2 Khangthute 20 - Zo Bible

Nisuona Pana Busimna

¹ Tam thu zaw ciengin Moab-te le Ammon-te, Meunim-te pawlkhat tawh, Jehoshaphat sim dingin a kuon uhi.

² Kamtaite pei-in Jehoshaphat kungah, “Nang ang sim dingin tuipi galkhat, Edom gam panin mihon tampite ang kuon uhi; Hazazon-tamar (En-gedi a kici) ah amate kigingsa-in a om uhi,” ci-in a gen uhi.

³ Jehoshaphat a zau hi; amama-in Topa sui ding lunggulin Judah gam muncin tengah an tan nading thu a tangko hi.

⁴ Topa tung panin huna sui dingin Judah in mi kaikhawm hi; Topa sui dingin Judah khuopi zosie panin amate a kuon uhi.

Jehoshaphat’ Thungetna le Guolzawna

⁵ Topa’ biehinn sung, leituol tha’ mai, Judah le Jerusalem-te’ kikhopna sungah Jehoshaphat ding a,

⁶ tuale, “Ka pu ka pate uh’ Pasien Topa aw, nangma, van Pasien na hi sih amah? Nam cinte’ kumpi gam zosie tungah nangma a vaihawm na hi sih amah? Nangma’ khut sungah vanglietna le thahatna om a, koima in nang ang nang zo sih hi.

⁷ Kote’ Pasien aw, nangma in na mi Israel mai-ah tam gama teng mite na delmang a, nangma’ guolpa ahi Abraham’ suonlehlahte tungah kumtawn adingin pie hi lo na mah?

⁸ Tua munah amate tengin tua sungah nangma’ min dingin biehinn khat a lam vua, amate in,

⁹ ‘Ko tungah gimna, namsau, thukhenna, ahi sihle natna, ahi sihle kielpi ang tun leh, tami biehinn sungah na min a op ziehin tami biehinn mai le na mai-ah dingin na kungah ka lungkhamna uh kang ko ding vua, tuale nangma in ei za-in nei hun ding hi,’ a ci uhi.

¹⁰ Tu-in en in, Egypt gam pan a peikhiet lai-un Israel-te in na simsah lo, amate in pelin a suhsiet lo uh- Ammon, Moab le Sier Muol mite,

¹¹ ka luo ding vua kote nei piehsa na neisa panin ei hawlkhietna utawh amate in thaman ei pie zawsop uhi.

¹² Kote’ Pasien aw, amate tungah thu khen lo ding na mah? Bangzieh ahei cile kote sim dinga ang kuon tam mihonpite tawh kisi dingin tha ka nei sih uhi. Ci nading mel thei loin nangma beh kang mitsuon uhi,” a ci uhi.

¹³ Tua laitahin Topa mai-ah Judah zosie a zite, a tasente, le a naupangte utawh a ding uhi.

¹⁴ Tua ciengin a kikhawm mipi laikimah, Levi-te Asaph’ suonte sung panin Mattaniah, a tapa Jeiel, a tapa Benaiah, a tapa Zechariah, a tapa Jahaziel-te tungah Topa’ hlagau a tung hi.

¹⁵ Ama in, “Judah gam zosie, Jerusalem-a teng teng zosie, le Kumpi Jehoshaphat aw, ngai un. Topa in note tungah tam bangin a gen hi: ‘Zau sih unlen tam mi honpite ziehin lungkie sih un; azieh pen galdona khu nomau-a’ hi loin Pasien-a’ ahi hi.

¹⁶ Zing ciengin amate sim dingin kuonsuh un; Ziz katona lampi zui-in amate ang kuonto ding uhi; Jeruel gamlah mai-a om kuom mongah amate na mu ding uhi.

¹⁷ Tami gal pen note’ sim ding hi lo hi; Judah le Jerusalem mite aw, na panmun uh la-in pia malmal loin ding unlen, no tangin Topa’ guolzawna mu un,’ a ci hi. Zau sih unlen lungkie sih un; amate sim dingin zing ciengin kuon un. Topa in ang ompi ding uhi,” a ci hi.

¹⁸ Tua ciengin a mai tuol ngatin Jehoshaphat kun a, Topa mai-ah Judah zosie le Jerusalem-a teng mi zosie pua-in Topa a bie uhi.

