2 Khangthute 31 - Zo Bible

Lawki Biehbuhno-te Kisusie

¹ Tu-in tam teng zosie a kiman zaw ciengin tua muna a om Israel zosie Judah khuopite-ah kuonin biehna songte satkehin khuom siengthote a phua vua, Judah le Benjamin gam sung zosie, Ephraim le Manasseh sunga om munsangte le maitamte a suhsiet zaw masangsie uh phelkeh gawp uhi. Tua amau’ neisa khuopi cietah Israel mite zosie a kilekia uhi.

² Heziekiah in siempute le Levi-te amau’ nasep ciet tawh kizui-in a khenkhenin se a, meihal biehnate le thunuom biehnate adingin Topa’ giephuol tunkot tenga na a sem ding, lungdam a ko ding le phatna a pie dingin siempute le Levi-te a se hi.

³ Kumpipa in ama’ neisa sung pana a silpiehte pen meihal biehna ding ahi hi: Topa’ thukham laibu sunga a kigiel bangin zing le nitah a meihal biehnate, sabbath nite, hladet nite, le a kise pawite dinga meihal biehnate ahi hi.

⁴ Siempute le Levi-te in Topa’ thukham sungah a kipumpieh thei nadingun, Jerusalem-a teng mite in amau’ nga dinga a kilawm a tanh uh a pieh nadingun ama in thu a pie hi.

⁵ Tua thu a kithezah behin Israel mite in anpalte, lenggazu, sathau, khuoizu, le lo-a pieng zosie tampitah a pie vua, na zosie panin sawm-ah-khat a kicing tahin a peipi uhi.

⁶ Judah khuopite sunga teng Israel mite in bawnghonte le tuute panin sawm-ah-khat le Topa a Pasien uh tunga kisiensuosa a sil ki-apte sung panin sawm-ah-khat te zong peipi-in a lom lomin a koi uhi.

⁷ A hla thumna sungin amate in tua a lomte cien ding a kipan vua, a hla sagina sungin a man uhi.

⁸ Hezekiah le uliente pei-in tua a lomte a mu ciengun amate in Topa le a mi Israel-te thupha a pie uhi.

⁹ Hezekiah in tua a lomte’ thu, siempute le Levi-te a dong hi.

¹⁰ Zadok innkuon pana siempupi pa Azariah in ama dawng a, “Amate in Topa’ biehinn sungah a silpiehte uh ang peipi vua kipanin kote in neh ding a kiningcing tahin ka nei vua, khol ding tampitah zong ka nei uhi; azieh pen Topa in a mite thupha ei pie a, tuaci’n tam bangin nehval tampi ka nei uhi,” a ci hi.

Siempute le Levi-te Siemphatna

¹¹ Tua ciengin amate in Topa’ biehinn sungah vankoina inndante a bawl nadingun Hezekiah in thu a pie hi; tuale amate in a bawl uhi.

¹² Amate in silpiehte, sawm-ah-khat le a ki-ap nate muonhuoitahin a puoh uhi. Tuate a van ulien pen pa Levi-te Conaniah ahi a, a nina pen a sanggampa Shimei ahi hi;

¹³ Kumpi Hezekiah le Pasien’ biehinn makaipi pa Azariah’ sena tawh Jehiel, Azaziah, Nahath, Asahel, Jerimoth, Jozabad, Eliel, Ismachiah, Mahath, le Benaiah-te pen Conaniah le a sanggampa Shimei a hu makaite ahi uhi.

¹⁴ Nisuona lam tunkot cing pa, Levi-te Imnah’ tapa Kore pen Pasien tungah nop thu-a a kipie silpiehte a vanpi pa ahi a, ama pen Topa adinga a kikoicing piehkhietnate le siengtho pen biehnate sekhen ding ahi hi.

¹⁵ Eden, Miniamin, Jeshua, Shemaiah, Amariah, le Shecaniah-te in siempute’ khuopi sungah a vuoi a khang a kibangin a khen khenin, a sanggamte uh tungah satanh hawmpieh dingin muonhuoitahin ama a hu vua,

¹⁶ khang ciemtena sungah a min a kikhum kum thum le a tungsie pasalte, nisim kisapna dung zui-in a khen khenin a panmun utawh kituohin Topa’ biehinn sunga a lut mi zosie tanh a pie uhi.

¹⁷ Amau’ pupa innkuon zui-in siempute kisim hi; kum sawmni le a tungsie Levi-te a khenkhenin a panmun utawh kituohin kisim hi.

¹⁸ Siempute a tasen zosie, a zite, a tapate, le a tanute utawh a mihon bupin kisimtha hi; bangzieh ahei cile amate pen a siengtho-a a kikepna vuah a muonhuoi uhi.

¹⁹ Amau’ khuopite-a’ ahi taang gam lozaute lahah teng Aaron’ suon siempute ading ahile, a kiciemte siempute lah le Levi-te lahah pasal zosie tungah a khuo khuo-ah amau’ nga ding ciet a hawm dingin mite a min tawh kise hi.

²⁰ Hezekiah in Judah gam buppi-ah tam bangin a bawl hi; ama in Topa a Pasien mai-ah a hoi a man le a muonhuoi-in sem hi.

²¹ Ama in Topa’ biehinn nasepna zosie le thukham le thupiehnate tawh kizui-in a sepna-ah ama’ Pasien sui-in, a lungsim zosie tawh a sem hi; tuale a maa a vang hi.