2 Khangthute 34 - Zo Bible

Josiah’ Uhna

¹ Josiah maan ding a kipatin kum giet pha hi; ama Jerusalem ah kum sawmthum le khat sung maang hi.

² Topa muna-ah ama a manin gamta hi; ama in a pu David’ gamtat teng zui-in ziet le vei-ah piel lo hi.

³ Ama’ uh a kum gietna, naupangno ahi lai-in ama in a pu David’ Pasien sui ding a kipan hi. Kum sawm le nina kumin ama in Judah le Jerusalem panin munsangte, khuom siengthote, le a kikheng le a kisung milimte suhmang ding a kipan hi.

⁴ Amate in ama muna-ah Baal-te’ maitamte a sawnpua uhi; ama in tuate tunga a om gimnamtui maitamte phelmang a, khuom siengthote, le a kikheng le a kisung milimte satkehin a gawivui hi; ama in tuate tunga kithoi mite’ han tungah a vuite a the hi.

⁵ Ama in a maitamte uh tunga siempute’ gute zong hal a, Judah le Jerusalem a siensuo hi.

⁶ Manasseh, Ephraim, le Simeon khuopite sung le Naphtali khuopi cieng dong, le tua teng zosie’ kimvela a siesate dongin,

⁷ maitamte satkehin khuom siengthote satguoi a, Israel gam sung zosie-ah gimnamtui maitamte a satcim hi. Tua ciengin Jerusalem ah ama a kilekia hi.

Thukham Laibu Kimukia

⁸ Ama a maan a kum sawm le gietna kumin gam sung teng le biehinn a siensuo zaw ciengin, Topa a Pasien’ biehinn a puopha dingin ama in Azariah’ tapa Shaphan, le khuopi uhpa Maaseiah, le thuciemte pa Joahaz’ tapa Joah a sawl hi.

⁹ Siempu lien pa Hilkiah kungah amate a pei vua, kotcing Levi-te in Manasseh, Ephraim, Israel a omlai teng, Judah le Benjamin zosie, le Jerusalem-a tengte kung pana a don uh Pasien’ biehinn sunga a kitawi sumte a pie uhi.

¹⁰ Amate in Topa’ biehinn a van nasemte tungah tua sumte a pie uhi. Topa’ biehinn a van nasemte in biehinn puo nading le biehinn a ngai bahsahkia nadingin a pie uhi.

¹¹ A kito suongte lei nading, le kumpite suhsiet inn kisiete kil nading singte le inn lamna a zah ding innkamte lei nadingin khutsiemte le innlamte tungah a sumte a pie uhi.

¹² Mite in muonhuoi tahin na a sem uhi. Amate a van dingin Levi-te Merari suonte sung panin Jahath le Obadiah, le Kohath’ suonte sung panin Zechariah le Meshullam-te kikoi hi. Tumgingte tawh lasah siem adang Levi-te in

¹³ vangih puote le nasep namcin a semte zosie a makai uhi; tuale Levi-te pawlkhat pen laigielte, uliente le kotcingte ahi uhi.

¹⁴ Amate in Topa’ biehinn sunga a kipuohsa sumte a lah laitahun siempu Hilkiah in Moses tungtawna a kipie Topa’ thukham laibu a mu hi.

¹⁵ Hilkiah in thuvanpi pa Shaphan kungah, “Topa’ biehinn sungah thukham laibu ka mu hi,” ci hi; tuale Hilkiah in Shaphan kungah tua laibu a pie hi.

¹⁶ Shaphan in kumpipa kungah tua laibu peipi-in ama kungah, “Na nasemte tunga a ki-ap zosie a sep laitah un

¹⁷ Topa’ biehinn sunga kimu sum teng a la sieng vua, nasep makaite le nasemte tungah a pie uhi,” ci-in a gen be lai hi.

¹⁸ Thuvanpi pa Shaphan in kumpipa kungah, “Siempu Hilkiah in keima tungah laibu khat ei pie hi,” a ci hi. Tua ciengin Shaphan in kumpipa mai-ah a gingin tua laibu a sim hi.