¹⁹ Awsangpi tawh Israel Pasien, Topa a phat dingin Levi-te sung panin Kohath-te le Korah-te a dingto uhi.

²⁰ Amate zingmawngin a thobai vua, Tekoa senel gamah a pei uhi. Amate a pei laitahun Jehoshaphat dingin, “Judah le Jerusalem khuo-a tengte aw, ka thugen na ngai un! Topa na Pasien uh um un, tua hile na kip ding uhi; a kamsangte zong muong un,” a ci hi.

²¹ Ama in mite tawh thu kikupna a nei zaw ciengin, Topa mai-ah la sa ding le a thupi a sienthona a phat ding mite se a, a pei kawmun amate in galkapte mai-ah, “ “Topa tungah lungdamna ko un. Bang zieh ahei cile ama’ itna kip tawntung hi,” a ci uhi.

²² Amate in phatna la a sah laitahun, Judah sim dinga a pei Ammon-te, Moab-te, le Seir Muol mite buhdap dingin Topa in mi koi a, tuaci’n amate kizo hi.

²³ Azieh pen Ammon-te le Moab-te in Sier Muola tengte simin a susie sieng uhi; tuale Seir-a tengte a suhsiet zaw ciengun amate khatlekhat a kisusie uhi.

²⁴ Senel gam galvilna tausangah Judah-te a tun ciengun amate in mihonpi lam a en uhi; amate pen tuol lahah a puamat misi luong vive ahi uhi; amate a suohta khat beh om lo hi.

²⁵ Amate kung panin gal vanlahte khawm dingin Jehoshaphat le a mite a pei ciengun ganhingte, vante, puonsilte, le na manpha tampi tah a mu vua, tuale amate dinga a puohzawh nawn lo cieng dong uh a la uhi. Galvanlahte tam seng ahi ziehin van khawmin ni thum sung a thapaai uhi.

²⁶ A ni li ni-in Beracah kuomah a kikhawm uhi, azieh pen amate in tua munah Topa a phat uhi; tua ziehin tuni dongin khum mun pen Beracah Kuom kici hi.

²⁷ Tua ciengin Jehoshaphat’ makaina tawh Judah mite le Jerusalem-te zosie kipahin Jerusalem ah a kilekia uhi. Bangzieh ahei cile Topa in a galte tungah amate a lungdamsah hi.

²⁸ Harp-te, lyre-te, le pengkulte tawh Jerusalem-a Topa’ biehinn ah amate a tung uhi.

²⁹ Topa in Israel’ galte a simpiehna thu a zah ciengun kumpi gam zosie tungah Pasien zatahna a tung hi.

³⁰ Tuale Jehoshaphat’ uhna gam sungah gal a veng hi. Azieh pen a Pasien in ama kimvelah galvenna a pie hi.

Jehoshaphat’ Uhna Tawpna

³¹ Tuaci’n Judah tungah Jehoshaphat a maang hi. A maan a kipatin ama kum sawmthum le nga pha hi; Jerusalem ah ama kum sawmni le nga sung maang hi. Ama nu’ min Azubah ahi a, Shilhi’ tanu ahi hi.

³² Jehoshaphat in a pa Asa’ lampi bang zui-in ama tua panin a piel vawt sih a, Topa muna-ah thuman vive a sem hi.

³³ Ahi vangin munsangte kipaimang tuon lo hi; mite in a pu a pate uh’ Pasien tungah a lungsim uh a nga nai sih uhi.

³⁴ Tu-in Jehoshaphat’ gamtatna a omlai teng, a patna panin a tawp dongin, Israel Kumpite’ Tangthu sunga a kiciemte, Hanani’ Tapa Jehu’ Khang Tangthu sungah kigiel hi.

³⁵ Tami zaw ciengin a gitlo gamtat Israel kumpipa Ahaziah tawh Judah kumpipa Jehoshaphat kizom hi.

³⁶ Amate in Tarshish lama pei ding tembawte bawlna-ah ama tawh kipawlin Ezion-geber ah tembawte a bawl uhi.

³⁷ Tua ciengin Mareshah-te Dodavahu’ tapa Eliezer in Jehoshaphat langpangin thu a gen a, “Nang in Ahaziah tawh na kipawl ziehin na bawlsa nate Topa in susie ding hi,” a ci hi. Tuale tembawte kisie a, Tarshish ah pei thei lo uhi.