2 Kumpite 12 - Zo Bible

Biehinnpi Kipuopha

¹ Jehu’ kum sagina kumin Jehoash a maan ding kipan a, Jerusalem ah kum sawmli sung maang hi. Ama nu’ min pen Zibiah ahi a, Beer-sheba mi ahi hi.

² Siempu Jehoiada in ama thu a hil ziehin Jehoash in a uh sung tungtawn Topa muna-ah a dihin a gamta hi.

³ Hizongle munsangte a kipaimang tuom sih hi; mite in munsangte tungah biehpiehna le biehnate a pie lai veve uhi.

⁴ Jehoash in siempute kungah, “Topa’ biehinn sunga kipeipi a siengtho nate’ kitatna sum zosie, milip’ pieh dinga kise sum le nop thu-a Topa’ biehinn sunga kipeipi sumte,

⁵ huna pie khat ciet tung panin siempute in la uheh; tuale biehinn puo dinga poimaw a sahna poma uh puosah un,” a ci hi.

⁶ Ahi vangin kumpi Jehoash’ uh kum sawmni le thumna kum dongin siempute in tua biehinn a puo sih uhi.

⁷ Tua ahi ziehin kumpi Jehoash in siempu Jehoiada le siempu dangte hlanin a kung vuah, “Bang dinga biehinn na puo lo uh ahei? Tua ziehin tu-in huna piete tung panin sum la nawn sih unlen, biehinn puophat nadingin a sumte ap un,” a ci hi.

⁸ Tuaci’n siempute in mite tung panin sum la nawn loin biehinn zong puo nawn lo dingin a kithukim uhi.

⁹ Tua ciengin siempu Jehoiada in singkuong khat la-in a sin vut vang a, Topa’ biehinn sung lutna zietlam pang maitam tungah koi hi; kotkhah a cing siempute in tua singkuong sungah Topa’ biehinn sunga kipeipi sum zosie a koi uhi.

¹⁰ Singkuong sungah sum tampi om ci thu a thei ciengin kumpipa’ thuvanpi pa le siempu lien pa kuonto -in Topa’ biehinn sunga om sumte simin ip tawh a tun uhi.

¹¹ Topa’ biehinn nasem uhte’ khut sungah a tawitesa uh sumte a pie uhi; tua ciengin amate in Topa’ biehinn a van khutsiemte le inn lamte a guoi vua,

¹² Topa’ biehinn puo nading sing lei nading, suong taw nading, le biehinn puona khat popo-a zah dingin leilesuong innlam siemte le suongkhengte tungah tuate a pie uhi.

¹³ Ahi vangin Topa’ biehinn adingin ngun kuongte, taitete, kuongkumte, pengkulte, ahi sihle kham hile, ngun vanzah khat popo hile, Topa’ biehinn sunga kipeipi sumte panin kibawl lo hi.

¹⁴ Azieh pen Topa’ biehinn a puo nasemte tungah tua sumte kipie hi.

¹⁵ Amate a dihtat seng ziehin nasemte kunga a piehsawn ding vua a khut sung vua ki-ap sumte tung panin amate in sum zahna sazien a ngen sih uhi.

¹⁶ Amate in Topa’ inn ah khielna zieha biehna sumte le mawna zieha biehna sumte a peipi sih uhi; tuate pen siempute-a’ ahi hi.

¹⁷ Khum hunlai-in Aram kumpipa Hazael kuonto a, Gath simin a la hi. Ahi vangin Hazael in Jerusalem do dinga peito dingin a mai a ngat leh,

¹⁸ Judah Kumpi Jehoash in Jehoshaphat, Jehoram, le Ahaziah, ama’ pu le pate, le Judah kumpite in a apsa pieh dinga a kamciem uh letsong zosie le a kamciemsa letsongte le Topa’ inn sung le kumpipa gou kholna sunga a kimu kham zosie la-in Aram kumpipa Hazael kungah a puoh hi. Tua ciengin Jerusalem panin Hazael a peikhie hi.

Joash’ Sina

¹⁹ Tu-in Joash’ gamtatna a omlai teng le a sep zosie, Judah Kumpite’ Khang Sutna Laibu sungah kigiel hi lo amah?

²⁰ A nasemte dingkhie-in sawmdapna khat a gel vua, Silla zotsuhna lampi Millo inn sungah Joash a that uhi.

²¹ Ama a si nadinga a satlia pa khu a nasempa Shimeath’ tapa Jozacar le Shomer’ tapa Jehozabad ahi uhi. Amate in David’ khuopi sungah a pu a pate tawh ama a vui uhi; tua ciengin a tapa Amaziah in ama’ za luo hi.