2 Kumpite 14 - Zo Bible

Amaziah in Judah Uh

¹ Israel kumpipa Jehoahaz’ tapa Jehoash a kum nina kumin, Judah kumpi, Joash’ tapa Amaziah maan ding a kipan hi.

² Ama maan ding a kipatin kum sawmni le nga pha a, Jerusalem ah kum sawmni le kuo sung maang hi. A nu’ min Jehoaddin hi a, Jerusalem-te ahi hi.

³ Topa muna-ah a dihin ama gamta a, hinanle a pu David bang zo lo hi; ama in a pa Joash’ bawlsa zosie a bawl hi.

⁴ Ahi vangin munsangte a kihemkhie tuom sih hi; munsangte-ah mite kithoi-in biehnate a pie veve lai uhi.

⁵ Ama’ khut sungah kumpi thuneina dettahin a nei behin a pa kumpipa a that a nasemte ama in that hi.

⁶ Ahi vangin Topa in a thupieh Moses thukham laibu sungah, “Tate’ ziehin pate kithat lo ding a, pate’ ziehin tate kithat lo ding hi; ahi vangin mi zosie amau’ mawna ziehin a si ding uhi,” ci-a a kigiel dung zui-in ama in mi thatte’ tate that lo hi.

⁷ Ama in Ci Kuom-ah Edom-te tul sawm thatin, Sela busimin a la hi; ama in a min dingin Jokthe-el phuo a, tuni dongin tua min kip peisuoh lai hi.

⁸ Tua ciengin Amaziah in Israel kumpi, Jehu’ tapa Jehoahaz, a tapa Kumpipa Jehoash kungah kamtaite sawl a, “Hing pei inlen khatlekhat kimaituo-in kitalsih vai,” a ci hi.

⁹ Israel kumpipa Jehoash in Judah kumpi Amaziah kungah kam vaihlahin, “Lebanon-a om thangling kung khat in Lebanon-a om taamtah kung khat kungah mi sawin, ‘’A zi dingin ka tapa tungah na tanu pie in,’ ci hi; ahi vangin ama gamsa khat a vasuoh ta a, tua thangling a tuoncil hi.

¹⁰ Nangma in Edom-te na zo tahpi a, tua in na lungsim a liensah gawp hi. Na minthanna tawh lungkim lel inlen inn ah om khinkhian in; bang dinga nangma le Judah’ pua nadingin buoina bawl ding na hei?” a ci hi.

¹¹ Ahi vangin Amaziah in a thu ngai lo hi. Tuaci’n Israel kumpipa Jehoash a kuonto hi; Judah-a’ ahi Beth-shemesh gal kidona sungah ama le Judah Kumpipa Amaziah khatlekhat kimaituo-in a kisi uhi.

¹² Israel in Judah zo hi; mi zosie a inn ciet vuah a taimang uhi.

¹³ Israel kumpipa Jehoash in Beth-shemesh ah Ahaziah’ tapa Joash, a tapa Judah kumpipa Amaziah man hi; ama in Jerusalem lam zuon a, Ephraim tunkot panin Innning Tunkot dong, Jerusalem kulpi tong zali sung satcim hi.

¹⁴ Ama in kumpipa’ inn sung goukholna sunga a om kham le ngun zosie le Topa’ biehinn sunga a kimu umlebeel zosie tomgamin, a mite zong a man hi; tua ciengin Samaria ah ama a peikia hi.

¹⁵ Tu-in Jehoash nasep le a gamtatna a omlai teng, a vanglietna le Judah Kumpipa Amaziah tawh a kidona, Israel Kumpite’ Khang Sutna Laibu sungah kigiel hi lo amah?

¹⁶ A pu a pate tawh Jehoash lumton a, Israel kumpite tawh Samaria ah kivui hi; tua ciengin a tapa Jeroboam in ama’ za luo hi.

¹⁷ Israel kumpipa, Jehoahaz’ tapa Jehoash a si zaw ciengin Judah kumpipa, Joash’ tapa Amaziah kum sawm le nga sung hing lai hi.

¹⁸ Tu-in Amaziah’ nasepna a omlai teng, Judah Kumpite’ Khang Sutna Laibu sungah kigiel hi lo amah?

¹⁹ Amate in Jerusalem-ah ama a sawmdap vua, ama Lachish ah a taimang hi. Ahi vangin Lachish ah a nuadel ding mi sawlin tua tahah ama a that uhi.

²⁰ Amate in sakol tawh ama a puo uhi; David’ khuopi Jerusalem ah a pu a pate tawh ama kivui hi.

²¹ Judah mi zosie in kum sawm le guh a pha Uzziah a la vua, a pa Amaziah’ za a luo dingin kumpi-in ama a bawl uhi.

²² A pu a pate tawh Kumpi Amaziah a lupton zaw ciengin Elath lampha kia-in Judah ngasah kia hi.

Israel ah Jeroboam Nina Maang

²³ Judah kumpipa Joash’ tapa Amaziah a kum sawm le ngana kumin, Israel kumpipa, Jehoash’ tapa Jeroboam Samaria ah maan ding kipan a, ama kum sawmli le khat sung maang hi.

²⁴ Topa muna-ah ama siet gamtat hi; Israel a mawsah Nebat’ tapa Jeroboam’ mawnate panin ama a kihem tuon sih hi.

²⁵ Ama in Gath-hepher pana kamsangpa Amittai’ tapa, ama’ nasem Jonah tungtawnin Topa Israel Pasien thugenna tawh kizui-in Israel gamgite, Lebo-hamath panin Arabah Tuipi dong ngakia hi.

²⁶ Bang ding ahei cile Israel’ thuohna nasie mama hi, ci-in Topa in mu hi; sal hile, sal lo hile a suohta koima om lo a, Israel panpi ding koima om lo hi.

²⁷ Hinanle vannei leitungah Topa in Israel’ min phietmang ding thu genkha lo a, tuaci’n ama in Jehoash’ tapa Jeroboam khut tawh amate hunkhie hi.

²⁸ Tu-in Jeroboam’ gamtatna a omlai teng, a sepsa zosie, a vanglietna, a galsimna le Judah in a na nei ngai Damascus le Hamath khuopite Israel dinga a ngakiana, Israel Kumpite’ Khang Sutna Laibu sungah kigiel hi lo amah?

²⁹ A pu a pate ahi Israel kumpite tawh Jeroboam lumton hi; a tapa Zechariah in ama’ za luo hi.