2 Khangthute 18 - Zo Bible

Micaiah in Guollel nading Genkhol

¹ Tu-in Jehoshaphat in hauna le minthanna nei hi; tuale ama in Ahab tawh kitenna zieha kizopna khat a bawl hi.

² Kum tawmvei zaw ciengin Samaria-a Ahab kunga haw dingin a kuonsuh hi. Ahab in ama ading le a zawpite adingin tuu tampi le bawngtang tampi gaw a, Ramoth-gilead simto dingin ama a zawl hi.

³ Israel kumpipa Ahab in Judah Kumpipa Jehoshaphat kungah, “Keima tawh Ramoth-gilead ah nang kuon diei mah?” ci hi. Ama in dawngin, “Nangma tawh a omton ka hi a, ka mite nangma’ mite ahi hi. Galsimna-ah nangma tawh kang kuon ding uhi,” a ci hi.

⁴ Ahi vangin Jehoshaphat in zong Israel kumpipa kungah, “Topa’ thu dong masa in,” a ci hi.

⁵ Tua ciengin Israel kumpipa in kamsangte zali kaikhawm a, tuale amate kungah, “Ramoth-gilead sim dingin ka kuonto diei, tua ahi sihle ka pel lel diei mah?” a ci hi. Amate in, “Kuonto in; azieh pen Pasien in kumpipa’ khut sungah ang pie ding hi,” a ci uhi.

⁶ Ahi vangin Jehoshaphat in, “Tam sungah thu i dawh thei ding Topa’ kamsang adang a om ta sih amah?” a ci hi.

⁷ Israel kumpipa in Jehoshaphat kungah, “Thu i dawh thei ding Imlah’ tapa Micaiah a kici mi dangkhat omlai hi; ahi vangin ama in kei thu a hoi lamin a gen ngai sih a, gimna nading ngentang a gen ziehin ama ka muda hi,” a ci hi. Jehoshaphat in, “Kumpipa in tua bang mawh ci sin,” a ci hi.

⁸ Israel kumpipa in a ulien khat hlan a, “Imlah’ tapa Micaiah mallangtahin hing peipi in,” a ci hi.

⁹ Tu-in Israel kumpipa le Judah kumpipa Jehoshaphat a kumpi topha tung vuah to-in puontuolpi silin a kizem uhi; tuale Samaria tunkot lutna mun ancilna phuol-ah amate a to uhi; tuale kamsang zosie in a mai vuah kam a sang uhi.

¹⁰ Chenaanah’ tapa Zedekiah in sia sakite bawlin ama in, “Topa in tam bangin a gen hi: Amate a kisuhsiet masangsie tam teng tawh Aram-te na sun ding hi,” a ci hi.

¹¹ Kamsang zosie in zong tua ma bangin kam a sang vua, “Ramoth-gilead ah kuonto inlen va zo ta’n; Topa in kumpipa’ khut sungah ang pie ding hi,” a ci uhi.

¹² Micaiah hlan dinga a kuon kamtaipa in ama kungah, “En in, kithukhatin kamsangte’ gen khu kumpipa dinga a hoilam ahi hi; na thu gen zong amau’ gen tawh kibangsah inlen, a hoilamin gen in,” a ci hi.

¹³ Ahi vangin Micaiah in, “Topa a hing ahi ma bangin ka Pasien’ gen popo ka gen ding hi,” a ci hi.

¹⁴ Kumpipa kungah ama a tun ciengin kumpipa in ama kungah, “Micaiah aw, Ramoth-gilead ah galsim dingin ka kuonto diei, tua ahi sihle ka pel lel diei mah?” a ci hi. Ama in dawng a, “Kuonto inlen va zo ta’n; na khut sungah amate ang kipie ding hi,” a ci hi.

¹⁵ Hinanle kumpipa in ama kungah, “Topa’ min tawh keima tungah thuman ci longal bangma dang nang gen lo nadingin bang zavei hing kiciemsah ding ka hei?” a ci hi.

¹⁶ Tua ciengin Micaiah in, “Tuucing om lo tuute bangin muolte tungah Israel mi zosie a kithethang ka mu hi. Tuale Topa in, ‘Tam mite in pu a nei sih uhi; a inn lam ciet vuah lungmuongin kilesah un,’ ci hi,” a ci hi.

