2 Kumpite 16 - Zo Bible

Ahaz in Judah Uh

¹ Remaliah’ tapa Pekah a kum sawm le sagina kumin Juda kumpi Jotham’ tapa Ahaz maan ding a kipan hi.

² A kumpi sep kipatin Ahaz kum sawmni pha a, ama kum sawm le guh sung Jerusalem ah maang hi. A pu David’ gamtatsa bangin a Pasien Topa muna-ah a dihin gamta lo a,

³ Israel kumpite’ lampi ma zuizaw hi. Topa in Israel mite mai-ah a na delgamsa ahi minamte na zah a huothuoi tawndante ama in zui-in a tapa nangawn kithoina-in mei tawh a hal hi.

⁴ Ama in muoltunga munsangte tung le sing hlim nei teng tungah kithoina bawlin biehnate pie hi.

⁵ Tua ciengin Jerusalem sim dingin Aram kumpi Rezin le Israel kumpi Remaliah’ tapa Pekah kuonto hi; amate in Ahaz a kui-im vua, ahi vangin a zo sih uhi.

⁶ Khum hun laitahin Edom kumpipa in Edom adingin Elath lakia a, tuale Elath panin Judea-te a notmang hi; tuale tuni donga a tenna uh Elath ah Edom-te a pei uhi.

⁷ Ahaz in Assyria kumpi Tiglath-pileser kungah kamtaite sawl a, “Keima na tapa le na nasempa ka hi hi. Hing kuonto inlen, keima ei sim Aram kumpipa le Israel kumpipa’ khut sung panin ei hunkhie in,” a ci hi.

⁸ Ahaz in Topa’ inn sung le kumpipa’ goukholna sunga a kimu ngun le khamte la a, Assyria kumpipa kungah letsongin a hlah hi.

⁹ Assyria kumpipa in ama’ thugen a ngai hi; Damascus sim dingin Assyria kumpipa kuonto-in tua khuo la-in Kir-ah a mite galmatin a puo hi; tua ciengin ama in Rezin that hi.

¹⁰ Assyria kumpi Tiglath-pileser tawh kimu dingin Damascus-ah kumpi Ahaz a haw ciengin Damacus-a om maitam a mu hi. Kumpi Ahaz in siempu Uriah kungah maitam lim, a kibawl dan a neng a tawnga a kibahpi khat a hlah hi.

¹¹ Siempu Uriah in maitam a bawl hi; Damascus panin Kumpi Ahaz in a hlah bang dan tawh kizui-in Kumpi Ahaz a tun masangin Damascus panin siempu Uriah in maitam na bawl hi.

¹² Damascus panin kumpipa a tun ciengin kumpipa in tua maitam a vel a, tua ciengin kumpipa in maitam lam nehin a tungah a kato hi.

¹³ Ama in a meihal biehna le an tawh biehna pie-in, ama in a dawn thei biehnate sung a, maitam tungah thunuom biehna sisan a the hi.

¹⁴ Ama in a maitam le Topa’ biehinn kikal panin Topa mai-a om sumngo maitam a ladawh a, tua pen leilu lama om ama’ maitam tungah a koi hi.

¹⁵ Kumpi Ahaz in siempu Uriah thupie a, “Gam sung mi zosie’ meihal biehna, an tawh biehna le a dawn thei biehna utawh maitam thupi pen tungah zingmawng meihal biehna, nitah an tawh biehna, kumpipa’ meihal biehna le a an tawh biehnate halton in; tua ciengin maitam tungah meihal biehna sisan zosie le biehpiehna sisan zosie the in; ahi vangin sumngo maitam pen keima’ thudawhna ding hi ding hi,” a ci hi.

¹⁶ Siempu Uriah in kumpi Ahaz’ thupieh zosie a bawl hi.

¹⁷ Tua ciengin Kumpi Ahaz in a ki-ngahna singte sattan a, tuale ama in tuate panin khutsilna kuong hemdawh hi; ama in a nei-a sumngo bawngtangte tung panin tui kuongpi hemdawh a, suongciel tungah koi hi.

¹⁸ Topa’ biehinn panin ama in kumpi inn sunga sabbath ni-a kumpipa zah dinga kibawl tungkhu a nei lampi le kumpipa lutna lampi pulam a hemdawh hi.

¹⁹ Ahaz nasep a omlai teng, Judah Kumpite’ Khang Sutna Laibu sungah kigiel hi lo amah?

²⁰ A pu a pate tawh Ahaz lumton a, David’ khuopi sungah a pu a pate tawh kivui hi. A tapa Hezekiah in ama’ za luo hi.