2 Kumpite 13 - Zo Bible

Jehoahaz in Israel Uh

¹ Judah kumpi Ahaziah’ tapa Joash a kum sawmni le thumna kumin Jehu’ tapa Jehoahaz in Samaria panin Israel ah maan kipan a, kum sawm le sagi sung a maang hi.

² Topa’ mitmu-in ama siet gamtat a, Israel a khielsah Nebat’ tapa Jeroboam’ mawnate a zui hi; tuate panin ama kihem lo hi.

³ Israel tungah Topa’ lungthahna kikuontaw a, tuaci’n ama in Aram kumpipa Hazael’ khut sungah amate pie den mielmuol a, tua ciengin Hazael’ tapa Benhadad’ khut sungah zong a pie den mielmuol hi.

⁴ Ahi vangin Jehoahaz in Topa kungah thum a, Topa in ama’ thumnate a ngai hi. Bangzieh ahei cile Aram kumpipa in Israel a kibawlsietna le Aram kumpipa in amate a bangci bawlsiet ahei ci ama in mu hi.

⁵ Tua ahi ziehin Aram-te’ khut sung panin a suotah thei nadingun Topa in Israel tungah hundampa khat a pie hi. Nidang lai bangin a inn vuah Israel mite a teng uhi.

⁶ Ahi vangin Israel a khielsah Jeroboam innkuon’ mawnate panin a kihem sih vua, tuate a zui zawsop uhi; khuom siengtho zong Samaria ah a omlai hi.

⁷ Tuaci’n Aram kumpipa in amate a susie a, ama in amate vutvai a suosah tah ziehin Jehoahaz kungah sakol galkap sawmnga sanga a tamzaw lo, sakol leeng sawm le lei galkap tul sawm bang beh a om tabo hi.

⁸ Tu-in Jehoahaz’ gamtatna a omlai teng, a sep zosie le a vangliatna, Israel Kumpite’ Khang Sutna Laibu sungah kigiel hi lo amah?

⁹ Tuaci’n a pu a pate tawh Jehoahaz lumton a, Samaria ah ama a vui uhi; tua ciengin a tapa Joash in ama’ za luo hi.

Israel ah Jehoash Maang

¹⁰ Judah kumpipa Joash a kum sawmthum le sagina kumin Jehoahaz’ tapa Jehoash in Samaria panin Israel ah maan ding a kipan hi; ama kum sawm le guh sung maang hi.

¹¹ Topa muna-ah ama a siet gamtat a, Israel a mawsah Nebat’ tapa Jeroboam’ mawna zosie panin a kihem sih hi; ama in tuate a zui zawsop hi.

¹² Tu-in Jehoash’ gamtatna a omlai teng, ama sep zosie le Judah kumpipa Amaziah a dona a thahatnate, Israel Kumpite’ Khang Sutna Laibu sungah kigiel hi lo amah?

¹³ Tuaci’n a pu a pate tawh Joash lumton a, ama’ kumpi topha tungah Jeroboam a to hi; Israel kumpite tawh Samaria ah Joash kivuiton hi.

Elisha’ Sina

¹⁴ Tu-in Elisha in a si nading natna a vei ciengin ama kungah Israel kumpi Joash hawsuhin a mai-ah kap a, “Ka pa, ka pa! Israel sakol leengte le a sakol tunga tuongte!” ci-in a kiko hi.

¹⁵ Elisha in ama kungah, “Thal khat le thaltangte hing la vawi,” a ci hi; tuaci’n ama in thal khat le a tangte a la hi.

¹⁶ Tua ciengin ama in Israel kumpipa kungah, “Thalpi kuoi in,” a ci hi; tuale ama in a kuoi hi. Elisha in kumpipa’ khut tungah a khut a ngam hi.

¹⁷ Tua ciengin ama in, “Na tawlet nisuona lamah hong vawi,” a ci hi’ tuale ama in a hong hi. Elisha in, “Na thal kap in,” a ci hi’ tuale ama in a kap hi. Tua ciengin ama in, “Topa’ guolzawna thaltang, Aram-te tunga guolzawna thaltang! Bangzieh ahei cile amate na tha sieng masangin Aphek ah Aram-te na do ding hi,” a ci hi;

¹⁸ Ama in, “Thaltangte lakia in,” ci hi; tuale ama in a lakia hi. Ama in Israel kumpipa kungah, “Tuate tawh lei lah sat in,” a ci hi; ama in thumvei satin a khawl hi.

¹⁹ Tua ciengin ama tungah Pasien’ mipa lungthah a, “Ngavei ahiei, guhvei ahiei khat na sat ding a kilawm ahi hi; tua hile amate na tha masangin Aram-te na satlia ding a, ahi vangin tu-in thumvei maimai na sat ding ahi ta bo hi,” a ci hi.

²⁰ Tuaci’n Elisha si a, amate in ama a vui uhi. Tu-in Moab mihonte in khumi kum khal hun sungin tua gam a sim zel uhi.

²¹ Mi khat a kivui laitahin misuomte honkhat kimu a, Elisha’ hankhuh-ah siluong a pai uhi; tua mipa in Elisha’ gute a tham lien leh ama hingkia-in a keng tawh a ding hi.

Aram Khuopite Israel in Lakia

²² Tu-in Aram kumpipa Hazael in Jehoahaz’ uh sung tungtawnin Israel a bawlsie hi.

²³ Hinanle Topa in amate khuotuo-in lainatna nei hi; Abraham, Isaac, le Jacob tawh a thuciemna ziehin amate lamah kinga hi; ama in amate susie loin tu dongin ama’ mai panin amate a notmang sih hi.

²⁴ Aram kumpipa Hazael a si ciengin a tapa Ben-hadad in ama’ za luo hi.

²⁵ Tua ciengin a pa Jehoahaz’ tung panin gal sungah Hazael in a lahsa khuopite Hazael’ tapa Ben-hadad tung panin Jehoahaz’ tapa Jehoash in lakia hi. Jehoash in Ben-hadad thumvei zo a, ama in Israel khuopite ngakia hi.