¹⁷ Israel kumpipa in Jehoshaphat kungah, “Ama in kei thu a hoi lamin khat zong gen ngai loin gimna ding beh ang gen ding hi, ci-in na kungah kang gen tamal sih amah?” a ci hi.

¹⁸ Tua ciengin Micaiah in, “Tua ahi ziehin Topa’ thugen ngai vawi un: Topa a kumpi topha tungah to-in a ziet le a vei-ah van mihonpite a ding ka mu hi.

¹⁹ Tuale Topa in, ‘Ramoth-gilead ah Israel kumpipa Ahab kuonto-in a si nadingin koi pen in ama va zawl ta ding ahei?’ a ci hi. Tua ciengin

²⁰ hlagau khat madawhin Topa mai-ah ding a, ‘Keima in ama va zawl ta vang,’ a ci masangsie, khat in thu khat gen a, adang khat in thu tuom khat a gen hi. Topa in ama kungah, ‘Bang na ci zawl diei?’ a ci hi.

²¹ Ama in dawngin, ‘Kei va pei-in a kamsang zosie’ kam sungah hlagau zuou khat ka va suoh ta ding hi,’ a ci hi. Tua ciengin Topa in, ‘Nangma in ama na va zawl ta ding a, na zo ding hi; pei inlen va sem in,’ a ci hi.

²² Tuaci’n en in, Topa in tami na kamsangte’ kam sungah hlagau zuou khat koi zo ta hi; Topa in nang adingin na thuoh ding gimna khensat zo hi,” a ci hi.

²³ Tua ciengin Chenaanah’ tapa Zedekiah in zuon phei-a Micaiah pheta behin, “Nang tunga thu gen dingin Topa’ hlagau in bang lampi panin ei kalsan thei ahei?” a ci hi.

²⁴ Micaiah in dawngin, “A kibu dingin innkhan sungnungah na pei ni ciengin na thei ding hi,” a ci hi.

²⁵ Tua ciengin Israel kumpipa in thupie a, “Micaiah man unlen, khuopi uhpa Amon kung le kumpipa’ tapa kungah zawpikia un;

²⁶ tuale ama in, ‘Kumpipa in tam bangci hi: Tam mipa thong sungah khum unlen, lungnuom taha kang kilekia masangsie an le tui na gieutausah un, ci hi,’ ci un,” a ci hi.

²⁷ Tuale Micaiah in, “Lungnuom taha nang kilekia poma leh kei tungtawn a Topa thu gen lo hi taven,” a ci hi. Tuale ama in, “No mite aw, na unpi-un ka thugen za un!” a ci hi.

Ahab’ Galelna le Sina

²⁸ Tuaci’n Remoth-gilead ah Israel kumpipa le Judah Kumpipa Jehoshaphat a kuonto uhi.

²⁹ Israel kumpipa in Jehoshaphat kungah, “Kei mituom hing kipangin gal sungah hing kuon vangin, hizongle nang in na puontuolpi hing silh in,” a ci hi. Tuaci’n Israel kumpipa mituom kipang a, gal sungah ama gel a kuon uhi.

³⁰ Tu-in Aram kumpipa in a leeng makaite thupie-in, “Milien mineu koima tawh kido sih unlen, Israel kumpipa beh tawh kido un,” a ci hi.

³¹ Leeng makaite in Jehoshaphat a mu ciengun, “Khumpa Israel kumpipa hi ve aw,” a ci uhi. Tuaci’n ama sim dingin a kihei uhi; tuale Jehoshaphat zong kikozah pai a, Topa in ama a panpi hi. Ama kung panin Pasien in amate a kaikhie hi;

³² azieh pen Israel kumpipa ahi lo lam leeng makaite in a thei bepun, ama a delna panin a kilekia uhi.

³³ Ahi vangin mi khat in a thaltang a mawh kap leh, a galdal thep le a awmdal kikalah lutin Israel kumpipa a kha hi; tuaci’n ama in a leeng hawlpa kungah, “Kei liem zo ka hi ziehin kilekia inlen, galphuol panin ei puodawh ta’n,” a ci hi.

³⁴ Tua ni-in gal kidona nasie mama a, nitah a si dongin Aram-te lam nga-in a leeng tungah kumpipa a kingam hi; tua ciengin nitum laitahin ama a si hi.