Assyria kumpipa in Babylon, Cuthah, Avva, Hamath, le Sepharvaim panin mite peipi-in Israel mite tangin Samaria khuopite-ah amate a koi hi; amate in Samaria gam luo-in a khuopite-ah amate a teng uhi.

²⁵ Tua muna a ten cilun amate in Topa bie lo uhi. Tua ahi ziehin Topa in amate a that humpite amate lahah a sawl hi.

²⁶ Tuaci’n Assyria kumpipa kungah, “Nangma in puohin Samaria khuopite-a na koi minamte in khum gamte pasien’ thukham a thei sih uhi; tua ahi ziehin ama in humpite a lah vuah a sawl hi. Amate in tua gamte pasien’ thukham a thei lo ziehun humpite in amate that hi,” ci’n kigen hi.

²⁷ Tua ciengin Assyria kumpipa in thu pie a, “Khum sungah tua gam pana nang peipi uh siempute lahah khat puoh un; khum munah ama pei-in tengsah unlen, a gam sung pasien’ thukhamte amate hilsah un,” a ci hi.

²⁸ Tuaci’n Samaria pana a puoh uh siempute khat pei-in Bethel ah teng hi; ama in Topa bangci bieh ding ci thu amate kungah a hil hi.

²⁹ Ahi vangin minam zosie in a pasien ciet uh a kibawl vua, minam zosie in amau’ tenna khuopi sungah Samaria mite’ bawlsa munsangte-a biehbuhnote sungah tuate a koi uhi;

³⁰ Babylon mite in Succoth-benoth pasien, Cuth mite in Nergal pasien, Hamath mite in Ashima pasien;

³¹ Avva mite in Nibhaz le Tartak pasiente a bawl uhi; Sepharvaim-te in Sephavaim pasien-te ahi, Adrammelech le Anammelech biehna-in mei-ah a tate a haltum uhi.

³² Amate in Topa zong a bie vua, munsangte-a biehna siempu sem dingin a sung panun mi namkim se-in tuate in munsangte-a biehbuhnote-ah amate dingin biehpiehna a pie uhi.

³³ Tuaci’n amate in Topa a bie vua, a kipuohna gam mite’ tawndan zui-in a pasien-te uh’ na zong a semton uhi.

³⁴ Amate in tuni dongin nidanga a zah uh amau’ ngainate a zomsuoh lai uhi. Amate in Topa bie loin Topa in Israel ci-in a minvaw Jacob tate tunga a thupiehsa thukhamte, ngaina kipte, zui ding ngainate, le a thupiehte a zui sih uhi.

³⁵ Topa in amate tawh thuciemna khat bawl zo a, amate thupie in, “Note in pasien dangte bie loin, a mai vuah zong kun loin amau’ na zong na sem sih ding vua, amate kungah na kithoi sih ding uhi,

³⁶ ahi vangin Egypt gam panin a lien mama vanglietna le a kizah a banhat tawh note ang peipi Topa na bie zaw ding uhi, a mai-ah noma ma kunin ama tungah na kithoi ding uhi.

³⁷ Ama in note dinga a giel thukhamte, ngaina kipte, zui ding ngainate le thupiehnate zui dingin na ngaisun zing ding uhi. Note in pasien dangte na bie sih ding vua,

³⁸ note tawh ka bawlsa thuciemna na mangngil sih ding uhi. Note in pasien dangte na bie sih ding vua,

³⁹ Topa na Pasien uh na bie zaw ding uhi; ama in na gal zosie’ khut sung panin note ang hunkhie ding hi,” a ci hi.

⁴⁰ Hinanle amate in ngai loin nidanga a ngaina lui a zangsuoh uhi.

⁴¹ Tuaci’n tam minamte in Topa a bie vua, ahi vangin amau’ khentawm ahi milimte’ na zong a sem uhi; tuni dongin a pu a pate uh gamtat bangin a tate ule a tute uh a gamta lai uhi.