2 Khangthute 24 - Zo Bible

Josiah in Biehinnpi Puopha

¹ Joash a maan ding a kipatin kum sagi pha hi; ama Jerusalem ah kum sawmli sung maang hi. Ama nu’ min pen Zibiah ahi a, Beer-sheba-te ahi hi.

² Siempu Jehoiada’ hun sung teng zosie Topa muna-ah Joash a manin gamta hi.

³ Jehoiada in ama ading zi ni suipieh a, tanu tapate’ pa a suoh hi.

⁴ Hun phabep khat zaw ciengin Joash in Topa’ biehinn puophat dingin a khensat hi.

⁵ Ama in siempute le Levi-te khawmin amate kungah, “Pasien’ biehinn puophat nadingin Judah khuopite-ah pei unlen, a kum kumin Israel zosie tung panin sum va khon ta un; tam thu na naw sep ding uh ahi ci thei un,” a ci hi. Ahi vangin Levi-te in a naw sep tuon sih uhi.

⁶ Tuaci’n kumpipa in uhpipa Jehoiada hlanin ama kungah, “Bang dingin Topa’ nasem Moses in thuciemna puonbuh adingin a kikhawm Israel mihonte tung pana sieh kikhon pen Judah le Jerusalem-te tung pan Levi-te khonsah lo na hei?” a ci hi.

⁷ Bangzieh ahei cile tua numei gilo Athaliah’ tapate in Pasien’ biehinn susie-in Topa’ biehinn sunga a ki-apsa na zosie nangawn Baal-te adingin a zang zo uhi.

⁸ Tuaci’n kumpipa in thupie a, amate in singkuong khat bawlin Topa’ biehinn tunkot pulamah a koi uhi.

⁹ Senel gam sungah Pasien’ nasem Moses a op lai-un Israel tungah a ngetsa sieh Topa adinga a puoh nadingun Judah le Jerusalem sung zosie-ah tangtawhna khat kibawl hi.

¹⁰ Makai zosie le mi zosie lungdamin a sieh uh peipi-in singkuong sungah a dim masangsie a khie uhi.

¹¹ Levi-te in kumpipa’ uliente kungah tua singkuong a peipi sielun amate in tua sungah sum tampi a op lam a mu ciengun, kumpipa’ thuvanpi pa le siempupi pa’ ulien pa pei-in singkuong bungdawhin sumte a la vua, a opna ngai-ah tua singkuong a koikia uhi. Tuaci’n a ni ni-in amate in a bawl vua, sum tampitah a khawm uhi.

¹² Kumpipa le Jehoiada in Topa’ biehinn nasep uhte kungah tua sumte a pie vua, tua Topa’ biehinn a ngaingai a bangsahkia dingin amate in leilesuong nasep a siemte le khutsiemte, le Topa’ biehinn a puokia dingin sia le sumngo nasep a siemte zong a ciel uhi.

¹³ Tuaci’n nasem dinga a kicielte in na nahpi-in a sem vua, amau’ khut sungah puokiana nasep in mai nawt a, amate in a ngaingai bangin Topa’ biehinn a bawlkia vua, a kipsah uhi.

¹⁴ Amate in a zaw ciengun kumpipa le Jehoiada kungah a sumval teng uh tawi-in tua teng tawh Topa’ biehinn nasep nading le meihal biehnate dinga vanzahte, tawkeute, khamte, le ngun beelte a bawl uhi. Jehoiada’ hin sung tungtawnin Topa’ biehinn sungah meihal biehnate a kizomin a pie uhi.

Joash’ Upkhielna

¹⁵ Hizongle Jehoiada vuoi mama ta a, a kum a cin ciengin ama a si hi; a si-in ama kum za le kum sawmthum pha hi.

¹⁶ Ama in Israel sungah Pasien le a biehinn adingin na hoi sem ahi ziehin amate in David’ khuopi sunga kumpite lahah ama a vui uhi.

¹⁷ Tu-in Jehoiada a si zaw ciengin kumpipa kungah Judah uliente pei-in zatahna a pie uhi; tua ciengin kumpipa in amau’ thu a ngai hi.

¹⁸ Amate in a pu a pate uh’ Pasien, Topa’ biehinn a taisan vua, khuom siengthote le milimte’ na a sem uhi. Amau’ khielna ziehin Judah le Jerusalem tungah lungthahna a tung hi.

¹⁹ Ahi vangin Topa kungah amate a peipikia thei nadingin ama in amate lahah kamsangte a sawl hi; tamte in a langkhat vuah teci pang a, ahi vangin amate in a ngai tuom sih uhi.

²⁰ Tua ciengin Pasien’ hlagau in siempu Jehoiada’ tapa Zechariah man hi; mite tung lamah ama dingin amate kungah, “Pasien in tam bangin gen hi: Na mavan thei lo nadingun bang dingin Topa’ thupiehnate palsat na hi uh ahei? Note in Topa na taisan ziehun ama in note ang taisan hi,” a ci hi.

²¹ Ahi vangin amate in ama sawmdapin kumpipa thupiehna tawh Topa’ biehinn leituol zangah suong tawh a seplia uhi.

²² Kumpipa Joash in ama tungah Zechariah’ pa Jehoiada in a na lah migitna phawh kha nawn loin a tapa a thapieh mawh hi. Ama in a si kuonin, “Topa in mu hinlen phu la taheh!” a ci hi.

Joash’ Sina

²³ Kum tawp lam ciengin Joash sim dingin Aram galkapte a kuonto uhi. Judah le Jerusalem ah amate a tung vua, tua teng lah panin mite’ uliente zosie a that vua, a vanlahte zosie uh Damascus kumpipa kungah a puoh uhi.

²⁴ Aram galkapte mi tawmno a kuon vangun, amate in a pu a pate uh’ Pasien, Topa a nuasie ziehun Topa in a khut sung vuah galkap tampi a pie hi. Amate in Joash tungah tua bangin thukhenna a bawl uhi.

²⁵ Nahpi taha a liemsa-in ama nuasie-in, amate a nuakin zaw ciengun, siempu Jehoiada tapa’ sisan ziehin a nasemte in ama tha dingin a sawmdap vua, amate in a lupna tungah ama a that uhi. Tuaci’n ama si a, amate in David’ khuopi sungah ama a vui vua, hinanle amate in kumpite hanah ama a vui sih uhi.

²⁶ Ama a sawmdap pen Ammon-te Shimeath’ tapa Zabad, le Moab-te Shimrith’ tapa Jehozabad ahi hi.

²⁷ Ama’ tapate’ thute, ama a kigensietna thute, le Pasian’ biehinn a kilamkiana thute, Kumpite’ Khang Tangthu Laibu sungah kigiel hi. Tuale a tapa Amaziah in ama’ za luo hi.