2 Khangthute 21 - Zo Bible

Jehoram’ Uhna

¹ A pu a pate tawh Jehoshaphat lumton a, David’ khuopi ah a pu a pate tawh ama kivui hi; a tapa Jehoram in ama’ za luo hi.

² Jehoshaphat’ tapa Jehoram’ sanggamte: Azariah, Jehiel, Zechariah, Azariah, Michael, le Shephatiah ahi uhi; tam teng zosie, Judah kumpi Jehoshaphat’ tapate ahi hi.

³ A pa un amate letsong, ngun, kham, le a manpha neisate tampitah pie a, Judah gama kulnei khuopite tawh a piehtha hi; hizongle ama pen a ta masa pen ahi ziehin ama in Jehoram tungah kumpi gam a pie hi.

⁴ A pa’ kumpi topha tungah Jehoram ka-in a dinkip ciengin a sanggam pasal zosie namsau tawh thatin Israel uliente kimkhat zong that hi.

⁵ Ama a maan patin Jehoram kum sawmthum le ni pha hi; Jerusalem ah ama kum giet sung a maang hi.

⁶ Ahab’ tanu pen ama’ zi ahi ziehin ama in Ahab innkuon ma bangin Israel kumpite’ lampi a zui hi. Topa muna-ah ama a sie lamin a gamta hi.

⁷ Hizongle Topa in David le a sunlehlahte tungah meivah khat pieh zing dingin kamciem a, David tawh thuciemna bawl zo ahi ziehin ama in David innkuon a susie sih hi.

Edom’ Ledona

⁸ Ama’ hun sungin Edom in Judah’ uhna ledo a, amau’ kumpi tuom a koi uhi.

⁹ Tua ciengin a galkapmangte le a leeng zosie tawh Jehoram galkai a, zanlai-in kuonin ama in ama le a leeng lamkaite a kuikhum Edom-te a sim hi.

¹⁰ Tuaci’n tuni dongin Edom-te in Judah’ uhna a ledo uhi. Ama in a pu a pate’ Pasien, Topa a taisan ziehin khum hun laitahin Libnah in zong ama’ uhna a ledo hi.

Elijah’ Laihlah

¹¹ Tua tham loin, ama in Judah muoltung gamah munsangte bawl a, citah lona lamah Jerusalem-a tengte pui-in, Judah lam a pielsah hi.

¹² Kamsang Elijah kung panin ama tungah laihlah khat tung a, “Na pu David’ Pasien, Topa in tam bangin a gen hi: ‘Azieh pen na pa Jehoshaphat’ lampi le Judah kumpi Asa’ lampi na tawn sih a,

¹³ nang in Israel kumpite’ lampi na zuizaw a, Ahab innkuon in citah lona lamah Israel a pui bangin Judah le Jerusalem-a tengte citah lona lamah na pui a, na pa’ inn sung panin nangma sanga a hoizaw na sanggamte zong na tha sieng zo ziehin,

¹⁴ en in, Topa in na mite, na tate, na zite, le na neisa zosie tungah gimna lienpi khat ang tungsah ding a,

¹⁵ nangmama in tam natna ziehin a ni ni-in na gilzam a lawt dongin gil natna nasie khat na vei ding hi,” ci hi.

¹⁶ Ethiopia-te’ gei-a om Philistia-te le Arab-te, Jehoram tunga a thangpai thei nadingun Topa in a kuontaw hi.

¹⁷ Judah sim dingin amate kuonto-in a bulu vua, kumpipa’ inn-a om neisa zosie, a tapate le a zite tawh tommang siengin, a tapa tumpen Jehoahaz ci simlo a tapate a kinuasie om lo hi.

Jehoram Natna le A Sina

¹⁸ Tami thu zosie zaw ciengin Topa in a dam thei lo natna khat tawh a gil a nasah hi.

¹⁹ A hun a cin, kum ni tawp ciengin a natna ziehin a gil lawt a, nahpi-in na sa-in a si hi. A pu a pate adinga tumphuol a tawpieh bangun a mite in ama zatahna-in tumphuol a tawpieh sih uhi.

²⁰ A uh ding a kipatin kum sawmthum le kum ni a pha hi; ama in Jerusalem-ah kum giet sung uh a, koima’ hlenla vawt loin a si hi. David’ khuopi sungah ama a vui vua, hizongle kumpite’ han sungah kivui lo hi.