2 Kumpite 11 - Zo Bible

Athaliah in Judah Uh

¹ Ahaziah’ nu Athaliah in a tanu a si lam a thei ciengin ama in kumpi innkuon zosie tha a sawm hi.

² Ahi vangin Ahaziah’ sanggamnu Kumpi Joram’ tanu Jehosheba in Ahaziah’ tapa Joash man a, tha dinga kikoi kumpipa’ tapate lah pan gumang hi; tua nu in lupna khan khatah ama le a cingnu koi hi. Tua bangin ama a kitha lo nadingin Athaliah’ mu loin tua nu in ama a phuoldap hi;

³ Athaliah gam sunga a maan laitahin tua nu tawh ama kum guh sung omin Topa’ biehinn sungah a kiphuol hi.

Jehoiada in Nausen Joash Sathau Nu

⁴ Hinanle a kum sagina kumin siempu Jehoiada in mi sawlin Topa’ biehinn sunga a kungah Car-te’ galkap bute le kumpi inncingte a hlansah hi. Ama in amate tawh thuciemna khat bawl a, Topa’ biehinn sungah amate a kiciemsah hi. Tua ciengin ama in a kung vuah kumpipa’ tapa lah hi.

⁵ Ama in amate thu pie a, “Na sep ding uh tami ahi hi: Sabbath ni-in nasep khawlin kumpipa’ inncing no sethum-suo-sekhat in

⁶ (Sur’ tunkotah adang sethum-suo-sekhat om a, a cing galkapte nualam tunkot ah adang sethum-suo-sekhat a om hi) kumpi inn na cing ding uhi;

⁷ tuale Sabbath ni-a na sep a lut no khen nite in Topa’ biehinnpi na cing ding uhi!

⁸ na khut sung vuah na hiem ciet utawh kumpipa na kimkot ding uhi; tuale a cing galkapte lam a neh popo kithat ding hi. Kumpipa’ sungtumna le a pusuona-ah ama tawh omton un,” a ci hi.

⁹ Galkap bute in siempu Jehoiada’ thupieh tawh kizui-in a bawl uhi; sabbath ni-a nasep lut dingte tawh Sabbath ni-a nasep khawl dingte peipi cietin siempu Jehoiada kungah a tung uhi.

¹⁰ Siempu pa in galkap bute tungah Topa’ biehinn sunga kumpi David’ teipite le lumte pie hi;

¹¹ mi zosie in a khut sung vuah a hiem ciet uh tawi-in biehinn kimvelah kumpipa cing dingin a ding uhi.

¹² Tua ciengin ama in kumpipa’ tapa peipi-in a lu tungah kumpi lukhu khusah a, tuaci’n thuciemna laibu ama a pie hi; amate in ama kumpi hi, ci-in a tangko uhi; a khut uh bengin, “Kumpipa dam sawt heh,” ci-in a kiko uhi.

Athaliah Sina

¹³ Athlaliah in a cingte le mite’ husa a zah ciengin Topa’ biehinn sunga mite kungah ama a pei hi;

¹⁴ tua nu a khuodah leh ngaina a om bangin biehna song gei-ah kumpipa dingin kumpipa gei-ah galkap bute le pengkul mutte a om vua, gammi zosie kipahin pengkul a mut uhi. Athaliah in a puon ehkehin, “Kumpi suon sawm! Kumpi suon sawm!” ci-in a kiko hi.

¹⁵ Tua ciengin siempu Jehoiada in galkapte a uh galkap bute thupie a, “Galkapte kikalah tua nu peipi unlen, ama’ nua a zui poma namsau tawh that un,” a ci hi. Bangzieh ahei cile siempu pa in, “Topa’ biehinn sungah ama that sih un,” a ci hi.

¹⁶ Tuaci’n amate in tua nu man uhi; kumpipa’ inn lutna Sakol Tunkot lamah ama nu pei a, tua munah ama nu kithat hi.

¹⁷ Amate Topa’ mi ahi nadingun Jehoiada in Topa le kumpipa le mite kikalah thuciemna khat bawl hi; kumpipa le mite kikalah zong a bawl hi.

¹⁸ Tua ciengin Baal biehinn sungah gam mi zosie pei-in a biehinn a phelmang uhi; amate in a maitamte le a milimte sukehin tua maitamte mai-ah Baal siempu Mattan a that uhi. Siempu pa in Topa’ biehinnah a cingte a koi hi.

¹⁹ Ama in galkap bute, Car-te, a cingte, le gam mi zosie, kaikhawm hi; tua ciengin Topa’ biehinn panin kumpipa zawpisuhin a cingte’ tunkot tawnin kumpipa’ inn a zuon uhi. Kumpite’ topha tungah ama a to hi.

²⁰ Tuaci’n gam mi zosie a kipah uhi; tuale kumpipa’ inn ah namsau tawh Athaliah a kitha zaw langsie khuopi sung a sip dide hi.

²¹ Jehoash a maan ding a kipatin ama kum sagi a pha hi.