2 Khangthute 12 - Zo Bible

Egypt in Judah Sim

¹ Rehoboam’ uhna kipin ama a thahat ciengin, ama le a ompi Israel zosie in Topa’ thukham a nuasie uhi.

² Topa tungah amate a citah lo ziehun Kumpi Rehoboam’ a kum ngana kumin Jerusalem sim dingin Egypt Kumpi Shishak,

³ leeng galkap tul le zani, le sakol galkap tul sawmguh tawh a kuonto hi. Egypt pana ama tawh a kuonton galkapte ahile a tam dan uh kisim zo lo hi- amate pen Libya-te, Sukki-te, le Ethiopia-te ahi uhi.

⁴ Ama in Judah gama kulnei khuopite la-in Jerusalem cieng dong a tung hi.

⁵ Tua ciengin Shishak ziehin Jerusalem-a a kikhawm Rehoboam le Judah uliente kungah kamsang Shemaiah pei-in amate kungah, “Topa in tam bangin a gen hi: Note in kei nei nuasie uhi. Tuaci’n ken zong Shishak’ khut sungah note kang nuasie ta hi,” a ci hi.

⁶ Tua ciengin Israel uliente le kumpipa a kiniemkhieh vua, tuaci’n amate in, “Topa a thuman hi,” a ci uhi.

⁷ Topa in amau’ kiniemkhieh lam a mu bepin Shemaih kungah Topa’ thu a tung hi: “Amate a kiniemkhieh zo ta uhi; hizongle amate susie loin ka hunkhie lieiliei tei ding a, Shishak’ khut tungtawnin Jerusalem tungah ka lungthahna kisungsuh lo ding hi.

⁸ Ahi vangin amate in keima’ nasepna le gamdang kumpi gamte’ nasepna a kilamdanna a theithei nadingun amate pen ama’ nasemte a suoh ding uhi,” a ci hi.

⁹ Tuaci’n Jerusalem sim dingin Egypt Kumpipa Shishak a kuonto hi; ama in Topa’ biehinn sunga goute le kumpipa’ inn sunga goute a kipan na zosie a lamang sieng hi; ama in Solomon’ bawlsa kham lumte zong a lamang sieng hi;

¹⁰ hinanle Kumpi Rehoboam in tuate tangin sumngo lum bawl a, kumpipa’ kotcing ahi inncing uliente’ khut sungah tuate ap hi.

¹¹ Topa’ biehinn sungah kumpipa a lut sielin a cingte pei-in tuate puo-in a cingte’ innkhan sungah a koikia uhi.

¹² Ama a kiniemkhieh ziehin amate a suhsiet cip lo nadingin ama kung panin Topa’ lungthahna a kiheimang hi; tua tham loin, Judah gam sungah thu peizie zong hoi pai hi.

Rehoboam’ Sina

¹³ Tuaci’n Kumpi Jerusalem ah Rehoboam amama kisukipin a maang hi. Rehoboam a maan kipatin kum sawmni le khat pha hi; Israel minamte sung panin Topa in ama’ min koi nadinga a teel Jerusalem ah ama kum sawm le sagi sung maang hi. Ama’ min pen Naamah hi a, Ammon-te ahi hi.

¹⁴ Ama in Topa sui ding a lungsim sungah a koi lo ziehin a sie-in a gamta hi.

¹⁵ Tu-in Rehoboam’ gamtatna teng, a kipatna pan a tawpna dong, Kamsang Shemaiah le Thumu pa Iddo’ Khang Tangthu sungah kigiel hi lo amah? Rehoboam le Jeroboam kikalah kidona om den hi.

¹⁶ A pu a pate tawh Rehoboam lumton a, David’ khuopi sungah kivui hi; tuale a tapa Abijah in ama’ za luo hi.