2 Khangthute 25 - Zo Bible

Amaziah’ Uhna

¹ Amaziah maan ding a kipatin kum sawmni le nga pha hi; ama in Jerusalem ah kum sawmni le kuo sung maang hi. Ama nu’ min pen Jerusalem-te Jehoaddan ahi hi.

² Topa muna-ah a manin gamta a, ahi vangin a lungsim mantah tawh hi nai lo hi.

³ A khut sungah kumpi thuneina a op zaw behin ama in a pa kumpipa a that ama’ nasemte that hi.

⁴ Ahi vangin Topa’ thupieh Moses’ laibu sungah, “Tate ziehin pate kithat lo ding a, pate ziehin zong tate kithat lo ding hi; ahi vangin mi zosie amau’ mawna hang tawh a si ding uhi,” ci-in a na kigiel ma bangin ama in a tate a that sih hi.

Edom-te A Kithana

⁵ Amaziah in Judah mite khawm a, ama in amau’ pupa innkuon tawh kizui-in Judah mi zosie le Benjamin mi zosiete, a tul a uhte le a za a uhte’ khut nei-ah koi hi. Ama in kum sawmni le a tungsie mite khawm a, gal sim thei, tei le lum a zang thei, le a kituomteel galkap tul zathum a pha hi.

⁶ Ama in Israel sung panin ngun talent zakhat tawh a thahat galhang mi tul zakhat zong a ciel hi.

⁷ Ahi vangin ama kungah Pasien’ mi khat pei-in, “Kumpipa aw, nangma tawh Israel galkap peitonsah sin. Azieh pen Topa in Israel- tam Ephraim mi zosie- ompi lo hi.

⁸ Nangma mama kuonzaw inlen sem in. Galdona-ah thahat in, tua hi sihle Pasien in galte mai-ah ang thalpai ding hi; bangzieh ahei cile Pasien in huna ding ahi a, thalpaina ding ahi zongin vanglietna a nei hi,” a ci hi.

⁹ Amaziah in Pasien’ mipa kungah, “Hizongle Israel galkapte guoi nadinga ka piehsa talent zakhat bang ka law ta diei?” a ci hi. Pasien’ mipa in dawng a, “Topa in tam sangin a tamzaw zong ang piehbe thei hi,” a ci hi.

¹⁰ Tua ciengin Amaziah in Ephraim panin ama kunga a pei galkapte, inna peikia dingin a sawl hi. Ahi vangin amate Judah tungah a lungthah mama vua, lungsosa-in inn lam a kilekia uhi.

¹¹ Amaziah kihangsahin a mite peipi hi; ama Ci Kuom lamah pei-in Seir mite tulsawm that hi.

¹² Judah mite in adang mi tulsawm hingmatin Sela muolvumah a peipi vua, tuale a unpi-a guoicim dingin Sela muolvum panin amate a sepsuh uhi.

¹³ Hinanle ama tawh gal kuon ding a phal lo, a sawlkia galkapte in Samaria panin Beth-horon dongah Judah khuopite a na sim uhi; amate in tuate sungah mi tulthum a that vua, van tampitah a la uhi.

¹⁴ Edom-te a thana panin Amaziah a pei zaw ciengin Seir-te’ pasien-te peipi-in ama’ pasien dingin tuate koi a, tuate bie-in tuate tungah biehnate a pie hi.

¹⁵ Amaziah tungah Topa lungthahin ama kungah kamsang khat sawl a, tua pa in, “Bang dingin na khut panin ama’ mite a hunkhie zo lo, mite’ pasien-te po bel talawm na hei?” a ci hi.

¹⁶ Ahi vangin ama in thu a gen laitahin kumpipa in ama kungah, “Kumpipa’ thu kuppi pa dingin nang kang koi uh amah? Khawl in! Bang dinga nang hing kithat ding ahei?” a ci hi. Tuaci’n kamsangpa zong khawl a, hinanle ama in, “Nangma tam bang gamta-in kang thu kuppina na ngai lo ziehin Pasien in nangma ang suhsiet ding a lungsim sungah a khensatna ka thei hi,” a ci hi.

Israel in Judah Lel

¹⁷ Tua ciengin Judah kumpi Amaziah in mi tawh a kikup zaw ciengin Israel kumpi, Jehu’ tapa Jehoahaz, a tapa Joash kungah mi sawlin, “Hing pei in; khatlekhat kisi vai,” cisah hi.

¹⁸ Israel kumpipa Joash in Judah kumpi Amaziah kungah thu puohin, “Lebanon-a thangling kung khat in Lebanon-a taamtah kung khat kungah thu zasah a, ‘Ka tapa’ zi dingin na tanu ei pie in,’ a ci hi; ahi vangin gamsa khat suohin tua thangling a tuoncil hi.

¹⁹ Nangma in, ‘En in, Edom-te ka zo zo hi,’ na ci a, na lungsim kiliensah gawp hi. Tu-in inn ah om khinkhian in; nangma le Judah na puaton nadingin bang dinga buoina na piensah ahei?” a ci hi.

²⁰ Ahi vangin Amaziah in a thu mang lo hi; azieh pen amate in Edom pasien-te a bieh ziehun, Pasien in a galte uh’ khut sungah amate a pieh thei nadinga tua khu Pasien’ nasepna ahi hi.

²¹ Tuaci’n Israel kumpipa Joash kuonto hi; ama le Judah kumpipa Amaziah, Judah gam Beth-shemesh ah khatlekhat gal sungah a kisi uhi.

²² Israel in Judah a zo hi; mi zosie a inn ciet vuah a tai uhi.

²³ Israel kumpipa Jehoash in Beth-shemesh ah Ahaziah’ tapa Joash, a tapa Judah kumpipa Amaziah manin Jerusalem ah peipi a, Ephraim Tunkot panin Tunkot Ninglam cieng dong tong zali sung Jerusalem kulpi a satguoi hi.

²⁴ Ama in kumpipa’ inn sunga om kham le ngun zosie, le Topa’ biehinn sunga kimu vanzah zosie tawh Obed-edom manton hi; ama in kumpipa’ inn sunga gou kikhol teng tomgamin a mite zong manin Samaria ah a peikia hi.

Amaziah’ Sina

²⁵ Israel kumpi, Jehoahaz’ tapa Joash a si zaw Judah kumpi Joash’ tapa Amaziah kum sawm le nga sung hing lai hi.

²⁶ Tu-in Amaziah’ nasep a omlaite, a patna panin a tawpna dong, Judah le Israel Kumpite’ Khang Tangthu Laibu sungah kigiel hi.

²⁷ Topa kung pana Amaziah a kiheimang a kipanin amate in Jerusalem ah ama sawmdapna khat a nei ciengun Lachish ah ama a tai hi. Ahi vangin amate in Lachish ah ama a nuadelsah vua, tua munah ama a that uhi.

²⁸ Amate in sakol tawh ama’ luong a puo uhi; David’ khuopi sungah a pu a pate tawh ama kivui hi.