2 Khangthute 35 - Zo Bible

Peisan Pawi Bawlna

¹ Josiah in Jerusalem ah Topa adingin peisan pawi a bawl hi; amate in a hla masa a ni sawm le lina ni-in peisan pawi tuuno a go uhi.

² Ama in siempute amau’ nasepna munah se a, Topa’ biehinn sunga nasepna-ah amate hanthawn hi.

³ Ama in Israel zosie thu a hil, Topa tunga a siengtho Levi-te kungah, “Israel kumpipa David’ tapa Solomon in a lam biehinn sungah a siengtho singkuong koi un. Na liengko tung vua na puoh ding uh a kisam nawn sih hi. Tu-in Topa na Pasien ule a mi Israel-te’ na sem un.

⁴ Na pu na pate uh’ innkuon sungah a khenkhenin na opna uh tawh kizui-in kithawi unlen, lai tawh kigiel Israel kumpi David’ lamlahnate le lai tawh a kigiel a tapa Solomon’ lamlahnate zui un.

⁵ Na mipi na tanaute uh a pupa innkuon sungah a pawlpawlin a kikhenna tawh kizui-in siengtho munah panmun la unlen, pupa’ innkuon khenkhat cietah Levi-te kihalsah kim un.

⁶ Peisan tuuno go-in noma ma kisiensuo unlen, Moses tunga Topa’ thugen tawh kizui-in a sem dingin na tanaute uh tangin kithawi un,” a ci hi.

⁷ Tua ciengin Josiah in a om mite zosie adingin peisan pawi biehna-in ganhon panin tuunote le keelnote tul sawmthum, le bawngtang tulthum a pie hi; tam teng pen kumpipa’ neisa pana kipie ahi hi.

⁸ Ama’ uliente in mite tung, siempute tung, le Levi-te tungah kiphaltahin a pie uhi.

⁹ Levi-te’ a uhpite, Conaniah, le a sanggamte Shemaiah le Nethanel, le Hashabiah, Jeiel le Jozabad-te in peisan pawi biehna-in Levi-te tungah tuuno le keelno tulnga, le bawngtang zanga a pie uhi.

¹⁰ Nasep nading a kithawi zaw ciengun, a mun vuah siempute a ding vua, tuale kumpipa’ thupieh tawh kizui-in amau’ khente sungah Levi-te a om uhi.

¹¹ Amate in peisan tuuno a go vua, tuale Levi-te in a vun a hawh laitahun siempute in amate tung pana a nga uh sisan a the uhi.

¹² Amate in Moses laibu sunga kigiel bangin, Topa tunga pieh dingin a pawlpawlin a pu pate uh’ innkuon sungah a kikhenna uh tawh kizui-in, amate tungah a hawm thei nadingun tua meihal biehnate a tuomkoi uhi.

¹³ Biehna ngaina kip tawh kizui-in amate in mei-ah peisan tuuno a hang uhi; tuale beelte, taubeelpi-te, le khangbeelte sungah a siengtho biehnate huonin mi zosie tungah tuate mallang tahin a puoh uhi.

¹⁴ Tua zaw ciengin amate in amau-a’ mama ding le siempute adingin a bawl uhi. Azieh pen Aaron’ suon siempute in meihal biehnate le a thau teng la-in zan dongin a kitahla uhi; tuaci’n Levi-te in amate ding le Aaron’ suon siempute adingin a bawl uhi.

¹⁵ David’ thupieh bangin Asaph’ suonte ahi lasate, Asaph, Heman, le kumpipa’ thumu pa Jeduthun-te a mun vuah a om uhi; amau’ mun cietah tunkot cingte a om vua, a tanau uh Levi-te in amate ading a bawlpieh ziehun amate in amau’ nasepna a nawngkaisah uh kul lo hi.

¹⁶ Tuaci’n Kumpi Josiah’ thupieh dung zui-in peisan pawi bawl ding le Topa’ maitam tungah meihal biehnate pieh nadingin Topa’ nasepna ding zosie khum ni-in a kithawi uhi.

¹⁷ Khum muna om Israel mite in khum hunin peisan pawi, le tol saw lo anlum pawi ni sagi sung a bawl uhi.

¹⁸ Kamsangpa Samuel hun lai-a kipanin Israel sungah tua bang peisan pawi kibawl ngai nai lo hi; Josiah, le siempute le Levi-te, le khumtaha a om Judah le Israel mi zosie, le Jerusalem-a teng mite in a bawl peisan pawi tawh a kibang, Israel kumpite koima in bawl ngai nai lo hi.

¹⁹ Josiah in a uh zaw kum sawm le gietna kumin tam peisan pawi kibawl hi.

Pharaoh Neco’ Zawna le Josiah’ Sina

²⁰ Tam teng zosiepi nuasang, Josiah in biehinnpi a ngai a bahsah zaw ciengin, Euphrates gun gei Carchemish ah gal sim dingin Egypt kumpi Neco kuonto a, tuale ama do dingin Josiah a kuon hi.

²¹ Ahi vangin Neco in palai sawl a, “Judah kumpipa aw, kei le nang bang kisai i hei? Tuni-in nang sim dinga ang kuon ka hi sih a, ka galte’ innkuon a sim dinga ang kuon ka hibo hi. Ka kinaw nadingin Pasien in keima thu ei pie zo hi. Ama in nang ang suhsiet lo nadingin keima kunga a om Pasien na langpanna khawl in,” cisah hi.

²² Ahi vangin ama kung panin Josiah a kilekia nuom sih a, hizongle ama tawh a kido thei nadingin a mel a sel hi. Ama in Neco’ kam sung panin Pasien’ thugente a ngai sih a, Megiddo zanglei-a gal kidona-ah ama na pang hi.

²³ Thaltawite in Kumpi Josiah a kap uhi; tuale kumpipa in a nasemte kungah, “Nah liem seng ta ka hi ziehin ei puomang dawh ta un,” a ci hi.

²⁴ Tuaci’n leeng tung panin a nasemte in ama ladawhin a leeng nina tungah puo-in Jerusalem a tut uhi. Khum munah ama si a, a pu a pate’ hanah kivui hi. Judah le Jerusalem khuomi zosie in ama a kaa uhi.

²⁵ Jeremiah in zong Josiah adingin kaa-teng a lo hi. Tuale numei lasate le pasal lasa zosie in tuni dongin kaa-tengin Josiah’ min a lo uhi. Amate in Israel sungah tam thute ngaina-in a bawl uhi; kaa-la sungah tuate kikhum hi.

²⁶ Tu-in Josiah’ gamtatna a omlaite, le Topa’ thukham sunga a kigiel bangin a nasep hoite,

²⁷ le a gamtatna, a masa le a nukhia-te, Israel le Judah Kumpite’ Tangthu Laibu sungah kigiel hi.