2 Khangthute 11 - Zo Bible

Judah le Benjamin Kulin Ki-im

¹ Jerusalem ah Rehoboam a tun ciengin ama in Rehoboam’ kumpi gam a ngakia nadingin Israel sim dingin Judah minam le Benjamin minam teeltuom galkap mi tul zakhat le tul sawmgiet kaikhawm hi.

² Ahi vangin Pasien’ mi Shemaiah tungah Topa’ thu a tung hi:

³ Judah kumpi Solomon’ tapa Rehoboam, le Judah le Benjamin gam sunga om Israel mi zosie kungah gen in,

⁴ Topa in tam bangin a gen hi: “Note na kuonto sih ding vua, na sanggamte na sim sih ding uhi. Mi zosie a inn lam ciet vuah kilekia ta uheh. Bang ding ahei cile tam thu khu keima kung pan ahi hi. Tuaci’n Topa’ thu mangin Jeroboam do nading panin amate a kilekia uhi.

⁵ Jerusalem ah Rehoboam teng a, kidal nadingin ama in Judah gam sungah khuopite a lam hi.

⁶ Ama in Bethlehem, Etam, Tekoa,

⁷ Beth-zur, Soco, Adullam,

⁸ Gath, Mareshah, Ziph,

⁹ Adoraim, Lachish, Azekah,

¹⁰ Zorah, Aijalon, le Hebron, Judah le Benjamin gam sunga om kulnei khuopite a lam hi.

¹¹ Ama in gal kulpite dettahin bawl a, tuate sungah galkapmangte koi-in an, sathau le lenggazu a koi hi.

¹² Ama in khuopi zosie-ah lum le tei golte koi a, tua khuopite a muonhuoi-in a bawl hi. Tuaci’n ama in Judah gam le Benjamin gam kem hi.

Siempute le Levi-te in Rehoboam Panpi

¹³ Amau’ tenna ciet panin Israel gam sung zosie-a om siempute le Levi-te ama kungah a kila uhi.

¹⁴ Levi-te in a taang gamte ule a neisate uh nuasie siengin Judah le Jerusalem ah a pei uhi. Azieh pen Jeroboam le a tapate in Topa’ siempu hina panin amate khawlsah a,

¹⁵ munsangte, kel-dawite, le a bawlsa bawngno milimte adingin ama’ siempute koi hi.

¹⁶ Israel Topa Pasien sui ding a lunglut mite in a pu a pate uh’ Pasien, Topa tungah biehpiehna pie dingin Israel minam zosie sung panin a nua uh zui-in Jerusalem ah a pei uhi.

¹⁷ Amate in Judah kumpi gam a thahatsah vua, Solomon’ tapa Rehoboam kum thum sung bihtahin a omsah uhi. Azieh pen amate in David le Solomon’ lampi kum thum sung a tawn uhi.

Rehoboam’ Zineina

¹⁸ Rehoboam in David’ tapa Jerimoth’ tanu Mahalath zi-in la a, a nu Jessi’ tapa Eliab’ tanu Abihail ahi hi.

¹⁹ Tua nu in ama tawh tapate, Jeush, Shemariah, le Zaham nei hi.

²⁰ Tua nu zaw ciengin ama in Absalom’ tanu Maacah la a, ama tawh Abijah, Attai, Ziza, le Shelomith nei hi.

²¹ Rehoboam in a zi dangte zosie le a mei teng sangin Absalom’ tanu Maacah a itzaw hi. (ama in zi sawm le giet le mei sawmguh nei a, tapa sawmni le giet le tanu sawmguh’ pa a suoh hi).

²² Rehoboam in kumpi-in ama a koi sawm ziehin a sanggamte lahah Maacah’ tapa Abijah ulien penin koi hi.

²³ Pilvang tahin ama vaihawm a, Judah le Benjamin gam sung teng zosie, kulpi nei khuopi zosie sungah a tapa kimkhat a hawmkhen hi; ama in an neh ding tampitah pie a, amate adingin zi zong a suipieh hi.