¹⁹ Kumpipa in thukham kammalte a zah ciengin a puon a ehmal hi.

²⁰ Tua ciengin kumpipa in Hilkiah, Shaphan’ tapa Ahikam, Micah’ tapa Abdon, thuvanpi pa Shaphan, le kumpipa’ nasempa Asaiah thu pie a,

²¹ “Pei unlen, tua a kimu laibu sunga kammalte tawh kisai-in keima ading le Israel le Judah gama a kinuasie mite adingin Topa thu va dong ta un; azieh pen i pu i pate in tam laibu sunga a kigiel zosie banga sep ding, Topa’ kammal na zui lo uh ahi ziehin eite tunga ang kibuo Topa’ lungthahna lien hi,” a ci hi.

Kamsangnu Huldah Thu Kikum

²² Tuaci’n Hilkiah le kumpipa in a sawl mite, Hasrah, a tapa Tokhath, a tapa Shallum, biehinn puon kempa’ zi kamsangnu Huldah kungah pei-in (tua nu Jerusalem sung Veng Nina munah a teng hi) tua thu tawh kisai ama kungah a gen uhi.

²³ Ama in amate kungah, “Israel Pasien, Topa in tam bangin a gen hi: Ka kunga ang sawlpa kungah gen un,

²⁴ Topa in tam bangin a gen hi: Keima in tam mun le a tunga teng mite tungah Judah kumpipa mai-a a kisim laibu sunga a kigiel samsietna zosie ahi gimnate ka tungsah ding hi.

²⁵ A nasepte utawh ei lungthahsah nadingun, amate in kei ei nuasie-in pasien dangte tungah biehna a pieh ziehun tami munah ka lungthahna kibuo-in a kiphelmit zo sih ding hi.

²⁶ Ahi vangin Topa thu dong dinga ang sawl Judah kumpipa kungah tam bangin na gen ding uhi: Israel Pasien, Topa in tam bangin a gen hi: Na zahsa thute tawh kisai-in,

²⁷ tam mun le a tunga a teng mite tungah ama langpanna kammalte na zah ciengin na lungsim kisia-in, Pasien mai-ah nangmama kiniemkhieh na hi zieh le ka mai-ah nangma kiniemkhiehin, na puonte ehmalin ka mai-ah kap na hi ziehin, na thugen ka za zo ta hi, Topa in ci hi.

²⁸ Na pu na pate kungah kang khawm ding a, lungnuomtahin na han-ah ang kikhawm ding hi. Nangma in tam mun le a sunga tengte tunga ka tunsah ding gimna zosie na mit in a mu sih ding hi,” a ci hi. Amate in kumpipa kungah thu a puohkia uhi.

Thuciemna Kithasuosah

²⁹ Tua ciengin kumpipa in thu vaihlahin Judah le Jerusalem upa zosie kikhawmsah hi.

³⁰ Topa’ biehinn ah kumpipa, Judah mite zosie, Jerusalem-a teng mite zosie, siempute le Levi-te, le mite zosie a lien a neu tawh peito uhi; ama in Topa’ biehinn sunga a kimu thuciemna laibu sunga thu zosie amau’ zahin a sim hi.

³¹ Ama munah kumpipa dingin tam laibu sunga a kigiel thuciemna thute a sem dingin a lungsim zosie le a hinna zosie tawh, Topa’ nua a zui nading le ama’ thupiehnate, ama’ thukipte, le ama’ thukhamte a zui nadingin Topa mai-ah thuciemna khat a bawl hi.

³² Tua ciengin ama in Jerusalem le Benjamin sunga a om mi zosie in tua thu a zui dingin a kiciem uhi. Amau’ pu pate’ Pasien ahi Pasien’ thuciemna dung zui-in Jerusalem-a tengte a gamta uhi.

³³ Josiah in Israel mite’ neisa gam zosie panin a kidahhuoi zosie ladawhin Israel sunga a om mi zosie in Topa a Pasien uh a biesah hi. Ama’ hin sung tungtawnin a pu le pate uh’ Pasien, Topa a zuina panun amate a kihei sih uhi.