2 Khangthute 28 - Zo Bible

Ahaz’ Uhna

¹ Ahaz maan ding a kipatin kum sawmni pha hi; ama Jerusalem ah kum sawm le guh sung maang hi. A pu David’ sepsa bangin Topa muna-ah a manin gamta loin

² Israel kumpite’ lampite zuizaw hi. Ama in Baal adingin a kisung milimte nangawn bawl hi;

³ tuale Hinnom tapa’ kuomah biehnate pie-in Topa in Israel mite mai-a a nawmangsa minamte’ zah a kidahhuoi gamtatnate zui-in mei tawh a tapate a hal hi.

⁴ Ama kithoi-in munsangte tung, muoltangte tung le singlim nei zosie-ah biehnate a pie hi.

Aram le Israel in Judah Zo

⁵ Tua ahi ziehin a Topa Pasien in Aram kumpipa’ khut sungah ama pie a, Damascus ah a mite tampitah salin a peipi hi. Mi tampi thatin ama a zo Israel kumpipa’ khut sungah zong ama kipie hi.

⁶ Amate in a pu a pate uh’ Pasien, Topa a nuasie ziehun Remailiah’ tapa Pekah in nikhat thu-in Judah sungah mi tul zakhat le tul sawmni that a, amate pen a unpi-in mi thahat galhangte ahi uhi.

⁷ Ephraim-te a thahat galhang Zichri in kumpipa’ tapa Maaseiah, kumpi innpi a uh Azrikam, le kumpi zomah thunei pen ahi Elkanah-te that hi.

Oded’ Suhbuoina

⁸ Israel mite in amau’ tanaute sung panin numeite, tapate, le tanute, mi tul zani a man vua, amate kung panin van tampitah zong a la uhi; amate in Samaria ah tua vante a peipi uhi.

⁹ Ahi vangin tua munah Topa’ kamsang khat om a. ama’ min pen Oded ahi hi; Samaria ah ang tung galkapte dawn dingin ama pusuohin amate kungah, “Judah tungah na pu na pate uh’ Pasien, Topa lungthah ahi ziehin ama in na khut sung vuah amate ang pie a, ahi vangin thangpaina tawh amate na that vua, tua khu vantung dong a tung hi.

¹⁰ Tu-in note in Judah mite le Jerusalem mite, pasal le numeite nuoinetin salin na bawl sawm uhi. Ahi vangin Topa na Pasien uh tungah mawna nei hi lo na hi uh amah?

¹¹ Tu-in ka thugen ngai unlen, na tanaute uh sung panin gala na mat zosie uh puohkia un, azieh pen na tung vuah Topa’ lungthahna lienpi a tung hi,” a ci hi.

¹² Tua tham loin, Ephraim-te’ uhpite pawlkhat, Johanan’ tapa Azariah, Meshellemoth’ tapa Berechiah, Shallum’ tapa Jehizkiah, le Hadlai’ tapa Amasa-te, galsimna pana ang tung mite langkhatah a pang vua,

¹³ amate kungah, “Tulaitaha ka mawnate ule ka khielnate ban vuah Topa langpanna zieha mawnate ka tung vuah ei tut sawm na hi ziehun, tam munah galmatte nang tut sih ding uhi. Bangzieh ahei cile ka khielna uh a lien seng ta a, Israel tungah Topa’ lungthahna lienpi a om hi,” a ci uhi.

¹⁴ Tuaci’n galhangte in galmatte le a lah uh vante miliente le a kikhawm mi zosie’ mai-ah a nuasie uhi.

¹⁵ Tua ciengin a min tawh kihlante dingto-in galmatte a peipi vua, tuale amate lahah a guohtanga omte zosie puon a silsah uhi; amate puon a silsah vua, kedapte pie-in an le tui zong va-in sathau a nu uhi; tuale a thazawngkhal teng laa tungah tuongsahin lutu kung khuopi ahi Jericho-a a tanaute uh kungah a zawpi uhi. Tua ciengin Samaria ah a kilekia uhi.

Assyria in Judah Hu ding Niel

¹⁶ Khum hun laitahin Kumpi Ahaz in Assyria kumpipa kungah huna ngen dingin mi a sawl hi.

¹⁷ Azieh pen Edom-te in gal bawlkia-in Judah simin a zo vua, a mite galmatin a kaimang uhi.

¹⁸ Philistia-te in Shephelah le Judah-te’ Negeb gama khuopite a bulu vua, Beth-shemesh, Aijalon, Gederoth, Soco-a khuoneute tawh, Timnah-a khuoneute tawh, le Gimzo-a khuoneute tawh a la uhi; tua munah amate a teng uhi.

¹⁹ Israel kumpipa Ahaz in Judah sungah kidehna om loin phengtat a, Topa tungah a na citah lo ziehin Topa in Judah a niemkhieh hi.

²⁰ Tuaci’n ama kungah Assyria Kumpipa Tiglath-pileser a pei vangin, koi’ thakhausah tah zawh sangin ama a gawtbawl zawsop hi.

²¹ Bangzieh ahei cile Ahaz in Topa’ biehinn, kumpipa’ inn, le uliente’ inn sunga van kikoi zosie la-in Assyria kumpipa kungah sieh le kaihte a puoh hi; hinanle tua in ama a hu zo tuon sih hi.

Ahaz’ Upkhielna le A Sina

²² A genthei hun ciengin Topa tungah tami Kumpi Ahaz pen ma citah lo zeh lai hi.

²³ Azieh pen ama a zo Damascus’ pasien-te kungah ama kithoi a, “Aram kumpite’ pasien-te in amate a panpi ziehin amate in kei zong ei panpi thei nadingun amate tungah kithoina ka bawl ding hi,” ci hi. Hizongle tuate pen ama le Israel zosie’ kisietna ahi hi.

²⁴ Ahaz in Pasien’ biehinn sunga vanzahte khawmin satguoi a, ama in Topa’ biehinn kotte khahcipin Jerusalem ningkiu cintengah maitam a bawl hi.

²⁵ Ama in pasien dangte tungah biehna a pieh thei nadingin Judah khuopi zosie-ah munsangte bawlin, a pu le pate’ Pasien, Topa a lungthahsah hi.

²⁶ Tu-in ama gamtatna a omlaite le a omzie vannuoi, a patna panin a tawpna dong, Judah le Israel Kumpite’ Tangthu Laibu sungah kigiel hi.

²⁷ A pu a pate tawh Ahaz lumton a, tuale amate in Jerusalem khuopi sungah ama a vui uhi; hinanle amate in Israel kumpite’ hanah ama a puo sih uhi. A tapa Hezekiah in ama’ za luo hi.